راحت عندو شدتلو وجهو بزوج يديها
عائشة : قتلك اصبر يماك مراحش تخليك تخسر دير فيا كونفيونص اسلام راح نحطموه و لميس راح تكون غير ليك
الياس : ههه مشفتيش لميس كيفاش تولي كي تشوف اسلام عمرها ما خزرت فيا ... و اسلام مراحش يطلقها مدام وصية باباه كانت يرجع الارض لي تكتبت على لميس
عائشة : ههه لميس حكايتها محلولة هو اصلا معينوش فيها و اذا .... دخلت مراة واحد اخرى وسطهم راح تتخلط
الياس : اسلام ميديرهاش
عائشة : يديرها مدامني حية و نفكرك
........
دخلو حطولهم العشاء فالمجلس و هوما يسربيولهم نطق اسلام
اسلام : غدوة ان شاء الله راح تتعاود قوانين العشيرة و نتا شيخ صادق راح تعلنهم للشعب
👳♂️ : حاضر يا اغا
حطوا الماكلة و بداو ياكلو لي تما ؛ رفد اسلام و غير حط المغرفة ففمه حبس شحال منبعد كمل ياكل
.......
نور : اففف عييت المعازيم لي فالقصر بزااف
سلوى : ايه هادي هي واش تحبي هما يعيشو و حنا نخدمو كل واحد واش كتبله ربي
نور : ايه شفتي النساء لي جاو الذهب و الحوايج لي لبسوهم يهبلو يا ختي متمنية تكون عندي روبة برك كيما تاعهم
سلوى : اقعدي تمناي هادوك كامل من العائلات الحاكمة تاع العشيرات الاخرى لي تلقايها مرت الاغا و لي خته و لي بنته بصح حنا غير خدامات ..... هادي وشبيها ساكتة ايي نتي
دارت قمرة ليهم بعدما كملت قلات لي فيدها
قمرة : خير ان شاء الله
سلوى : حسبتلنا عقونة
قمرة : صدعتولي راسي ؛ اسكتو خيرلكم
عوجت فمها و قمرة مسحت يدها و راحت عند العجوزة ؛ دخلت بية
بية : يا بنات ارواحوا تتعشاو
قمرة : مدام بية نقدر نخرج كملت كلش و من صبح راني هنا
سلوى : و شكون يعاونا فالغسيل
قمرة : خدمتي كانت نطيب ماشي نغسل و مدخليش روحك
بية : خلاص يا بنات ؛ قمرة استناي العشاء و موراها راح تاخذه خلاصكم باش تروحو
دارتلها براسها ايه و بية خرجت متبعينها البنات ؛ و قمرة راحت شدت كرسي فالكوزينة قعدت نور ترددت تهدر معاها منبعد راحت ليها
نور : مراحش جي تتعشاي
قمرة : لالا
نور : وعلاش تكوني جعتي مصبح و نتي هكاك
قمرة : انا مناكلش فضلة الناس
سكتت نور حشمانة هبطت راسها و خرجت
قمرة : ما فهمتش الكرامة تاع الخدامين هادو وين راحت ؛ كيفاش يقدرو ياكلو واش خلاو الاخرين مفهمتش
قعدت تخزر فالسماء و مرة مرة تدلك كتفها لي وجعها من الضرب شوية هكذا و جات وحدة من البنات عيطتلها باش يروحو يديو خلاصهم
......
اناهيد : لميس هاكي هاد السنسلة ان شاء الله تعجبك
لميس : اههه طاطا مارسي حشمتيني
اناهيد : لازم تشكري اسلام هو لي جابهالك
لميس : صح
اناهيد : ايه
تبسمت لميس و خزرت فيماها لي ضحكت معاها ؛ شافت بصحباتها بغرور تاع شوفو واش جابلي و عائشة ضحكت باستهزاء
ليندة : بصحتك لميس
لميس : يعيشك طاطا ... بيلي قوليلي عجباتك
خزرت فيها بيلسان بتعجرف و هدرت فوق قلبها
بيلسان : اممم شابة ..... انا سمحولي نطلع لشمبرتي عييت بزاف اليوم
تبسمت لميس و بيلسان خرجت تمسح فدموعها و طلعت لشمبرتها
......
دخلو الخدامات و تستفو فصف واحد
اناهيد : يعطيكم الصحة يا بنات على خدمتكم
رفدت سلة كانت فيها رزمات تاع دراهم و راحت عندهم هوما هبطو راسهم و هي قعدت جوز بالوحدة عليهم تمدلهم فحقهم
قمرة غير دورت راسها لقات هند تخزر فيها من الفوق للتحت طلعت حاجبها و دارتلها براسها واش و هند معجبهاش الحال كي دارت هكاك ؛ دورت راسها وقت لحقت اناهيد عندها كانت وحدها لي مطلعة راسها و حاطة يديها على صدرها تقول راهي مع صاحبتها ماشي مع يمات الاغا تبسمت اناهيد
اناهيد : نتي جديدة
قمرة : ايه
اناهيد : اسمك
قمرة : قمرة
اناهيد : و وعلاش لبستك مراهيش كيما الخدم
قمرة : جيت لهنا نطيب ماشي نستعرض حوايجي
هند طلعت حواجبها و لي تما تشوكاو من الطريقة لي تهدر فيها معاها ؛ اناهيد تبسمت و حمحمت
اناهيد : يعني خدامة مؤقتة
قمرة : اممم
اناهيد : لي هنا كامل عجبتهم ماكلتك اذا حبيتي نقول لبية تشدلك بلاصة هنا
قمرة : نتشكرك بصح منقدرش نقبل
اناهيد : وعلاش
سكتو وقت دخل اسلام
اناهيد : يا اغا كملتو المراسيم
اسلام : ايه
دار للخدامات و قاللهم
اسلام : شكون فيكم لي طيبت العشا تاع اليوم
اناهيد : قمرة
خزر فيها
اسلام : من اليوم نتي لي راح تستلمي طياب تاع القصر
اناهيد : سبحان الله هذا واش كنت نقول بصح مراهيش قابلة
هذا هو البارت ان شاء الله يكون عجبكم خليولي ارائكم فالتعليقات و اقتراحاتكم شجعوني باش نولي نحطلكم يوميا التفاعل راهو ميت كامل
و الى الملتقى ان شاء الله في بارت اخر 💚💚
أنت تقرأ
عشيرة الاغا _ باللهجة الجزائرية _
Romanceحكايتنا هاد المرة غير ؛ فيها نوع من الخيال تحكي على عشيرة الفارسي و ابطالها هما قمرة و اسلام و الباقي تعرفوه فالحكاية ملاحظة : الكرونيك من تأليفي و هي خيالية لا علاقة لها بالواقع
