عيدكم مبارك
كل عام وانتو بالف خير متابعيني الاعزاء حبايبي
جدا اعتذر عالغياب والله مو بيدي جان عندي ظرف جدا قوي
نبلش ❤️
.......
الكل مجموعين بحفله عرس سميره اقارب ومعارف للعائله وتقريبا كل يهود بغداد الاعيان منهم حاضرين نسوان وزلم شباب وشابات كارمن تمشي وتوزع الشربت ساره ودانيال واكفين يستقبلون الضيوف و قمر كاعده بنهاية الاستقبال لوحدها متوتره وخايفه وتفكر بالي حيصير بعد هذه الحفله ودمعتها بعينها تقدمت ساره عليها ودنكت راسها عليها
ساره_ هذا وجه مال وحده فرحانه بعرس اختها ؟ لو كاعده بعزه ابتسمي شويه العالم دتباوع عليج وملاحظين عبوسج وقلقج عيب ميصير
قمر_ مو بيدي شسوي ؟
ساره_ ابتسمي وعدي هاليوم على خير وواثقي بيه مارح يصير شي غصبا عليج
قمر_ شتقصدين ؟ كوليلي شنو معنى كلامج
ساره_ صح اني معارضه ارتباطج بشريف بس هم اعارض ارتباطج غصب عنج وتعيشين ويه انسان متردي انتي بالاخير اختي الصغيره الاحبها بنتي واختي وصديقتي ثقي بيه قمر
ابتسمت ابتسامة امل وتفاؤول بكلام اختها ولزمت ايدها وعصرتها حيل تعبير عن الثقه والحب والامل ابتسمت ساره ومسحت على راسها وعافتها وراحت تستقبل الضيوف
كامت قمر من مكانها ترحب بالضيوف بأبتسامه خفيفه رقيقه وتمشت الى ماوصلت للحديقه بدت خطواتها تثكل وسرحت بأفكارها و بشريف تنهدت تنهيده عميقه بيها حب وحسره وخوف من الي جاي ماحست الا ايد تسحبها وتجرها فزت من صفنتها وباوعت
كارمن_ شبيج خفتي هاي اني
قمر_ فززتيني كارمن شكو
كارمن_ جريتج ماردت احد يشوفني واكفه يمج هسه قمر شريف ينظرج وره الباب
قمر فزت وصفت بوجه كارمن
كارمن_ مو وكت صفناتج اطلعي من وره ساج الياس ونصي راسج لين ماتوصلين للباب واني فتحت الباب وامنت كلشي لا تتأخرين بنتي
قمر_ ماعرف شكلج كارمن ماعرف
حضنتها وركضت على سور الياس نصت راسها ومشت بخطوات حذره وطلعت من الباب رفعت نفسها ولكت بوجهه شريف
جر ايدها ومشو سريع فاتو بدربونه ضيقه ووكفو واحد مقابيل الثاني وهيه تباوع بعيونه وتبجي وهو يباوع بنظرات شوق وحب و الم تنهد ولزم ايدها
شريف_ قمر ما رح اتخلى عنج انتي الي ماتصيرين لغيري
قمر_ مستحيل شريف اهلي كلهم معارضين ولو تعرف شنو صار ويايه وشسوو بيه
شريف_ اعرف كلشي ولهذا اليوم اجيت
قمر_شريف حيزوجني لواحد واتفقو خلاص
شريف_ قمر تحبيني ؟
قمر_ بعد كل هذا تسأل هالسؤال !
شريف_ جاوبيني
قمر_ اي احبك وماريد اتزوج شخص ثاني غيرك
تنهد وعصر ايدها
شريف_ امشي خلي نروح منا هاي فرصتنا
قمر_ وين نروح ؟
شريف_ نطلع لاي مكان محد يعرفنه بي ونتزوج ونعيش غصبا عن عقائدهم و تقاليدهم و مصالحهم امشي قمر
قمر_ لا شريف شلون اعوف اهلي ماكدر واذا لكونه حيكتلونه اثنينه حنموت شريف
شريف_ نموت سوه ولا نعيش ميتين واحد بعيد عن الثاني
قمر زادت ببجيها متعرف شنو تختار اهلها لو حب حياتها
قمر_ قرري هسه قمر
......
اسحاق نزل من غرفته وبده يستقبل المعازيم لكن بفكر شارد بكلام عبد الرحمن وتهديده معقول اخسر كلشي ؟ زين اذا وافقت وطلعت وين اروح والمن ؟ واعوف المكان الي نولدت وعشت كل حياتي بي ؟ وين اروح وشرح يصير بقائي خطر و رحيلي صعب شنو اختار من بينهم
ضل غركان بهذه الافكار وهو بنص العالم وكأنه هو بعالم والناس بعالم ثاني
......
عبد الرحمن كاعد بالحديقه يشرب الجاي ويه زوجته وبنتهم كوثر
عبد الرحمن _ ها بابا كوثر شخبار دراستج ؟
كوثر_ الحمدلله ماشيه بابا صح صعبه بس بنتك كدها
عبدالرحمن_ عفيه عفيه ببنت ابوها
فات نزار راجع من شغله
نزار_ يابه السلام عليكم شهالمه الحلوه صبيلي جاي فتحيه خانم من ايدج الي تنكط عسل
فتحيه_ فدوه رحتلك يمه مو تدلل
لزمت القوري وبدت تصب جاي بالاستكان وعيونها غوركت بالدموع لحد ما غرك الجاي الاستكان
فز نزار وصاح
نزار_ يمه يمه دير بالج
فتحيه_ اعذروني اني صاعده لغرفتي ارتاح
كامت فتحيه وهيه تبجي تنهد نزار وكامت وراها كوثر وعبد الرحمن بقى بملامح بارده يكمل شرب الجاي
نزار_ يابه امي حيل متأذيه على فراك شريف
عبد الرحمن _ حيرجع مضل شي ويجيني مثل الجلب يطلب سماحي ومتندم على الي سواه
نزار_ شكو يابه اكو شي جديد صار ؟
عبد الرحمن _ بابا ذوله الناس امهم وابوهم دينهم و ايمانهم الفلس من تصير السالفه بيها فلوس يليعون اخوهم واني متأكد البنيه هيه بعد متريده وحيرجع مكسىور جناح يطلب العفو والسماح
نزار_ يابه كلشي مدا افتهم بس عندي ثقه بالي تسوي ويارب يرجع النه ويرجع لعقله
عبدالرحمن_ يرجع غصبا ما عليه وين يروح اذا الكل تخلى عنه هههههههههه
.....
بيت اسحاق اجوي اهل العريس وفاتو بزفه جبيره وركص وهوسات وجانت سميره كلش فرحانه وطايره واكفه بصفها ساره وتصفك وتغني بأبتسامه عريضه اجى وكف اسحاق يمهم سلم العروس لعريسها واخذوها ومشو
.........
يتبع
أنت تقرأ
قمر خاتون
Romanzi rosa / ChickLitتدور احداث القصة في العراق بغداد سنة 1942 نرجع الى هذه الحقبة الزمنيه لنسلط الضوء على التعايش بين فئات المجتمع ان ذاك في احد مناطق بغداد القديمة التي يسكنها العوائل اليهودية و المسلمة والمسيحيه كيف كان التعامل بينهم و ما هي التحديات والصعوبات التي ت...
