القصة الثانية (صلة الأرحام المسمومه)
ابشع انواع الظلم الذي ممكن يظلمة الانسان هو ظلمة لاهله لان ظلمة لاهله وناسه كانما ظلم نفسة وهل الكلام اله علاقة بصاحبة القصة ، بيوم اجتني جنازة وهاي الجنازة للمرة فبعد مازوروها اهله وكملوا جابوها وبديت احفر القبر وهذا الكلام تقريبا بلخمسة العصر بس ياسبحان الله ماشفت قبر ثقيل حفرة عليه مثل هذا القبر اعوذ بالله كانما الأرض ماتريد تأخذ هل الجثة ولاتستقبلها المهم بعد تعب كملنه ودفنها وكان الجاي اوياها ابنها واخوها واستغفر الله من ذنبهم كانهم بس يردون يخلصون منها ويدفونه ويرجعون وماكو احد غيرهم مع الجنازة كملنه وطلعنه من المقبرة تقريبا ساعة بالوحده هما توكلوا لاهلهم لان من محافظة ثانية خارج النجف واني رجعت للبيت غسلت ونمت لان كلش تعبان والمفروض أرجع اكعد مع صلاة الفجر للصلاة فنمت ؟وكعددت على منبة الصلاة فكمت ورحت أريد أتوضى للصلاة واسمع اكرمكم الله صوت كلاب تعوي وصوت قوي ومرعب وسط ظلمة المقبرة وسكون وصوت كأنما اله صدى من كد الهدوء أول مرة ترددت اطلع لان قويت قلبي وعندي سلاح ولايت واخذتهم طلعت وانه طول الطريق اردد صورة الكرسي وأذكر الله بكل خطوة واستغفر وكل مااقرب الصوت يزداد ويرعب أكثر لكن الصوت طالع من المقبرة الجديدة وبالتحديد المقبرة الي دفنت المرة بيها والقبر الوحيد الي مامبني بعده تراب هو قبرها فمشيت الا أن صوت كلش قوى وهنا جمدت بمكاني من المنظر الشفته اعوذ بالله من عضب الله شفت كلاب اربعه سود بس ياناس مو كلاب مثل العادية النعرفهم كانهم وحوش من منظرهم تنرعب حافرين الأرض ومطلعين الجثة وكاعدين ياكلون بالجثة كانها فريسة بيد وحش من خليت لايت عليهم عيونهم تلمع حمر بالضلمه والاسنان كلها دم وهذا أخر شي أذكرها من الصوت السمعته الا أن فتحت عيوني وانا بالمستشفى وزوجتي خطيه مرعوبة وتبجي وعبالها صارلي شي فوعيت وانا تعبان ومنهار واصوات الكلاب بأذني ترن ومنظرهم وهما ياكلون الجثة انطبع بدماغي
وبنفس اليوم اصريت اطلع رغم رفض زوجتي ودكتور كتلهم خلص اليوم أطلع وانا كل الي ابالي لأزم أعرف شنو قصة هل المرة وبس ارجع وارتاح اليوم وبأجر اخابر ابنها اخوها واكلهم يجون يشوفون اختهم شصار اوياها ونرجع ندفها واعرف شنو قصتها .
