عشيرة الاغا _ باللهجة الجزائرية _

الحلقة 60

خرجوا كامل يجريو مور صوت العياط لي سمعوه

غير لحقوا يلقاوها طايح فالارض و شايدها

لورين : قمرة ...... واشبيها بنتي .... ددد .. دم هذا منين
شاهين : اسلاام اهدر واش بيها
اسلام : صههههيب مزال ما لحقت لومبيلونص
صهيب : راهي دخلت يا اغا

حبست لومبيلونص و هبطو رفدوها ديراكت لسبيطار ؛ لي تما كانوا مشوكيين و لورين غير تعيط و اناهيد شادتها

فايزة : يا ربي الطفلة واش صرالها

.......

لحقت لومبيلونص للسبيطار وين كان اسلام معاها دخلوها ؛ شوية و كانوا لحقوا الاخرين ؛ لحق زياد موراهم و راح ليماه

زياد : يما وشبيها قمرة ... قالولي جابوها لهنا واش كاين
لورين : كانت تخرج فالدم مفهمنا  والو 😭

راح عند اسلام لي كان قاعد و داير يدو على راسو

زياد : واشبيها ياك كانت معاك ... اههههدر
اسلام : زياد روح اخطيني

دورو راسهم وقت خرج الطبيب

لورين : وشبيها بنتي دكتور ياك راهي مليحة
اسلام : واش صرالها ... الدم هداك ....
👨‍⚕️ : تسممت .... السم لي تمدلها قوي بزاف و يقتلها شوية بشوية على هادي فالاول متحسش بيه

الدم جمد فعروقهم لورين تصرعت و زياد معرف يعاون يماه ولا يمسح دموعو لي كانوا شلال

👨‍⚕️ : رانا نديرو فلي نقدرو عليه يا اغا

لسانو حسو ثقال هدر معاه بسيف

اسلام : هاد السم شحال يقعد باش يخليها تنصرع و تخرج الدم
👨‍⚕️ : على حساب من ربع ساعة حتى لنص ساعة

جبد روحو و خرج برا وين لقا صهيب واقف

صهيب : كيفاش راهي يا اغا
اسلام : .... تسممت
صهيب : كيفاش .... شكون قدر يديرها
اسلام : جو لي تسربا مور العشاء تروح تشوفلي شكون لي سرباتو .... و منحبش نشوفك حتى جيبها
صهيب : حاضر يا اغا

خرج صهيب و اسلام خرج برا متكي راسو على الحيط

.......

صهيب : بييية
بية : ... انعم مسيو
صهيب : تجمعيلي كامل البنات لي سرباو اليوم
بية : ايه

دخلو الخدامات و اسيا غير شافتو راحت تجري عندو

اسيا : قمرة واشبيها واش صرالها قولي راهي مليحة ياك ماشي قراف
صهيب : ...... صحبتك تسممت .... دعيلها تسلك على خير

طاحت فالارض مشوكية ؛ هبط عندها

صهيب : ماشي وقت البكا اسيا ... جيهان دي اسيا لشمبرتها

.....

صهيب : شكون لي سربات الجو هداك مور العشاء
بية : ..... وحدة اسمها فاطيمة
صهيب : روحي جيبيها
سمرة : ... هديك لي كانت دايرة نواظر .... هديك راحت قبل ما تبدا السهرة قالت بلي يماها مريضة ولازم تخرج
صهيب : بية جيبيلي منين جات هادي دوكا
بية : بصح ... نتا لي جبت البنات تاع اليوم يعني ...
صهيب ( عيط عليها ) : انا جبتهم و نتوما خدمتكم تديو المعلومات تاعهم
بية : بصح ... حنا كي جبتهم دخلناهم ديراكت و ....
صهيب ( زاد فصوتو كثر ) : تتقعدي بيا من وقتاش دخلوهم بلا ما تعرفوهم ..... مكان حتى تصويرة ليها ؟؟ 
سمرة : وعلاش عايشين معاها .... قصدي منين راح نجيبو تصويرتها
صهيب : اههه يا ربي .... يا حارس ارواح هنا
💂‍♂️ : انعم
صهيب : تبعتلهم امر يغلقو الدخلة للعشيرة ميخليو حتى واحد يخرج منها راك تفهم و تغلقو الطريق البحري تاني
💂‍♂️ : حاضر

