اعرف اني طولت عليكم هل المره بالقصة ، اتمنى تعذروني لما تعرفون القصة الي راح احجيلكم اياها هي قصة غريبة ، وصرت طرف فيها بالصدفة تعرفون اني مو ازغير بالعمر اني مريض بالسكر ، فممنوع عني الشكر فكنت اشتري العسل وكان اكو شاب كردي من اهل كردستان تعرفت عليه بالصدفة كان يجيبلي العسل كان عنده سيارة تبيع عسل ،بين المحافظات الجنوبيه من النجف للبصرة ، وتعرفت عليه وصار بينه علاقة طيبه لكن هذا الولد فجأه غاب وانگطع وصار مايجي ويجي مكانه خاله يبيع العسل وتقريبا مر على غيابه اربع تشهر ، الا ان مره اريد عسل فخابرت خاله گالي هل المرة أرام اجه مو انا وصدك انتظرت لان هو مالها مكان يفتر بسيارته ، فالولد شكلها متغير كلش كانه بالفترة الي غاب بيها كبر عشرين سنه ، ونص شعره ابيض اتعجبت من شفته كتله معقوله انت أرام الكنت تجينه بلعسل قبل كم شهر هاي اشبيك عمي ليش هلشكل متغير مريض ، فجاوبني گال عمو من الهموم كتله الله يبعد عنك الهم وليدي بعدك باول العمر ، فجاوبني عمي الهم يكبر البشر عمرين فوگ عمره كتله اتفضل اوياي غداك اليوم عندي فجاوبني انت ساگن بالمقبرة فضحگت كتله صح عمي الحال تعبان بس نكرم ضيف ، فجاوبني لا عمو لاتفهمني غلط انت وبيتك وضيافتك على راسي بس عندي غايه ثانية من السؤال ، كتلة اي ابني گال عمو تعرفلك شخص روحاني او معالج بالقران يعرف بأمور السحر ولبس ويكون صادق ومو دجال او كذاب اومشعوذ عمو انت عايش بالمقبره اكيد مرت عليك هل الامور وتعرف ناس تعالجوا؟؟؟!!
كتله ابني اعرف مو مااعرف بس انت متاكد الشخص العندك محتاج علاج روحي مو علاج طبيب گال عمي العلاج علاج روحي لان علاج الطبيب مافاد لهذا اتاكدنه ، العلاج روحاني مو علاج طبيب كتله الك اخذك هسه گالي لا لاختي ،كتله تتفضل اوياي على الغده واليوم تخلص شغلك وتجي تبات عندي، كالي خاف ازحمك كتله لاتگول هل الشكل البيت بيتك وبليل اخذك للشيخ ثقه ويعالج بكلام رب العالمين لا مشعوذ ولاكذاب ! وصدك تغده عدنه والعصر راح وزع العسل العنده على محلات العسل ، واجانها الساعه بسبعة المغرب صلينه وتعشينه ، وركبنه سيارته واخذته للشيخ محمد اكيد تعرفونه، صديقي فرحنه وكعددنه وعرفت الولد عشيخ ، فحجه أرام گالها شيخ اني اختي مريضة ومااعرف شنو علته رغم ماخليت شيخ يعتب عليه لاعنده ولا حتى من الخارج وكل الي اخذها الها يگول سحر وخادم السحر قوي ، وبالاضافة داخله مقابر بليل وهل الشي مسويه بيها مثل البس القوي والي مايگدرلها والي ، ينطي علاج فترة تتحسن وبعد مده ترجع حالته اتعس من قبل العلاج ، وراح احجيلك قصته من الاول اني واختي فقط وامي توفت وكانت اني 16سنة واختي 18 سنة ماكانت اختي وكانت امي وعلاقتنه مو اخت واخوها لا اصدقاء وابويه بعد وفاة امي عاهده مايتزوج بعدها اي مره الا انه يلتقي بيها ، واختي صداقتي اوياها لدرجه من حبت ديار وبددت علاقة حبهم كانت تحجيلي رغم اني كنت دائما اكلها لا تزوجي كملي دراستج اختي كانت دائما الاولى على بنات صفها ، وللعلم ديار مو غريب ديار ابن خالي ، وشي ثاني هذا ديار امها شكله ابد ما راحه اشلون اوصفه الك تشبه المشعوذات ، وساحرات واول ماتزوجت خالي