زياد : وشبيك هبلتي
سمرة : سمحلي مسية ماشي بلعاني 😒
خرجت و هو تقلق زير على التليفون لي فيدو قريب ما كسرو
......
غير حطت يدها على الباص ، الباب تفتح و خرج اسلام و قمرة
قمرة : ماما خير !!
لورين : خير كنت جاية نعيطلكم كي طولتو
قمرة : امممم
لورين : راكي مليحة دوكا
اسلام : راهي مليحة و بزاف ماشي هكا
قمرة : ههه ايه
لورين : ايه مالا نهبطوا نشربوا القهوة كيف كيف
هبطت لورين و هوما خزروا فبعضهم يتبسموا و هبطوا
......
و هكذا جازوا اليامات نهار يجيب نهار حتى لحق نهار العرس تاع سيبال و الياس النهار لي راح تبدا فيه حكايتهم ؛ يا درا كيفاش
حبست طونوبيل قدام القصر ؛ هبطت قمرة خوها و والديها و واحد من الحراس لي تما راح يطلع لي فاليز .... اليوم باش رجعت قمرة لدارها هي و عايلتها و اسيا و سمرة كانوا جاو صباح بكري باش يعاونوا فالتحضيرات .... راحو لجهة الباب وين لقاو عايلتهم تستنى فيهم سلمو عليهم و دخلوا
تبسمت و هي تشوف فالقصر مالغري كامل المشاكل لي عاشتهم هنا بصح البلاصة هادي تعزها بزاف ؛ شافت لميس جاية تصطنع فالضحكة سلمت على عمها و لورين و وقت لحقت لقمرة نطقت قمرة
قمرة : اوووه لميس توحشتك ... وشبيك ياك مزالنا صحاب
لميس : اههه ايه
تبسمتلها قمر تبسيمة صفراء و عنقتها و طلعت ديراكت لشمبرتها سقمت الحوايج لي راح تلبسهم ... شوية و سمعت الدقديق تبسمت كي عرفتو بلي هو
قمرة : انعم
تفتح الباب و دخل يتبسم معاها
قمرة : اسلام
اسلام : نعرف اسمي علبالك
راح عنظها باسلها راسها و هي تتبسم
اسلام : كيفاش صبحتي
قمرة : رانب فرحانة كي وليت
اسلام : هممم
قمرة : ايه موريتلكش واش راح نلبس ... شوف شابة
اسلام : تهبل كيما مولاتها
قمرة : يا عمري يا عمري من وقتاش لسانك ولا عسل هكذا ، باين عندك ما تمعشقت مع البنات
اسلام : خلي البير بغطاه
قمرة : ههه هكذا
تبسم و جبدها من نيفها
اسلام : قمر انا نخليك بارسكو يسحقوني لتحت و كيما وصيتك بلاكي تاكلي برك و متقعديش وحدك بزاف
قمرة : حاضر يا اغا
خرج و هي رفدت المكياج تاعها بدات تماكيي
........
سمرة : ايه دنيها شوية لهيك
كانوا برا مع لي جاو يديرو لاديكو يتعاونو باش يكملوا اخر لمسات فالجنينة ؛ و بحكم الجنينة طل على الدخلة تاع القصر سمرة شافت زياد و هو مدخل معاه حياة لي ضاربة الحطة و المكياج و داخلة معاه و لورين راحت ستقبلتها و ترحب بيها
أنت تقرأ
عشيرة الاغا _ باللهجة الجزائرية _
Romanceحكايتنا هاد المرة غير ؛ فيها نوع من الخيال تحكي على عشيرة الفارسي و ابطالها هما قمرة و اسلام و الباقي تعرفوه فالحكاية ملاحظة : الكرونيك من تأليفي و هي خيالية لا علاقة لها بالواقع
