الساعه تقريبا 4 العصر واكفه قمر امام مرايتها تكمل لمساتها الاخيره لتعديل تسريحتها و المكياج البسيط جدا لابسه فستان لونه بنفسجي فاتح بأكمام طويله مخصر من فوك و منفوش عليه نقشات ورد صغيره جدا بالوان الابيض
دخلت كارمن عليها وضلت صافنه عليها ومبتسمه
قمر شافتها بأنعكاس مرايتها وابتسمت الها واندارت عليها استداره سريعه حيويه ولزمتها من جافها
قمر_ ها شنو رأيج بالفستان والتسريحه
كارمن_ انتي جميله وكلشي يلوك الج بس ..
قمر_بس شنو ؟
كارمن _ ابوج يعرف ليوين رح اروحين وعليمن ؟
قمر_ كتله اكو حفله مسويها بيت وحده من صديقاتي وحابة اروح
كارمن _ يعرف منو ؟
قمر_ شبيج يمعوده ليش هيج ادققين ؟
كارمن_ تعرفين ابوج يخاف عليكم هوايه وميخليكم او يتحفظ على تعرفكم على ناس من غير دينكم وعقيدتكم فلذلك اسألج وقلقه عليج !!
قمر_ من شنو قلقه تره اني مو صغيره حتى بكلمتين الواحد يضحك عليه ويخليني اترك ديني اطمئني اني يهوديه حعيش واموت يهوديه .. شوفي اخذنا الوكت واحنه نحجي رح اتأخر على كوثر عيب يلا يلا خلي اكمل تجهيز نفسي واطلع الها
الساعه 6 ونص مسائا في بيت عبد الرحمن بدو الناس الس عازميهم تجي و بدو يسوون تجمعات وحلقات كل حلقة تتناقش بموضوع معين سياسه اقتصاد فن الى اخره
وكف شريف يم مجموعه من الناس وبدو يتكلمون عن الاحداث الي دا تصير بالبلد
احد الحضور _ احنه مشكلتنه في بلد مينطي مجال لحرية الرأي ولا الواحد يعبر عن افكاره وتطلعاته ولا يكدر ينتقد
شريف_ صحيح لحد هسه مدا اكدر انسى الوثبه والي صار بالوثبه و المجزره الصارت والشهداء الي ترست دجلة كله علمود شنو علمود ناس طلعت اطالب بلقمه خبز كتلها الجوع يعني لو تموت من الجوع لو تموت برصاص الحكومه اي عدالة هاي تقبل
احد الحضور_ هوايه صار لغط بهاي المظاهره وناس كالت الشيوعين المهم يد وهمه الي خربو وناس تكول مالهم دخل طلعو بس يطالبون بحقوهم و اختلطت علينه الاوراق مندري وين الحقيقه
شريف_ ولنفرض الشيوعين طلعو همه زين همه مو من ضمن هذا الشعب مطاليبهم مو لهذا الشعب الكادح الفقير المضطهد
احد الحضور _ هاي شنو شريف بس لا تطلع شيوعي
شريف _ ههههههههههه اني انسان احب وطني واحب شعبه و ما اقبل على الظلم بعد شتريد تسميني سميني
بهالاثناء وكف متبسمر بمكانه وعيونه مركزه على مكان محدد و مندهش ويكول معقوله شنو هالصدفه هيه لو لا اي هيه البنيه الي بالمكتبه منو هاي وشجابها اول مره اشوفها ويه منو جايه منو يعرفها
قمر واكفه بنظرات حايره وخجوله زادت من جراءتها تقدم كوثر عليها وسلامها الحار
كوثر_ انتظرج بس متوقعت تجين كلش فرحانه اجيتي
قمر_ لا شلون ما اجي بالعكس اصلا جنت كلش حابة اجي واتعرف عليج اكثر واحضر هنا
كوثر_ تعالي نكعد اجى هذا الولد المطرب الجديد اسمه ناظم الغزالي صوته كلش حلو رح يعجبج تعالي خلي نسمعه سوه
كعدو كوثر و قمر ويه باقي الموجودين وطلع عليهم المطرب ناظم الغزالي و بده بموال طرب اذان قمر وسحبها لعالم ثاني قطع طربها و اندماجها نظرتها العابره على شريف فزت ورجعت باوعت من جديد تتأكد الي شافته صح هو نفسه لو غيره منو هذا وشعنده هنا وليش هيج عندي فضول اعرفه وليش گلبي رجف من شافه قطعت افكارها همسه من كوثر بأذنها _ هذا شريف اخويه انحرجت قمر من ملاحظه كوثر لنظراتها ونزلت راسها بخجل بس ماكدرت تسيطر على عيونها ورجعت تباوع من جديد على شريف وشريف كذالك الاثنين سرحو بعالم ثاني على انغام واغاني ناظم الغزالي كأنهم يعرفون بعض من زمان لا كأنما يعرفون بعض من عالم ثاني من زمن ثاني همه الاثنين جانو مألوفين لبعض شنو هالشعور الغريب السريع الي تمكن من الاثنين
صحو اثنائي على تصفيق الجمهور بأنتهاء ناظم
تقدم شريف على كوثر وقمر كوثر عرفت عن اخوها كدام قمر وكذالك عرفت عن قمر كدام شريف
يتبع ..
أنت تقرأ
قمر خاتون
Chick-Litتدور احداث القصة في العراق بغداد سنة 1942 نرجع الى هذه الحقبة الزمنيه لنسلط الضوء على التعايش بين فئات المجتمع ان ذاك في احد مناطق بغداد القديمة التي يسكنها العوائل اليهودية و المسلمة والمسيحيه كيف كان التعامل بينهم و ما هي التحديات والصعوبات التي ت...
