الجزء الثاني
فبقيت حاير شسوي الا أن اجه ابالي شيخ محمد تذكرون الي ساعدني بعلاج المرحومه بنتي هبه كلت راح اروحله وأسأله وهو يرشدني شسوي ، والله صدك رحتله وحجيتله كال حجي هذا الشفته بالحلم رسالة اووصية من ميته ومظلومه ومستحيل تكون اضغاث احلام لان الاضغاث ماتنعاد على الانسان مرتين وهاي البنت مقتوله والقاتلها زوجها مثل ماكالتلك بالحلم بس انت مستحيل تروح للمجرم تگله انت قاتل وعندي ضدك دليل وحتى لو بلغنه شنو دليل الي نقدمه للحكومة حتى تصدك وأحب انطيك تفسير الميت من يموت يتحرر من الماده الي هي الجسد بس روحه تبقى ولعلمك الميت كل ليله خميس يجي عند اهله ويوكف بابهم ويتفقد احوالهم والبنت روحها متعلقة بأطفالها وبس ربك العالم شنو الظلم المر عليها من هذا الفاسق زوجها وحجي اني ماراح اتركك راح اروح اوياك لابوها بس انت تندل بيتهم كتله لاوالله بس اعرف المحافظه واعرفه معرفه عمل لان دفنت امه واخوه وهسة بنته كال زين عندك رقم تلفونه كتله اي عندي ، كال خابره وكلها احنه جاينك خطار ولاتحجي شي ثاني ابد لحد مانوصله ونگعد اوياه ونحجي ونفتهم منها شنو قصة بنتها، فصدك والله خابرته السلام عليكم اشلون اخويه هو استغرب من اتصلي كتله خويه عندي شغلة بمحافظتكم اني وشيخ صديقي وارد اسالك تضيف ضيف الله اولا كال اهلا وسهلا بيك انت وصديقك بس كتله حجي وين بيتكم والله انطاني العنوان وثاني يوم بسيارة شيخ محمد أحنه يمهم ، فجاب جاي وماي فگاله شيخ محمد خويه احنه جايينك بشي واجابته يمك گاله گول كاله بنتك التوفت قبل مده شسمها كاله زينب گاله اشلون ماتت؟؟هنا ابوها ضل يبجي 😔 ويگول ليش تسألون سامعين كلام من الناس فرد شيخ محمد كاله حجي صلي على النبي استغفرالله لا سامعين ولاشي بس ارد اعرف منك حتى نحجيلك العدنه فهنا يحجي وهو دمعته بعين اني عندي ثمن بنات وكلهن درستهن وتعبت عليهن وكلهن خريجات المعلمه والمدرسة والموظفة الا زينب حبت هذا عمار وعافت حتى دراستها على موده وهي عمره 18سنه وكانت شاطرة ومتفوقه ومن خطبها انه ماارتاحله قلبي لاهو ولا امه بس بنتي جبرتني اوافق كالت احبه واريده وكلت مااريد اظلمها وهذا اختيارها وشرط تعوف المدرسة وعافتها ، واتزوجت واجتنه كم مره يضربه وامها تأذيها ، وتتحمل وتگول انا اختاريت وهذا سوء اختياري والله رزقها بنية ولد وحتى احفادي حرمتنها امها منهم وهو يبجي 😔 تدرون زوجتي من القهر على بنتها هسه بالمستشفى بيها غيبوبة سكر من حجي ناس ،لان هو وامه يگولون بتهم مو شريفة وعده علاقة بواحد ويطعنون بشرف بنتي وانه اسمع واسكت فسأله شيخ محمد اشلون ماتت كالها والله ياشيخ ماادري خابرني ساعة ب4الصبح تجي هسه انت ومرتك رحت لكيت بنتي ميته ضلت امها تلطم وتصرخ گال اشش بنتك لكيتها وي واحد وكتلتها ،ونأخذها سكتها ندفنها ونرجع لا اسويلك فضيحه بشيبتك وجهالي عندي وبنتك الك اروح اوياك بس هجي ندفنها وخلص بعد ماكو شي يربطني بيك وبالك تروح لشرطةاو لشيوخ اطالب بالاحفاد ،او تحجي صار وي بنتك اني راح اگول انتحرت لا كتلها مااعزلج بيت عن امي واحفظ ماي وجهك وسمعتك ، ومن دفنها ورجعنه امها الماتخاف الله تحجي انتحرت لان رادت الطلاق لان مصادقة واحد براس ابني ، والعالم ياشيخ تنهش بعراضنه وضل يبجي ليش بوية زنوبه دنكتي راسي وظلمتيني انا وامج ،فحجه شيخ محمد كاله حجي الامام علي عليه السلام يقول من قال حق قال رأيت ومن قال باطل قال سمعت وبين الحق والباطل اربع اصابع هسه اسمع حجي كاظم شيگول فحجيتله