قبل ما نبداو اي واحد راح ينقل الحكاية ما يلوم غير روحو اذا لقيتو مبارطاجيها عندو ، الواتباد يمد لكل كاتب حقوق الطبع و النشر سما مكالاه ترفدوا تعب الناس بلا اذن ؛ ممنوع نقل الكرونيك
حبست الكار و هبطت هازة كابتها فيدها ؛ كملت تمشي غايسة حتى قربت توصل للبلاصة لي كبرت فيها و عاشت فيها رغم الخايب لي فيها بصح تحبها .... عشيرة الفارسي ولا خلي نقولو امبراطورية اسسها عبد الماجد قبل واحد المئة سنة ؛ كان انسان معروف بالعدل و الكرم و حكم عشرين سنة تخلدت فتاريخ العشيرة و لليوم يضربو المثل بيه فعشيرته شعبه عمره ما عاش ظلم او فقر بالعكس عاشو فرفاهية و كانوا يحبوه بزاف ؛ وقت مات عبد الماجد خلى الحكم تاعو لوليده الوحيد يحيى و هو صغير لي هو تاني عرف يسير الحكم لمدة ستين سنة صح ماشي كيما باباه بصح شعبه عمرهم ما اشتكاو من حاجة و وقت كبر و شد الفراش هو بدوره سلم الحكم لوليدو الكبير صابر و موراها مات يحيى
نرجعو لاميرتنا لي حطت كابتها فوق الارض تستنشق فالهواء هادي قمرة اسم على مسمى طفلة بشرتها بيضة حليب و شعرها شاتان كلار طويل و رطب حرير ... عينيها نوازات و كبار المهم دات حقها من الزين و كتر وقت دخلت لعشيرتها قاصدة دارهم قاعدة تشوف فالناس يتهامسو عليها بارسكو معرفوهاش و لا عيون الرجال لي كلاوها طبطبت و ستنات شوية حتى تفتح الباب ؛ يماها لي شهقت وقت شافتها و سوطات عنقتها
نورة : يا عمري وقتاش جيتي
قمرة : ههه خليني ندخل قبل
دخلو و قعدو فالصالون
نورة : وقتاش جيتي يا عمري
قمرة : هداوين لحقت ماما
نورة : توحشتك يا بنتي
قمرة : حتى انا يا روحي و كامل واش عندي
نورة : تعرفي ريحي خلي نروح نشوف عند فاطمة تسلفلي نروح نقضي شوية نطيبلك حاجة تحبيها
قمرة : اخااه ماما وعلاش انا برانية الجود من الموجود لي طيبتيه ناكله
نورة : كاين غير الخبز يا بنتي
قمرة : لهاد الدرجة يعني
نورة : امممم ... بصح تعرفي قمرة قالك بلي وليد الاغا صابر ربي يرحمو هو لي راح يحكم موراه و النساء لي هنا كامل حكاو على كرمه و اخلاقه
قمرة : نتمنى ... انا جبت معايا شوية دراهم من المدينة راح تكفينا باش نصرفو
نورة : تاخدي رايي بنتي خليك من الخدمة هادي واشمن فايدة تروحي تمسحي وسخ الناس خليك هنا مكفاوكش 3 سنين بعيدة عليا
قمرة : تهناي مراحش نرجع حاوزوني من الخدمة
نورة : الحمد لله .... اههه بصح وعلاش حاوزوك
قمرة : حكاية طويلة ماما منبعد و نحكيهالك خليني نهبط نشريلكم كاش حاجات تاكلوها قوليلي رؤيا راهي تقرى
نورة : ايه قريب تخرج
قمرة : مالا نجيبها فطريقي
نورة : و منين تعرفي المسيد
قمرة : ساهل نسقسي
نورة : يعيشك بنتي البسي حاجة مستورة و غطيلي وجهك
قمرة : وووه وعلاش
نورة : يا بنتي هنا ماشي كيما المدينة لي هنا كامل ساترين روحهم و غير عينيهم لي يبانو
قمرة : بصح راني مستورة
نورة : علبالي بصح هنا ماشي موالفين بالسروال و الحكايات هادو
قمرة : انا مستحيل نلبس هكا ماما خلي انا منبعد نعدل لبستي كيما نحب
نورة : صحا معليش انا نمدلك روبا طويلة من عندي و حطيلي شال على الاقل على راسك راكي تعرفي باباك و ....
