اسلام : مزالك مع حكاية ماريا
قمرة : انا رايي باين مالاول قلتهالك و نعاودهالك منسحقش وحدة كانت تجمعكم relation من قبل ... تحترم رايي نحترمك و نحطك فوق عيني غير هكذا منقدرش
خزر فيها شحال عينيه كانوا يقدحو نار و هي خزرت فيه ببرود رجع خبط الباب و خرج
قمرة : اديها معاك خير اففف
سقمت مخدتها و رقدت
.........
صباح جديد :
حاطة راسها على التاقة حتى تسمع الباب
هند : ادخل
.....
دخلت قمرة غالقة موراها الباب
قمرة : صباح الخير
هند : صباح الخير .... ايه خير ما جابك ؟؟
قمرة : جيت نشوف اذا رجعتي تسيي تنتاحري ولا لالا
هند : لالا ماشي دايمن راح تكوني معايا
تبسمتلها و قالتلها
قمرة : مدام راكي مليحة انا نخليك
جات راح تخرج حبستها هند
هند : قمرة
قمرة : ... انعم
هند : يعطيك الصحة على واش درتي معايا
قمرة : ما درت حتى حاجة تسحق تتشكريني عليها 😊
هند : يعني فالاخر مالغري لسانك طويل بزاف بصح خرجتي مليحة
قمرة : مليح كي شفتي حاجة مليحة فيا
هند : ههه ... بصح رجعتي عاقلة ماشي كيما كنتي وين راه لسانك
قمرة : مزالو مزالو بصح مخلياتو للناس الصح يعني صح كنت نزيد فيها بالهدرة معاكم بصح جامي لحقت و اذيت واحد فيكم و فالاخر شفتي واش صرالي وصلت للموت
هند : يعني رجعتي تخافي
قمرة : لالا منخافش بصح لقيت بلي الناس لي هنا ميستاهلوش نكسر راسي معاهم
هند : ايه
قمرة : و ننصحك ديري نفس العفسة مع عماد بارسكو اذا قعدتي هكذا راح تمرضي و لي فالدار راح يعرفو
هند : اممم ....... كاين واحد حب يجي يخطبني ... بصح رفضت زعما غلطت
قمرة : ... شوفي هند لازم تقوي شخصيتك ... حياتك متخلاصش عند بنادم نعرف مليح واش معنتها يخذلك واحد تحبيه بصح الدنيا راهي تمشي و ديري فراسك بلي ربي راهو مخبيلك الانسان الصح ليك على هادي ماشي على جال عماد تحبسي حياتك فالوقت لي هو راهو عايش حياتو ..... انا لوكان جيت فبلاصتك نقبل نديرو شوفة و نشوفو اذا عجبني و عجبتو نتخطبو ياك مراحش تتزوجو اصلا الخطبة مدايرة باش تتعارفوا بلاك تلقايه مليح عقليتو هايلة بلاك ينسيك فلي فات بصح منقبلش باش ننسى لي قبلو فهمتي اذا قبلتي اقبلي بارسكو حابة تبداي حكاية جديدة ماشي باش تنساي حكاية قديمة
هند : .... عندك الحق راح نخمم
دوروا راسهم على صوت العياط لي جاهم من تحت
هند : واش صرا
قمرة : ما نعرف
هبطوا يلقاو عائشة خارجة مع الياس و محرز و بيلسان تبكي المهم الصالون ما يتسمع منو غير البكاء و الهدرة
أنت تقرأ
عشيرة الاغا _ باللهجة الجزائرية _
Romanceحكايتنا هاد المرة غير ؛ فيها نوع من الخيال تحكي على عشيرة الفارسي و ابطالها هما قمرة و اسلام و الباقي تعرفوه فالحكاية ملاحظة : الكرونيك من تأليفي و هي خيالية لا علاقة لها بالواقع
