قمر_ وهاي احلى جدر مقلوبه من الي يحبه گلبك حبيبي ونور عيوني
شريف_ احلى قمر عندي بالدنيا الله لايرحمني منج
ممممم شنو هالطعم اليجنن عاشت ايدج حبيبتي قمر
قمر_ مليون عافيه وهنه ياعمري .. شريف ؟
شريف_ عيونه وگلبه
قمر_ شرح نسوي هسه ؟ صار اسبوع كاعدين بيت صديقك شنو مخطط ؟
شريف _ كلشي مخطط اله قمر حبيبتي بس انتظر الوقت المناسب حنروح لمكان بعيد ونبدي من جديد ونعيش حياتنه مثل منريد
قمر_ وين حنروح ؟
شريف_ البصره يم خوالي هناك اكثر مكان امن علينه محد يكدر يوصلنه
قمر_ والله ماعرف شكولك
شريف_ لاتكولين شي بس اصبري يوم وبعده نطلع بين ما ينطيني الاشاره نعمان
قمر_ ماشي حبيبي
....
مرت اليومين وجان كل من العائلتين بحالة فوضى و بحث و كلام وقيل وقال قرر اسحاق ينزل اعلان ببيع كل محلاته والبيت وبده يجهز نفسه للهجره غصبا ما عليه بسبب الي صار ويه قمر بالاضافة للتهديدات الي بده يتعرضلها مايعرف ان جان هاي التهديدات من عبد الرحمن او من ناس ثانيه الها مطامع استغلت الي صار
سميره ودعت اهلها بغصه والم وسافرت ويه زوجها لسوريا ومناك حيطلعون لفلسطين ويستقرون بيها
نزل قرار الحكومه بسحب الهوية العراقيه من اليهود الي يطلعون من العراق مثل النار الاكلت روح اسحاق كاعد بغرفته وعيونه مدمعه وهو يتذكر كل لحظه عاشها بهذا البيت وبهذا البلد جان شعوره بالخذلان اقوى من اي شعور ثاني خذلان بنته اله وهروبها و خذلان الناس الي محد ساعده وكفله وبالعكس استغلو الفرصه وصارو يهددو واخيرا خذلان الحكومه الي رح تسحب منه الجنسيه العراقيه اذا يسافر يعني قرار لا رجعه فيه اذا طلع منا ماله رجعه للابد
طلع يتمشى بالمنطقه والدرابين ويباوع عالبيوت والشوارع والاطفال الي يلعبون بالشارع مشى هوايه وماحس على نفسه الا هو مقابيل محله من شافه انهار وبجى مثل الاطفال فجاءة مطرت السما وكأنها حاسه بألمه وحزنه جان دانيال يدور عليه من بعد مافقده بالبيت لكى كاعد بباب المحل المسدود والمطر ينزل عليه اجى حضنه وبجى ويا كومه واستند اسحاق على كتف ابنه ومشو صعدو بالسياره ورجعو للبيت
...
نعمان_ هذا انسب وكت تطلعون هسه يلا جهز نفسك وهاي الامانه توصلها وياك ونتواصل احنه
شريف_ ماقصرت ياخوي الماجابته امي كفو منك
نعمان_ دير بالك على نفسك و كون حذر
اخذ شريف منه عنده جنطه صغيره وتحاضنو وطلعت قمر وطلعو باليل بسياره نعمان وصلو على بوابة بغداد الجنوبيه نزلو و لكو ناس هناك كراج سيارات صعدو سيارات تروح للبصره سلم نعمان من بعيد عليهم ودعهم بيده وتحركت السياره
جان شريف طول الطريق يباوع بالوجوه وقلق وعينه عالطريق وحاضن الجنطه بيده والايد الثانيه لازم بيها ايد قمر حتى يطمنها
أنت تقرأ
قمر خاتون
ChickLitتدور احداث القصة في العراق بغداد سنة 1942 نرجع الى هذه الحقبة الزمنيه لنسلط الضوء على التعايش بين فئات المجتمع ان ذاك في احد مناطق بغداد القديمة التي يسكنها العوائل اليهودية و المسلمة والمسيحيه كيف كان التعامل بينهم و ما هي التحديات والصعوبات التي ت...