قمرة : متزيديش تجبديلي عليه هداك ميستاهلش اسم اب كامل
نورة : قمرة هو يظل باباك
قمرة : الراجل لي يقعد يضرب بناته و مرته و يسبهم مراهوش اب و لا بالاصل ماشي راجل و دوكا هاتي شال خليني نخرج تغميت
مدتلها يماها واحد الروبة طويلة و حطت شال على راسها و خرجت ؛ لحقت للمارشي لي كان قدام دارهم و راحت تشري ... شرات و نوعت من كل حاجة على تدويرة راسها تشوف فواحد يبيع التوت و عينيها ولاو قلوبة راحت تجري عندو
قمرة : صباح الخير خويا بقداش التوت
👨 : ب ○○○
شهقت و قالتلو
قمرة : راك تبيع فالذهب نتا
👨 : شوفي حبيتي تشري اشري ولا روحي اصلا قعدت الباطة لخرى و هذا مايشروهش لي كيما حنا
عوجت فمها مراهيش حابة تشريه باش توفر دراهم بصح تشهاته
قمرة : نشريه عليك بنص سومة
👨 : ههه ضحكي
قمرة : قالولك كلون هيا خف حطو فساشي تسرق عيني عينك و تزيد تشرك ففمك
👨 : نتي ما .... اههه يا اغا مرحبا بيك شرفتنا تفضل
هبط الشال هذاك و قعدت تمروح بيه و وقت سمعت صوته حست لحمها قشعر
اسلام : بشحال التوت
👨 : حاشا يا اغا هذا من حقك ماشي من حقي
اسلام : قتلك شحال
👨 : يا اغا كي جيت و شريت من عندنا برك تكفي و توفي
فتحت فمها على وسعو و هي تشوف فيه يحطه فساشي زربت جبدته
قمرة : هذا تاعي اناااا
👨 : احشمي يا طفلة
قمرة : قتلك تاعي كيفاش تمدو لغيري
👨 : اسكتي الاغا اولى
قمرة : ميهمنيش الاغا تاعكم انا نسحق التوت تاعي
نطق واحد ملور كان واقف مع اسلام
💂♂️ : حابة على روحك اليوم اترصي و عرفي كيفاش تهدري
زيرة على يدها مكرزة و دارت ليه راح تخبطو و شدلها يدها مزير عليها
💂♂️ : وين تربيتي نتي ؛ من لبستك باينة تربيتك اصلا
قمرة : مزال منزادش لي يهدر معايا هكا
دورتلو يدو لي كان شادها بيها حتى عيط و رماتو فالارض جا راح يدخل واحد اخر شدو اسلام بيدو ؛ وقتها دارت و جات عينها فعينو شعرة و جات راح تغيس فيه منبعد دارت للي يبيع
قمرة : بطلت مراحش نشري عليك و تهنى مراحش تربح على حبات التوت هادو
هبطت رفدت الساشيات و تسقم فشعرها لي قاعد يطيح
اسلام : حبسي
دارت ليه عاقدة حواجبها
اسلام : هاكي اديه تزيد تحكمك الحمى عليه
قمرة : الحمد لله شابعة كرشي و مراحش نمرض على جال الماكلة كولو و شبع منو
راحت تمشي و تاكل فروحها و هو تبسم و دار للي كان واقف قدامه
اسلام : عرفلي هادي شكون
💂♂️ : حاضر
حبوباتي خليولي عنوان واحد اخر ملقيتش واحد مليح و نحب وقت نرجع فنهاية الشهر ان شاء الله باش نكملها نلقاها طلعت ؛ و لي قالولي حطيها دوكا سمحولي منقدرش عندي ظروف سووو ملتقانا عن قريب ان شاء الله 💜
أنت تقرأ
عشيرة الاغا _ باللهجة الجزائرية _
Romanceحكايتنا هاد المرة غير ؛ فيها نوع من الخيال تحكي على عشيرة الفارسي و ابطالها هما قمرة و اسلام و الباقي تعرفوه فالحكاية ملاحظة : الكرونيك من تأليفي و هي خيالية لا علاقة لها بالواقع
