عمو وكل هذا وماتركنه البيت واستمر البناء الا اول شهر التاسع كمل وقررنه ننتقل لبيت قبل بداية دوام المدارس حتى نستقر ونرتب امورنه وفعلا ونقلته كل الغراض وگلنه نگعد بلبيت ونبدي نرتب ، ومن اول ماسكنها بلبيت كان زوجي اوياي بس الصراحة كان تصير امور غريبة لكن اكذب عيني واكول اتخيل ،ووجود زوجي اوياي بلبيت مثل مانگول محسسني بالامان ،ومن الامور الي صارت اوياي ،مثل ارتب واكمل اروح لمكان ثاني الگه باب الثلاجه مفتوح وكل غراض مطشره بلگاع اكول اكيد جهال اجي اسألهم ولا واحد قرب عليها !!! مثل مرات بليل افز اروح اشرب ماي من المطبخ من اطلع من الغرفة الا ان اوصل المطبخ اسمع صوت اماعين تتكسر بلمطبخ اوصل افتح الضوه ماكو شي ! وتمر سبع تيام واني بلبيت وبعد سبعه كان زوجي لازم يروح لدوامه وكان مكان عمله بلبحر يعني من يصعد بعد ماينزل لحد ماتخلص فترة دوامه كامله لو شما يصير ومن بعد ما سافر زوجي لدوام هنا بددت مصيبتي الحقيقية ، اول ليله سبحان الله جهالي الوكحين ساعة بتسعه بليل الله ذاب عليهم نوم واني بقيت لوحدي والبيت هدوء واني متمدده واقره ايات وكلام رب العالمين لحد ماغفيت الا بعد مده فزيت وكانت ساعة بلوحده هنا اسمع صوت اشلون مره وزوجها يتعاركون عرك قوي واشلون واحد يكسر ويخرب هنا كملت وضليت اذكر كلام رب العالمين ، واني الصدك ارجف بس الصوت كل ماجايلها يقوى ففتحت الباب على كيفي واني احس رجليه كوه شايلتني طلعت لصاله ماكو شي ، بس الصوت بعده ما راح بس من طلعت الصوت يجي من الطابق الثاني فكلت جائز حراميه فصعددت الدرج على كيف واني متردده افتح باب السطح كلت اتصل على اهلي زوجي رغم اعرف كلش زين زوجي مايتحصل وفعلا ماحصلته للعلم هما حتى شبكة انترنيت مايمهم ، فكلت اتصل على اهلي سبحان الله ذيج الليله كل اجهزتهم مغلقه والي يدك ومحد يجاوب ، فهنا وصلت الباب البيتونه الصوت يقوى جاي من الغرفة الفوك الصدك لهنا خفت ورجعت بسرعة لغرفة وقفلت الباب من جوها وصرت بنص جهالي واني ارجف وذيج الليله لصبح ماهدء الصوت لحد ماطلعت الشمس وصوت التكسير والعرك مستمر وعيني مااخذت النوم من طلع ضوه النهار كلشي هدء فكعددنه وجهال راحو لدوام واني هم فالظهر اخويه شايف اتصالي خطيه فأجاني فكالي خير اكو شي الصدك عمو ما حجيت شئ شگالها كتله لا ابني ارتفعت حرارته وخابرتك بلكي تجي تاخذ اوياي لطبيب وهسه الحمدالله صار احسن ، فيتعذر گال اليوم مااروح لاهلي ابات اوياج صدك والله ارتاحيت واطمئنيت ، وصدك خطيه بات بقينه سهره تقريبا لساعة 12 على فلم فگال جكايري خلصت راح اروح كتله اكو محل ورانه بشارع بيه عمي ابو علي بس يبقى لهسه مااعرف لان المنطقة ظلمه وموحشة بليل كال راح اروح واشوفه لان مااكدر بدون جكاير ونسيت اجيب لهسه الا ذكرتهن وصدك وطلع اخوية ، وهسه احجيلكم شنو الي شافه اخويه من طلع يكول والله شارع اضلم الا من عامود كهرباء اشويه عن دكان بيه ضوه لان يشتغل وينطفي والدنيا ظلمه وبارده فبالطريق واني ماشي لگاني رجال شكلها مثل الظايع يمشي ويباوع بلبيوت فسلمت عليه واني وماشي فهو مادارلي بال ولا كأن سمع احد سلم عليه فكلت عادي رجال مايعرفني ، مشيت اشويه التفت مالكيت احد هنا صدك خفت كلت استغفرالله ياربي جائز اني اتخيل والله امشي ومن امشي احس اني مو لوحدي