أنا حجي كاظم مواليد 1950 قصتي مو خيال لا هي مذكراتي او القصص الي كتبها القدر بخط يده اني كنت اشتغل حارس مقبره في النجف وهذه الشغل مو شغلتنه من اليوم لا ورثته عن ابويه وابوية ورثها عن جدي وجدي عن ابوه قصتي عباره عن قصص ناس انه دفنتهم بايدي وكان موتهم اما نهاية لعذاب الدنيا او بداية للعقاب عن اعمال الدنيا ما أحب أطول عليكم
والقصة الاولى صارت مع زوجتي لان كانت تشغل اوياي بغسل وتكفين نساء وللعلم أني بيتي بنص الكبور البعض من يشوف السكن بالمقبرة شي مجنون ومرعب اما أني اشوف جورت الاموات ارحم اهواي من جوار الاحياء عالاقل هل الاجساد المتهالكه مامنها اذى على العكس الاذى يجيهم من الأحياء !!!حتى بعد موتهم .
القصة الأولى (اياكم وكسر الخواطر)
بليله من ليالي الشته ساعه تقريبا بالعشرة بليل والدنيا تمطر أندك الباب طلعت منو؟
رد عمو كاظم أفتح اني محمود ؟
هذا صوت محمود ابن صديقي هو مضمد بالمستشفى بس آني متعجب شجابه هل الوقت فكتله جايك وطلعتله اهلا ابني محمود خيرك صاير شي عمو تعال اوياي أنت والحجية اكو بنية محتركه وتوفت واهلها يردون مرة تغسله وتكفنها حتى تندفن 😞فكتلها خوش اوليدي انتظر اشويه لحد ماانجهز غراض الغسل ونبدل ونجيك اني والحجية والله صدك كملت الغراض وجهزنه أنا والحجية وطلعنه لكينه الولد محضر سيارة وركبنه وطلعنه للمستشفى ورها ساعة وصلنه فنزلنه وانطيتها غراض تجهيز من الكفن والكافور للحجية وبقيت انتظر يم باب المستشفى والحجية راحت وي محمود للثلاجات الموتى وهسة زوجتي تكمل وتحجي
رحت وصلت وفتحلي محمود باب ثلاجه وطلع الجثة الجثة الي كانت عبارة عن شابة عمره تقريبا بين 16سنة و18سنة لكن كنت عبارة عن بشر مصلوخ جلدها من نار اديها ورجليها ذيبات وماكلتهن نار والوجه الطبقة الأولى من الجلد مصلوخه لدرجه العيون ماكو جفون لكن الجثة ننتظر اشوية لحد مانبدي بتحضير وتكفين لان متجمده بس من شفت الجثة حسيت بخنگة وضيق عجيب وفجأة بددت ضويات المكان تشتغل وتطفي لوحدها ..........
والمكان صار مرعب بالظلام بعد انقطاع الكهرباء عن المكان لكن وآني متجمده بمكاني من الرعب حسيت نفس حار قريب على وجهي اشلون شخص واقف مقابل وجهي كولش ويتنفس هنا حسيت رعب والخوف جمدني بمكاني أريد اتحرك حتى اطلع من المكان اريد اصرخ مااكدر الا ان كطع هذا الصمت والنفس صوت لبنية تكلي أنا مظلومة وماراح اعوفهم بحالهم راح احركهم مثل ماحروكني وظلموني عفاف الظالمة ياويلها مني فجأءة رجع الضوة فتحت عيوني وانه ارجف ماكو شي والجثة كدامي واسمع محمود اجه ووياه ممرضة حتى تساعدني لكاني كوه اتنفس فجاني يركض خيرج حجية اشبيج وجهج اصفر وترجفين !!!!
كتلة لا ابني بس ضغطي هبط وطالعة لبرها اغسل وجهي وارتاح وارجع اكمل كال محتاجه شي كتله سلامتك فكال هاي بسمة زميلتي اجت تساعدج كتلك اكلك يمه هاي الميته وين اهلها !!! ليش مايجن اقاربه امها خالاتها يساعدوني كال خالة البنية امها ميته وابوها متزوج مره ثانية ومرت ابوها وابوها واخوتها وكفين ورها المستشفى يكولون مانشارك بغسلها هاي ماتت منتحرة وكافرة شوف احد يكفنها ويكمل واحنه بس ناخذها ندفنها وحتى عزه وفاتحه مانسويلها هاي كافره وخارجه من رحمة الله !!!!
فالمهم أني رجعت ورها ماارتاحيت اشويه واجت الممرضه وكملنه جهازها واجه محمود واخذها لكن أنا نفس قبضة القلب والخنگة اشكد غسلت نسوان محتركات مثل هل الجثة ماشفت المهم أجه محمود وجاب اوياها الأجر من اهلها كتله اوليدي هذا الاجر الك بس اريدك تكلي هل البنية بنت منو وين اهلها كال ليش حجية تسألين؟؟؟ كتلها لا ماعندي شي بس أرد اعرف شنو قصتها ؟
كال حجية هاي البنية بنت حجي جبير ابو القماش تعرفينه كتله أي هذا رجال معروف واله صيته بين الناس .
بس أول مرة اعرف عنده بنية كل الاعرفه عنده خمس ولد شباب !!!
كال حجية هاي البنية مو بت مرته هاي مرتة ام البنية ماتت من اسنين وبعدها اخذه مرته ام الاولاد وهذا كل الي اعرفة عنها اشلون ماتت وليش انتحرت ماادري !!!!!!
فأني بيني وبين نفسي كلت اندل بيته بنفس شارع الحجية ام راضي حجية وتخاف الله وحاجه بيت الله مرتين أروح واسألها عن قصة البنية فكملت وطلعت للحجي ورجعنه للبيت .
وكان وي صلاة الفجر فصليت وكعددت حجيت لحجي صار فگال تعوذي من ابليس هل الكلام تهيأت لان شكل البنية كان متشوة من النار واقري سورة الزلزلة سبع مرات لطرد عارض الجن والانس والوهواس ونامي وارتاحي من السهر .
