عشيرة الاغا _ باللهجة الجزائرية _

الحلقة 57

اناهيد : هكا خير ..... قمرة بعدي عليه قدما تقدري تعيشي بارسكو راح تزيدو تغرقوا كثر ... لي هنا مراحش يخليوكم راح تتعذبي بزااف .... هو بلاك ما يصرالو والو بصح نتي المشاكل لي راح يجوزوا عليك بزاف راح يقدرو يقتلوك نورمال هنا العادات قبل كلش و مدام لميس تكتبت على اسلام لي هنا ميتهناوش حتى يتزوجها ..... وقت ديسيداو يزوجوا ليندة لصابر انا مت و حييت عيطت بكيت حللتهم بصح بلا فايدة زوجوهالو و وعدوني يكون زواج على ورق برك باش يرفد بنت عمه برك بصح فالاخر جاب منها زوج بنات و انا مكانش عندي الحق نهدر على هادي بعدي خير ما يصراولكم مشاكل كثر
قمرة : فهمت ... و متقلقيش روحك مكاين والو و مراحش يكون .... سمحيلي نروح
اناهيد : اممم

وقت لحقت للباب نطقت اناهيد

اناهيد : تمنيت لوكان تلاقيتو فوقت و بلاصة واحد اخرى كانت خير ....

فتحت الباب و خرجت حاسة قلبها يوجع مالغري لي قالته صح ، شافت اسيا تعيطلها

اسيا : قمرة ارواحي ارواحي راهم جابو لكباش للعشاء ( تاع الياس )

دارتلها براسها ايه و راحت لشمبرتها ؛ قعدت فوق البونك تخمم فهدرة اناهيد حتى اندق الباب و دخلت سيبال لي كانت باينة فرحانة

قمرة : سيبال
سيبال : قمرة راني فرحانة ... علبالك الياس قالي بلي راح يخرجني اليوم
قمرة : صح ، مليح بزاف فرحتيني
سيبال : راني ميتة بالفرحة علبالك
قمرة : ههه و واش راكي ديري هنا روحي وجدي روحك
سيبال : هههه ايه عندك الحق

خرجت سيبال و قمرة تنهدت و خرجت وقت لحقت قدام الشمبرة تاع هند سمعت صوتها و هي تبكي قلبت عينيها

قمرة : و هادي متحبسش دوكا

فتحت الباب و دخلت عليها ديراكت حتى تلقاها تبلع فواحد الدواء فتحت و راحت ليها

قمرة : هبلتي !!!
هند : روحي خليني

جبدتها من يدها مدخلتها للدوش ، جبدتلها صباعتيها و دخلتهم في فمها و هي تفرفط بين يديها و تقيات ( حشاكم ) وقتها عاونتها تغسل و خرجتها للبونك تاعها

قمرة : نتي رحتي فيها مبقاش فيك عقل ... كيفاش تسيي تقتلي روحك

هبطت راسها و طاحو دموعها

هند : 3 سنين ... 3 سنين و حنا كيف كيف فالاخر يديرلي هكذا وعلاش واش درتلو
قمرة : ... جوز  يامات و نتي نسيتي بصح متستاهلش تقتلي روحك هو راهو عايش حياتو نورمال علبالي ماشي ساهلة بصح تقدري عليها
هند : منقدرش و انا مقابلتو صباح و عشية 😭
قمرة : افففف حبسي متندبي دوكا

خزرت فيها كيفاش تبكي و تشهق شدتها معنقتها

قمرة : خلاص اسكتي دوكا واحد كيما هداك ميستاهلش تبكي عليه

قعدت غير تبكي حتى رقدت وقت حست عليها رقدت سقمتها فبلاصتها منبعد وقفت مترددة

قمرة : واش راح يكون عندها يعني

فتحت كامل القجاور نحات منهم الدواوات و المقص و خرجت رماتهم و رجعت لشمبرتها

قمرة : الناس هبلوا دوكا ولاو يقتلوا روحهم شغل النفس هادي ماشي عزيزة تتتت

راحت للتاقة لقات باباها و عمومها ولاد عمها يذبحوا فالكباش لي جابوهم و معاهم البنات يتفرجوا تبسمت و رجعت الريدو متكية وجهها على الحيط و بداو يسيلو دموعها حاسة روحها مغمومة و قلبها راح يطرطق ؛ شوية و مسحت دموعها و قاعدة تستغفر حتى اندق الباب

قمرة : انعم
سلوى : مدموزال كاين واحد حاب يشوفك اسمه كمال
قمرة : ...... خليه يدخل للصالون دوك نجي

دلكت راسها مغمضة عينيها مخصهاش مشاكل كثر ، رجعت شعرها للور و هبطت

.....

غي شافها تبسم و راح عندها

قمرة : حدك حد روحك ريح بلاصتك

الابتسامة لي كانت فوجهو راحت و رجع لبلاصته

قمرة : خير واش تسحق
كمال : قمرة تعيشي عاونيني .... راني مسحق دراهم و نوعدك وقت يكونوا عندي راح نرجعهملك
قمرة : ايه مليح .... البارح برك كنتو تحاوزوا فيا و اليوم قمرة عرفتوها كي سحقيتو دراهم
كمال : علبالي غلطت معاك بزاف .... بصح صدقيني قمرة حالتنا راهي تشف نسحقك تسلفيلي برك ملقيت حتى واحد يعاوني الله يخليك
قمرة : مراح نمدلك والو انسى راك تفهم مراحش ننسى لي درتو فيا و كيفاش دورتو عليا ظهركم
كمال : قمرة تعيشي .... اذا ماشي على جالنا على جال رؤيا من نهار رحتي و دراهم خدمتك راحو حالتنا ولات تقهر .... رؤيا حبست المسيد .... عندنا يامات و حنا عايشين غير على الماء و الخبز اليابس .... جيت قصدت منى بصح محوستش تفهم و ردتني تعيشي عاونينا
قمرة : يا حرااااس خرجوه منا منسحقش نشوفو

خرجوه و هو يعيط حمدت ربي لي ما كان حتى واحد كامل راهم مشغولين مع الذبيحة و الطياب سينون كانوا دارولها حكاية و هي مراهيش قادرة

قعدت مقابلة التاقة تتفرج فيهم يضحكو و يقسرو برا ؛ عينيها دمعو و خبطت يدها فالحيط

قمرة : انا كيفاش تخليت عليهم

خرجت لبرا و عيطت لواحد من الحراس

قمرة : ارواح هنا
💂‍♂️ : انعم مدموزال
قمرة : تروح تشوفلي دار كمال لي جا دوكا ... وقت يخرج من داره تقولي
💂‍♂️ : ايه و ....
قمرة : و قول للي معاك يجي يستناني دوك نجي
💂‍♂️ : حاضر مدموزال بصح لازم نعلمو الاغا بلي راح نخرجو
قمرة : متخلينيش نتبلى بيك و بالاغا تاعك ؛ اذا مراكش حاب الاغا يحاوزك دير واش قلت
💂‍♂️ : بصح
قمرة : منبعد انا نقولوا متخافش

تردد منبعد راح كي طرطقت فيه عينيها

   يتبع 💚💚💚 ....