كل الي صار ، وهو يسمع ويبجي ويردد حسبي الله ونعم الوكيل، فكتله حجي براءه بنتك بالدفتر الي بغرفتها بس اشلون نوصلها وحتى تأخذ حق بنتك فگال بنتي الكبيرة سباعية وهي واختها زغيره وام عمار تخاف منهن ، راح اخليهم يروحن بحجه يشووفن جهال ويجيبن غراضها ويدخلن غرفتها ويدورن عدفتر وصدك خابر بناته واجو ، وراحوا والله وبعد ساعة رجعوا ولگوه سجل اسود جبير ،انطنه لابوهن فأبوها اخذها گال شيخ أني رجال أمي لا أقرة ولا أكتب ومااعرف شنو المكتوب بالدفتر بس امانة الله شنو اليطلع بالدفتر مستعدين تشهدون بالصار كله كدام المحكمه من ارفع دعوه على عمار وامها هما قتلوا بنتي ،وبنتها من انطته الدفتر گالتله يابه هذا خط اختي زينب اعرفة كلش زين المهم اخذ شيخ محمد الدفتر وبده يقرة وكلنا نسمع اول صفحه هذا الدفتر اني زينب محمد علي مواليد 1/4/1994 متزوجه من عمار عبد الحسن عندي طفليين من تقرة دفتري هذا ماأكون بالدنيا امانة الله اذا صار بيدك وصله لاهلي ابويه حجي محمد بمنطقة كذا بشارع كذا ذاكرها كل تفاصيل وعنوان بيت أهله كامل ، اني كتبت شصار اوياي لان ماأگدر ارجع لابويه واحجيله الي ديصير اوياي لان اني اختاريت عمار وفضلته على دراستي وحياتي وفضلته حتى على أمي وابويه وكأن أغبى اختيار بحياتي ، من اول ماتزوجته وبعد فترة بده يظهرلي الوجه الثاني الي ماكنت اشوفها من ضرب واهانه وذله بس اروح لاهلي واني مقررة ماارجعله اشوف حال ابويه المريض الي مايتحمل مشاكل مع واحد مثل عمار وكل ما يضرب اذا فكرتي تروحين لاهلج اقتل ابوچ وافضحج كدام العالم وماعندي مانع واهواي جماعتي ساقطين اجيب واحد يگول عندي علاقة بيچ ،وكل هذا الضرب والذل وتحمله وساكته الا أن مره اجه يضربني وابني صار بيني وبينها حتى يدافع عني وابني عمره خمس سنوات وهو متعلق بيها سحبها من ايده وانخلع متنه وبقى يبچي واخذه للمستشفى فگاله دكتور الخلع قوي اخذه لدكتور للبغداد يسويله عمليه ارجع المفصل ماكو تبقى ايده هل الشكل بس ممدوده وألمه يكبر اوياها فكملنه كولشي ورحنه لبغداد نعالج ابني بس من رحنه مانزلنه بفندق لا گال بيت صديقي نگعد بيه ، ومن رحنه ودخلنه صديقه يباوعلي نضرات اشمئزيت منها رغم اني لبسي طويل ومستور صح بلاعبايه بس محتشم جدا ، ومن تعب الطبيب والسفر وقلقي على ابني بعد مارجعنه من الدكتور كان الوقت تقريبا ساعة ب8بليل ، جهالي ناموا اخذتهم اثنينهم اوياي لان ماأمن بام زوجي مره لكيتها تريد تقتل بنتي سارة وهي عمره شهرين وهي نايمه بسريرها فصرت وين مااطلع بلبيت جهالي كدام عيني ، المهم اتعبت ونمت وفزيت تقريباالساعة ب 2بليل واسمع عمار وهذا صديقة گاعدين بصلة البيت يتهامسون ويحجون ، صديقه يسأله حلوه؟؟ كالها تخبل وعليها شعر طويل وحلو وجسم قالب ولا كأنها جايبه اطفال اثنين واني كل البالي يحجون عن غيري ، الا أن سمعت شي خله عقلي وگف گال اشگد يدفعون بيها گال اربع شدادت بس كون تسووها؟؟؟وعمار گالها تسوه وروح امك ، اي ولك اريد اخذ جهالي وامي واطفر للمانيا وزينب بالعافية على الياخذه ، اهنا حسيت واحد ضربني راشدي قوي على وجهي هذا يحجي عني!!! ونذل يوصفني لرجال غريب الله ينتقم منك يساقط واريد يبيعني والمصيبه كمل يگلها خاف اهله يسوونه مشاكل كالها لاتخاف منو الها ابوها رجال جبير رجل بالدنيا ورجل بالاخره واعمام ماعده واخو ماعده وامها عجوز وكلشي ماتسوي واخواتها البنات كلمن حايره بيتها وزوجها منو يطالب بيها يمعود ...
يتبع في الجزء الثالث
