عشيرة الاغا _ باللهجة الجزائرية _

الحلقة 45

قمرة ( عيطت ) : نتا واش ؛ نتا واااش .... متكذبش و تبرر الغلطة تاعك كنان فهمت

كانت راح تكمل هدرتها جات عينها الفوق لقات اسلام يتكيف و يخزر فيهم من البالكون

قمرة : انا لازم نطلع

دخلت حاسة روحها مقلقة ملي صرا وقت لحقت للبالكون رمات عينها ليه شافتو وقت دارلها بيدو ارواحي دارتلو انا دارلها ايه .... ترددت منبعد خرجت

قمرة : انعم

تقلقت وقت قعد ساكت يتكيف شوية و قاللها

اسلام : وعلاش صوتك كان يتسمع من تحت
قمرة : محسيتش لروحي كي عيطت
اسلام : وعلاش
قمرة : نفعلت برك
اسلام : وعلاش نفعلتي
قمرة : تقلقت برك
اسلام : راكي تستفزي فيا
قمرة : بارسكو سؤال تاعك ستفزني تقدر تسقسي ديراكت

ضحك من كثرة ما تقلق و هي دارتلو براسها واش

قمرة : مدام ما كاين والو انا نروح تصبح بخير

وقت لحقت للباب نطق و هي حبست

اسلام : يعني لبارح وقت قلتي راكي عيانة و محبيتيش تخرجي من شمبرتك كان علجال كنان على هاديك هداك نهار سقسيتيني عليه

فتحت عينيها و فركت يديها منبعد دارت

قمرة : مفهمتش كيفاش درت الحكاية هادي
اسلام : كي شفتكم لتحت .... باين عليكم تعرفوا بعضكم
قمرة : لالا هداوين تعرفنا

طلع حواجبوا و تبسم

اسلام : مليح .... تعارفتو دوكا و شدلك وجهك غدوة واش يديرلك
قمرة : .... بيني و بينو حاجة متخصكش وليد عمي ..... اذا كملت راح نروح

وقت ما ريبونداش دورت راسها راح تخرج حتى حست بيه تجبد عندو مزير على فكها

قمرة : واش تسحق
اسلام : واش كاين بينك و بينو
قمرة : والو قتلك منعرفوش
اسلام : متتقعديش بيا ***** لي يشوفكم يعرف بلي تعرفوا بعضكم مليح
قمرة : متخسرش الهدرة معايا هادي واحد ؛ زوج نعرفو ولا منعرفوش حاجة متخصكش معندك حتى حق و يا لوكان صغير باش تسقسيني مراك لا بابا لا خويا ولا عاقد عليا و كونك وليد عمي و الاغا ميخليكش دخل روحك عندك ختك و الفيونسي تاعك حوس عليهم

زير عليها كثر حتى توجعت

قمرة : اطلقني
اسلام : كي تهدري منبعد ساهل
قمرة : قتلك ماكاين والو بيناتنا
اسلام : حبسي الكذب
قمرة : .... اسلام اطلقني وجعتلي وجهي

طلقها و مسح على شعرو و طلعت صبعها و بدات تعيط

قمرة : اخر مرة تهدر معايا هكاك اخر مرة تجبدني هكاك و اخر مرة تطيح قدامي فهمت
اسلام : واش راح ديري قولي

هبطلها صبعها و قاللها

اسلام : اخر مرة تعيطي عليا و اخر مرة ترفعي صبعك عليا لليوم راكي شفتي غير اسلام المليح
قمرة : تحترمني نحترمك تخسر معايا نخسر معاك انا حياتي كامل عايشة indépendante مكالاه جي تفرض السيطرة تاعك عليا و اتلهى بالفيونسي تاعك خير وقت هي تهدر مع الرجال متشوفهاش و جاي تحاسب فيا
اسلام : مكالاه دخلي لميس فكل حاجة
قمرة : يا عيني على الاغا لي ميحبش على خطيبته

دنات وجهها لوذنو و قالتلو

قمرة : الخاتم وين حطيتو فيد لميس صح ... مالا تحكم فيها هي ... بلاك تزيد دخل روحك فحياتي
اسلام : صبري عندو حدود قمر متخلينيش ندير حاجة متعجبكش اقعدي عاقلة خيرلك و مكالاه تلعبيها شاطرة بارسكو غير نتي لي تخرجي خاسرة

خزرت فيه بتحدي و راحت

صباح جديد :

حبست الطونوبيل تاعه قدام القصر و دخل

بيلسان : الياس

عنقته

بيلسان : وين كنت حوسنا عليك بزاف
الياس : رحت قعدت عند صاحبي ... قوليلي يما وين راهي
بيلسان : .... ماما .... مكانشها
الياس : وين راحت
بيلسان : بابا راح يطلقها
الياس : كيفاش ... وقتاش هادي
بيلسان : ماما هربت واحد كان حابسوا الاغا و بابا قال للاغا يخليه هو يعاقبها و هو حاوزها و قال بلي راح يطلقها
الياس : كيفاش !! جامي صرات حاجة فهاد الدار مكانش موراها الاغا
بيلسان : هو مكان ما دخلوا

راح يعيط حتى خرجوا لي فالدار

الياس : اسلااااام وين راك .....  اسلاااااااام

.......

هبط نواظروا و طلع راسو حتى تفتح الباب

اسلام : خيير
الياس : و راك تسقسي نتا صح متحشمش كيفاش عطاك قلبك تفرق دار
اسلام : راك كبير و تقدر تفهم جابلي ربي ، يماك راهي تخلص فالغلطات تاعها ... لعقوبة ليك
الياس : دبر راسك كيفاش ترجع يما لهنا فهمت
اسلام : باين عليا بزاف بلي نسمع لهدرتك

تغزل من البرود لي كان يهدر بيه خبط الكرسي و طلع صبعو

الياس : متخلينيش ندير حاجات مراحش يعجبوك
اسلام : دير شكون راهو مانعك
....
فايزة : الياس اخرج
الياس : راح نجيب يما و راح نرجعها لدارها
اسلام : اذا قدرت دخلها دخلها معليش

خرج و فايزة حطت يدها على راسها

فايزة : هذا لي خصها
اسلام : هااا عمتي مدام جيتي لهنا تروحي تعيطي ليما و عمي فوزي و مرته و لميس يستناوني فالصالون دوك نجي
فايزة : خير ان شاء الله
اسلام : عمتي مدام قلت لميهم معنتها كي نهبط و نحكي
فايزة : ايه واش عليه

.....

خرجت و صهيب دخل ؛ رجع نواظرو و قاله

اسلام : صهيب
صهيب : يا اغا عيطتلي
اسلام : هداك كنان لي جبته
صهيب : خير كشما دار !!!
اسلام : تقولو بلي عندو ساعة فيدو يكون خرج من العشيرة راهو محاوز
صهيب : وعلااش !!
اسلام : كاين حاجات لازم يتبعهم بصح واقيلا معلمتهملوش صهيب
صهيب : سمحلي يا اغا
اسلام : مكان مدخلك نتا

دنا الكرسي و خرج

   يتبع 💚💚 .....