سيطرت عليه وخلته يگطع علاقة بامها وابوها وتكره امي وخالاتي بشكل ، لكن ديار كان الوحيد بيهم الي يتواصل ويحب اهل ابوها ومن طفوله هو كان يحب اختي ، وبددت علاقتهم تقوى من كبروا وصاروا شباب ، واختي كانت جميلة بشكل شعرها طويل وشگرها مايشوفها احد مايجي يخطبها ، لكن كانت ترفض وفهمتوا السبب اكيد ، فأجه خالي وديار خطبوها من كانت بالخامس اعدادي فابويه رفض گال تردونها انتظروا لحد ماتتخرج ، ورجعوا بعد امتحانات السادس اعدادي خطبوها هل المره هي حاجت ابويه بصراحه وكالتله اني قابله وهو راح يخليني اكمل ويساعدني بدراسة ، كاللها اني عرفت من خالتج ثانيه ، امها ما راضيه وماتريدج وتريد بنت اختها ، بس الولد ما قبل يريدج بنتي وامها سامع من امج الله يرحمه دائما تكلي مرت اخويه هذه عدها شغلات سحر وشعوذه ودجل من جدتها كانت معروفه بقريتنه بهل العمل ، وامها وهي ورثن هل الشي منها ، ولعلمك جدك ابو امج كان رفضها ولحد مامات وهو ماراضي على خالج بنتي اني احبج ومااكدر احرمج من شي بس ، هذا الزواج مدام ورها امها ماراح ترتاحين فهي جاوبت ديار غير هو يحبني واريدني ، ومالنه علاقة بامه فجاوب ابويه ، مايصير بنتي شنو تفرقيين بينها وبين امها ، وهو حالته الماديه ماتسمح وهو بعده طالب ،يعني حتى سكن اوياهم بنفس البيت ، كالتله اني احبه واريده واذا ماتزوجته بحياتي كلها مااتزوج فأبويه من شاف اصرارها انجبر يوافق على زواجهم ، ونخطبوا وسسووا حفلة وامها جبرها اجت لكن شكله ماراضية وماراح ترضه وقلبي مامرتاح لشكله واختي مامهتمه المهم اخذت ديار الي تحبها وللاسف متوقعه , هذا الحب راح يكون علاج لكل شي وراح يحول حقد امها الها لحب من تعاشرها وتعرف نفسها الطيبه لكن كانت غلطانه وماتعرف القلوب السوده ماتطرح حب لو تنسقي الف عام من نهر الموده ، ومرت الايام واتزوجت اختي وحسيتها مو اتزوجت اخذت روحي اوياها والزاد قلبي مامرتاح وكاني اعرف شراح يصير اوياها ، اروح وازورها واشوف حب ديار ودلاله الها لكن ، قلبي مامرتاح ومر على زواجهم سنة وسنتين وتلاثة وماصار حمل وهو ولا مهتم يحبها صار ولها ماصار وكل مايسألونه يرد هشي رزق من رب العالمين مو بيد البشر رغم كلام امها وتتدخلها هو يوگفها عند حدها ، وبعد ما تعبت منها وعرفت كرها الها ما يفيد ولا راح يخرب علاقتهم بالعكس زاد حبها اله غيرت كل خططها ، تبدلت بليله ويوم صارت الحنونه والام والي اداري اختي واختي الي كانت تحذر منها صارت تأمن بيها وتطلع اوياها وتاكل من ايدها وتدخله لغرفته وتاخذ شغلتها وما تعرف غايته ورها هل الموده شنو ، وبمرور الايام بعد ماتحسنت علاقته مع اختي فجأه ،اختي صار شعرها صار يوگع بشكل مرعب ، حتى الله يكفيكم شر المرض صار الشعر يوگع خصله خصله ،وصار الراس بيها فراغات بيضة بدون شعر نهائيا ، واختى صارت تخجل فتغطيه بطرحه عن عيون الناس اختى الجميلة صارت ذابله !!!الا ان يوم اختي وگعت عدهم وجابوه النه وكانت ترجف وتجيها حالات مثل الصرع ، وتصرخ وعينها تنگلب وترجف ، وحالته غريبه فنقلنها للمستشفى الطيب عاين حالته على انها حالة صرع ، نتيجه حالة خوف او رعب مرت بيها .
يتبع بالجزء الثاني🎀🥀
