عشيرة الاغا _ باللهجة الجزائرية _

الحلقة 49 و 50

قمرة : دار يماك بزااف ملاح ، ماشي كيما فاميلة باباك
اسلام : البنادم ميقدرش يخير عايلته malheureusement
قمرة : صح .... ايه مقتليش كيفاش حتى جبتني لهنا
اسلام : هكا جاتني في راسي نجيبك لهنا جبتك
قمرة : يعني كيما تحب
اسلام : نتي كنتي قالبة وجهك عليا سما علبالي مام نقولك اذا جي تعانديني

تبسمت و هو كان مركز مع كاسه

قمرة : وعلاش راك تهدر معايا و مراكش تخزر فيا
اسلام : حابة نخزر فيك ؟؟
قمرة : بارسكو موالف كي تهدر تخزر فعينين البنادم غير اذا راك مزعف منو

وقت شافتو ساكت عضت على شواربها منبعد قالتلو

قمرة : ايه مقتليش كيفاش جبتني و محسيتش هي صح نعاسي ثقيل بصح ماشي لهاد الدرجة
اسلام : نتي كيما الكوالا و انا واش نديرلك
قمرة : لالا بصح جاتني بيزار كيفاش رقدت الوقت هداك كامل بلا ما نحس

شرب من كاسه و تفكر الصباح وقت دخلت سلوى لعندو

Flash back *** :  

اسلام : سلوى هاكي هاد الدواء حطي زوج قطرات منو فالماكلة لي تاكل منها قمر
سلوى : اههه كيفاا ....
اسلام : خير سلوى مفهمتينيش
سلوى : اههه لالا سمحلي يا اغا ... كيما تحب راح ندير

End of flash back ***

اسلام : وعلاش راكي تحوسي وقيلا حبيتي تقعدي تما
قمرة : ...... سمعت بلي خليت كنان
اسلام : ..... خممت و لقيت بلي مكانش لازم نحاوزوا هكاك
قمرة : اممم .... درت زينة العقل فرحتني

دارلها براسو ايه و كمل يشرب ؛ غمضت عينيها منبعد حمحمت

قمرة : احممم .... انا نخليك باين بلي راك حاب تقعد وحدك .... تصبح بخير

وقت مريبونداش زيرت على صباعتيها و ناضت حستو صح زعفان منها مور واش دارت .... تبسمت وقت سمعت اسمها

اسلام : قمر

دارت تتبسم متلهفة لواش راح يقول ... رجعت وين كانت

قمرة : انعم
اسلام : .... سقسيتيني منقبل وعلاش كنت نحوس نفهم حكايتك مع كنان هداك النهار
قمرة : اممم
اسلام : ......... بارسكو ... نتي تهميني بزاف ..... و اي حاجة عليك نحب نعرفها

جمدت فبلاصتها و قلبها بدا يخبط ..... خزر فيها بعينين مذبالين

اسلام : مديلي حل باش نحبس ما نخمم فيك و نحوس عليك

فتحت عينيها و قاعدة ترمش فيهم ... تبسم و قاللها

اسلام : وشبيه لسانك الطويل تربط

هبطت راسها تفرك فيديها ؛ وجهها رجع حمر راح يطرطق

اسلام: جاتك الحشمة دوكا
قمرة : وعلاش قالولك وجهي مقزدر
اسلام : بارسكو جامي شفتك حشمتي هكا