فثاني يوما فعلا اتصلت على اخوها ومايجاوب واخر شي جاوب لكن مع الاسف كان رده بعدم اهتمام من بعد ما حجيتلها شصار كال أي ادفنها واني انطيك افلوس دفنه . ومااهتم ابد كأنه مو اخته بعد ماأيست منها اتصلت بأبنها ومن ثاني اتصال رد بس ماكتله كتله عمو جابر رايدك تجيني كال عمي خير اكو شي كتلة ابني أي وشي ضروري اريدك تجيني فكال تمام بأجر انشاالله من الصبح اطلع واجيك وصدك والله ثاني يوم هو يمي وانه ورها مارجعت من المستشفى شفتها شسوت الكلاب بيها منظر بشع مأكلت بطنها والريحه العفن ماليه المكان وجها مشوها شعرها مگطع وقطع من راسها منتاثرة بالارض فلميت المتبقي منها لكن هل المرة غيرت مكان الدفنها ومادفنتها بالارض لا دفنتها بسرداب لان السرداب ينبنها وحتى الحيوانات ماتكدر تحفره وتفتحه مره ثانية بعد الدفن المهم وصلني ابنها وكعدنه اني اوياه بيتنه رغم مارضها يدخل جبرته يدخل وشربنه جاي وغدة فكتله عمي اسألك سؤال وياريت تجاوبني عليه وتحجيلي الصدك !؟كال كول عمي كتله عمي أمك شمسوية بدنياها كال ليش كتله عمي بعد الدفنه كذا وكذا صار فالولد ختنك ضل يبجي ويلطم على وجه مثل النسوان فهديته وكتله عمي اذكر الله كألي شمسوية بلكي نكدر نروح لعالم دين ينطينه حل يخفف عنها العذاب وربك غفور رحيم كال عمي اني ابويه شيخ عموم ومعروف واهلي ناس كلش معروفين بمحافظته وآني الولد الوحيد لابوي ومدلل لكن من وعيت لدنيا ابوي دوم مريض الا أن اجه يوم وكلش صار نايم بالفراش ويوم عن يوم حالته تسوء مع العلم الاطباء يكولون كلشي مابية وبليل تجيه حالات مثل الجنون يضل يصرخ ويبجي وبس يكول حوبه سماح وبناتها الصار بيه خطيتها برگبتي ليوم القيامة وبعد مده أنتقل لرحمه الله وبعد مده امي ضربتها جلطه وهي على فراش الموت حجتلي كلام خلاني من يومها اتمنى ياريتني يتيم ولا هل المرة الساقطة الشيطانه أمي فأكلك عمي سالفة من اولها .اني ابوي بشبابه وهو الابن المدلل لجدي الشيخ الغني ابو الاملاك والخير وكانت بعائلتنه سنه بنت العم لأبن العم وماكو أحد يطلع عن هذا العرف والقانون وأمي من طفولتها تگلي كانت تحب ابوي لكن ابوي وبصدفة قلبه مال لغيرها مو بس مال لا والله عشكها وروحها من الدنيا سماح بنت الفلاح الي بگاعنه وكانت عادية ودائما تشتغل وي ابوها بالگاع فشافها ابوي وعشكها ومات عليها من أجه گال لجدي أريده گاله اتبرى منك إذا اخذت بنت الفلاح الك كريمة بنت أخوي وابوها قبل لايموت خلها امانة عندي وماعندي غير هل الكلام فأبوك قبل بكلام ابوها وتزوجي لكن اشكد احبها هو ماتقبلني وطول عمره احس روحها مو الي وصلت مرات وهو نايم ينادي بأسم سماح وانه نار تسعر بقلبي من الغيرة يعوفني انا بنت الخير ويركض ورها بنت الفلاح الخدامة فمررت سنه وسنتين على زواجنه وانه ماحبلت لحد ماصارن خمس سنوات فأبوك حاجه ابوه اريد يتزوج لان أريد ولد يشيل اسمها وهو شيخ عشيرة ومن هل الحجي انه اعرف الصدك هو جذب أريد يتزوج سماح الي يحبها وانه انركن على صفحه تزوجني حتى يرضي ابوه وخلص وصدك بعد ايام من بعد ما حاجه ابوه اتزوج سماح وجابها اوياي نفس البيت وانه النار تسعر بگلبي ودي اشرب من دمها وبالخصوص ابوك صار مايجيني ونسه وجودي بحياته وسماح بعد شهر من زواجهم حبلت واني بقيت مثل الگاع البور المحد بحالها ومرت ايام حملها عليها اسوء ايام وهو كلها هدايا وذهب ودلال فنار الغيرة تسعر بكلبي وحقدي يزيد عليهم الا أن يوم اجتني صبرية دلاله دائما تجينه وعدها كل اخبار العالم وتعرف سحارين وهل الدروب وانه بحرقت قلبي حجيتلها شصار اوياي وبالاخص من جابت سماح بنتها جبيره وابوك طاير من الفرح وذبح ذبايح فرحان كان اجه ولد مو بت ومايطلع من البيت الا للضرورة وانه نار تسعر والحقد يكبر وحجيتلها كلشي وانا ابجي فكالت بمكر وخبث لاتبجين يابنت الاجاويد الحل عندي ماالج الها سحار عدنان الاعرج هذا عملها بالمكان وراح يعالجچ وتحبلين وتجيبين الولد وضرتج إذا ماخله رجلج مايشوفها عاتبيني فأنه راح اجيلج الساعة بالخمسة الصبح نروحلها حتى نلحك نرجع لان هو مو بالولاية بيته بالقرية وباخر القرية بعد .