خرج و رفد تليفون تاعو عيط لاسلام

صهيب : .... راح نلقاها غلقنا كامل الحدود واحد مراح يخرج
اسلام : كيفاش راح تلقاها تتقعد بيا **** من وقتاش ندخلو بنادم منعرفوهش للقصر  .... تتحمل مسؤولية لي صرا صهيب فهمت .... تبعت لحسان و تديلو زوج بنات من لي كانوا معاها باش يرسمها و التصويرة توجد قبل الصباح و تتحط فكل بلاصة و كوانة راك تفهم
صهيب : فهمتك يا اغا

.......

لورين : هادي كامل نتيا ... جيتي ليوم و شوفي واش درتي

ناضا لعائشة راح تجبدها من شعرها دخلت فايزة بيناتهم

فايزة : راكم فسبيطار هبلتو 
لورين : بعدي من قدامي ...  نتي وحدة قتالة نتي هي سباب المشاكل بعدي
عائشة : روحي يا المهبولة وعلاش نمسلك بنتك البروبلام تاعي كان مع الاغا ماشي مع قمرة و جامي لا نلحق نقتل طفلة و انا عندي ولادي فحجري
لورين : امنتك

.....

اسلام : كل واحد يشد بلاصتو

صوتو لي جاهم ملور خلاهم يشدو بلايصهم

اسلام : الطفلة لي سربات السم هربت .... بصح راح تتلقى معندها وين تروح ..... بصح نتوما دعيو ميصرا والو لقمر .... لوكان تصرالها حاجة كل واحد كان عندو بروبلام معاها راح يتحاسب
فايزة : لالا نتا زدت فيها يا اغا
اسلام : وشبيك عمتي خافتي

عينيها تعمرو بالدموع و قالتلو

فايزة : راك تشك فيا .... مليح .... صح انا وياها صراولنا مشاكل كيف كيف بصح اذا نسيت راهي بنت خويا منقدرش ناذيها راك تفهم
اسلام : معندي كونفيونص فحتى واحد فيكم .... راح تندموا بزاف واحد واحد محال نجوز لي صرا ... م..حا..ل

قعدو هكاك لي يبكي يبكي و لي رقد رقد سوليع جازوا و مبان حتى خبر .... سوايع جازوا ثقاال عليهم شوية و يخرج الطبيب 

اسلام : كيفاش راهي
👨‍⚕️ : راهي مليحة دوكا كانت صعيبة بصح فاتت مرحلة الخطر دوكا

لورين عنقت زياد

لورين : الحمد لله
اناهيد : وقتاش نقدرو نشوفوها
👨‍⚕️ : الصباح كي تنوض تقدرو تشوفوها

راح الطبيب و اسلام دار ليهم

اسلام : واحد مراح يشوفها من غير والديها و خوها فهمتو
اناهيد : وعلاش
سيبال : ايه حابين نطمنو عليها
اسلام : جابلي ربي طمنكم الطبيب .... الشمبرة تاعها راح يوقفو قدامها احراس يعني مكالاه تعييو روحكم و تستناو
اناهيد : حتى انا 😔
اسلام : حتى نتي
فايزة : يا اغا راك زدت فيها متنساش بلي رانا عايلتها
اسلام : و متنسايش بلي لي دارها واحد منكم
فايزة : بلاك هاديك الخدامة بعتوها من برا وعلاش راك تشك فعايلتك
اسلام : بارسكو نعرفكم واش تسواو واحد واحد .... مديروش روحكم ملايكة دوكا و نتوما البارح برك كنتو تاكلو فلحمها

  يتبع 💚💚 .....