امشي لا احس اشلون رجلين اهواي تمشي وراي التفت مالگه احد واني هنا صدك نرعبت وبدديت اقرة ايات يروح الصوت اسكت ترجع رجلين والزاد اصوات الكلاب الي تعوي بصوت مرعب لكن من التفت مااشوف كل كلب بشارع وبعد هل الخوف وصلت والله اشويه عن دكان بس عمود الكهرباء الي عليه الانارة اشوف يمها خيال واكف كل البالي شخص جاي عدكان يشتري اشويه والله من قربتن على العمود الخيال بده يصعد على العمود اشلون شكل القرد على اربع رجلين ومن قربت اكثر عيونه اشلون عيون البزازين بالظلام تلمع ومرعبه وصوت الرجلين تمشي وراي بده يزيد اشلون صوت رجلين العسكر بتدريت وصوت الكلاب تعوي بقوه هنا صرت اركض بدون وعي لحد مارجع لبيتي وهو يرجف ، ومرعوب ويقره قران گال امنيات منطقتكم هاي صدك مسكونه بيتج هم تشوفين شي فكتله لا شگلها بعد واني خسرت العندي وماعندي عليه وين اروح ، كتله تتخيل گال لا والله ودليل الصبح راح ارجع لصاحب المحل واسأله عن المكان ، وصدك الصبح راح لرجال فهذا كلام صاحب المحل گاله عمي انا اصلن ماابقى بلمحل لبعد ساعه بسبعه بليل عمي المكان مسكون وحجالي نفس الصار اوياي صار اوياه والأزيد كال يطلعي رجال دشداشته كلها دم يمشي وراي من اعزل ورها 12 بليل فصرت مااتاخر بعد بليل عمي اني رجال جبير ومااتحمل هل الامور ومنتظر اخلص مده ايجار المحل وبعد ماارجع لهل المكان ابد لو ابلاش احصل محل عمي المنطقة هاي مسكونه بشيطان ملعون ، والناس تركتها واني دفعت الايجار للمحل واتورطت وطول طريق وانا راجع للبيت كان مجموعة كلاب تعوي وتركض وراي ،التفت مالگها شي ، هذا كلام صاحب لمحل لاخوية وثاني يوم الصبح أخويه گال انت اشلون تبقين بهل المنطقة كتله لا ماكو شي انت تتخيل يله خل نروح ،اني وانت لنفس المكان الصبح ماكو شي والوضع طبيعي واني بيني وبين نفسي مااكدر اكلها كلامك صحيح وشفت العجب واترك البيت الي خسرت العندي والماعندي عليه ، وبعد جدال مع اخويه مااقبلت اترك بيتي ، وهو زعل وطلع وبقيت انا بلبيت ، وبنفس الليلة عشت ابشع رعب الاصوات طول الليل والتكسير وغير صوت الناس الي تتعارك اطلع اشوف ماالگة شي ،ارجع ترجع نفس الاصوات المطبخ صوت تكسير اروح اشوف ماكو شي اباوع من ورها جام المطبخ على خارج البيت اشوف خيال واكف برها ، وهنا قررت اطلع اشوف فتحت وطلعت حسيت هو قوي ومثل شخص جاي يرگض قوي وعبر من يمك مثل الخيال الخطف من كدام وجهي لدرجه باب المطبخ الوراي انطبك قوي فرجعت اركض فتحت الباب بقوة ودخلت ادور بلبيت ماكو اي احد فرجعت للغرفة ، وقفلت الباب وحضنت جهالي ونمت مااعرف اشلون ، وثاني يوم الصبح زوجي رجع بعد ماطلب اجازة قبل دوامه ونزل لان مااتحمل القلق العايشة علينه بهذا البيت الغريب ، لكن عمو الي جابنه الك نريد حل لان بنتي الي عمرها هنخمس سنوات ، بددت تنعزل ولا تحب تطلع تبجي لساعات وتشنج بدون سبب وبليل افز الگاها گاعد تحجي مع احد ما اسألها تكلي احجي مع بيبي ماما بيبي منو تكلي بيبي ام بابا ، لعلم ام ابوها متوفيه وعمرها سنه وهي اصلن ماواعيه عليها ، ومرات تبجي تگلي بيبي تضربني ومرات تصفن على زاويه معينه بلبيت من اسألها تكلي بيبي هناك كاعده ، ومرات تحجي كلام مو مفهوم لاهو فارسي ولاهو كردي وهي طفله شمعرفها لهل الكلام من أسألها تكلي بيبي كالتلي هل الكلام
