عشيرة الاغا _ باللهجة الجزائرية _

الحلقة 36

جبدها من فكها حسته تكسر بصح هكاك و قعدت واقفة متاثرتش كامل

اسلام : راسسسك انا لي نكسره و غرورك انا لي نحيه و لي درتيه تتحاسبي عليه
قمرة : فبلاصة مراك تهدر معايا و تحاسبني روح شوف لميس تاعك فهمت

خبطها على الحيط حست ظهرها تقسم ، رفد يديه يهدد فيها

اسلام : اخر مرة تهدري معايا هكا

........

قاعدة غايسة حتى دخلت لورين ؛ وقتها تفاطنت

لورين : كيفاش راكي دوكا
قمرة : مليحة

قعدو شحال منبعد ضحكوا

لورين : كيفاش قدرتي تقنعي سيرين
قمرة : ههه مكانتش حاجة صعيبة نقنع وحدة بهلولة كيما هي ... قدرت نجبدها بالهدرة و نخليها تعترف بلي دارته و فنفس الوقت سجلتها .... و مدامها تموت على سراج و تخاف تخسره هددتها بيه يا دير واش راني حابة يا التسجيل يلحق لسراج
لورين : و مخافتش تلحق الهدرة ليه مدام عترفت اليوم
قمرة : مام هي خممت هكا فالاول بصح مكانش كيفاش تلحقلوا راهم بعاد على بعضهم و لميس مراحش تهدر الهم لي راهي فيه يكفيها
لورين : logique ..... بصح خرجتي فحلة و درتيها يااه
قمرة : خسارة عليك ... ماشي انا لي نسكت على حقي
لورين : تستاهل قليلة التربية هداك النهار مخلاو معايروا فيك ؛ كان لازم ديري هكذا باش تنقي تصويرتك و تبراي روحك قدام الناس
قمرة : اممم

.....

تفتح الباب و دخل غالق موراه الباب ..... وقت شافتو رجفت جات راح تنوض من البونك تاعها حتى حبسها بيدو

اسلام : ريحي بلاصتك

شدت بلاصتها و هبطت راسها ؛ و هو راح للاكوافوز تاعها و تكا عليها

اسلام : وعلاش درتي هكاك
لميس : يا اغا ان ... انا ...
اسلام : جاوبي على حساب السؤال
لميس : بارسكو منحملهاش
اسلام : واااو ... سما انا كي منحملش بنادم نروح نديرله المشاكل و اول بنادم نبدا بيه باباك
لميس : نتا و بابا متتحاملوش بصح انا نكرهها
اسلام : واش دارتلك
لميس : وحدة متحشمش و ماشي مربية حتى الهدرة متعرفش تهدر و زيد مراهيش من مستوانا
اسلام : نتي شكون باش تقيمي تربية الناس
لميس : ههه لوكان جات مربية متقعدش قريبة لواحد خاطب
اسلام : و لوكان جيتي مربية مديريش واش درتي .... نهار على النهار راكي تزيدي طيحي من عيني و نهار على نهار راني نزيد نكوفيرمي بلي انا و نتي محال نتفاهمو

ناض عندها و هبط راسو عندها يهدر معاها و عينيه تشعل نار

اسلام : لي درتيه ممسكش غير نتي ولا هي ولا حتى العايلة لي درتيه ضر العشيرة كامل و بالدرجة الاولى ضرني انا بصفتي الاغا .... ماليوم راح تكوني بنت عمي برك

رجفت و قالتلو

لميس : واش تقصد
اسلام : جوز التبهديلة لي درتوها و راح نحبسوا الخطبة هادي و متقوليش راني نزيدلك فالوقت ولا مرانيش حاب يقولوا السبة لي فصلتهم هي البروبلام لي درتيه ... مديتلك شونص و نتي معرفتيش تستغليها
لميس : قول بلي درتها سبة باش نحبسوا
اسلام : انا مزال مهبلتش باش نخلي وحدة كيما نتي تربيلي ولادي فهمتي ..... و اهههه تفكرت اليوم العشية و قدامنا كامل راح تطلبي السماح من كبار العايلة واحد واحد و سورتو عمي شاهين و مرتو ولا ...
لميس : ولا
اسلام : ولا راح تتحاوزي من القصر و وقتها اذا حبوا داركم يخرجوا معاك يخرجوا
لميس : متقدرش ديرها
اسلام : القصر قصري و ندير لي يريحني ؛ كان لازم تخممي فيها قبل ما ديري لي درتيه

........

خرج و خبط موراه الباب و هو هابط قابلو صهيب طالع

اسلام : صهيب خير
صهيب : يا اغا هشام هجم الخدامين لي فالجبل
اسلام : وقتاش !!
صهيب : مقبيل برك و رانا بعتناهم للسبيطار
اسلام : حب يرد تاع مقبيل مليح .... روح قول للشيوخ بلي كاين اجتماع على عشر دقايق
صهيب : حاضر

.......

عماد : ياخو انا مفهمتش كيفاش حتى دارت هكذا الطفلة هبلت سمحلي بصح ختك لي كانت تبان حرشة بصح خرجت عاقلة
زياد : هديك لميس ... الله غالب جات مراة لوكان وريتلها كيفاش دير لختي هكاك
عماد : خليها على الاغا سوور دوك يبهدلها مراحش يجوز البروبلام لي دارته سورتو كي هشام هدر هكاك معاه بسبتها
زياد : ان شاء الله

دخلت سمرة للكوزينة لقاتهم واقفين

سمرة : كشما تحبو نحطلكم
عماد : اههه لالا متشقيش روحك
زياد : واحد مهدر معاك مكالاه دخلي روحك فهمتي

خرج و عماد لحقوا

عماد : وشبيك وعلاش هدرت مع الطفلة هكذا
زياد : منحملهاش كلما نشوفها نتفكر واش دارت هديك المراة
عماد : بصح هي مكان مدخلها بالعكس لوكان ماشي هي متعرفش بلي قمرة هي ختك
زياد : خلاص خلينا منها

........

بدر الدين : يا اغا حنا ما دابينا منلحقوهاش للحرب وين راح يسيل الدم بزاف مراناش حابين نضروا العشيرتين بالعكس مدابين العلاقات تكون مليحة متنساش بلي عشيرة هشام قوية تاني و راح نستفادوا منهم
سليمان : انا نخالفك الراي مدام لحق و هجم علينا لازم نعلنوا الحرب
صهيب : حنا واجدين لاي حاجة تامر بيها يا اغا
اسلام : انا نوافق بدر الدين ... الدم مراهوش الحل بصح لازم يتعاقب .... صهيب توجدلي عشرة من الجيش يروحوا معاك راح تتبعوا وليد هشام وين يروح و جيبوه لهنا .... وقتها هشام باش يرجع وليده راح يدفع تعويضات كبيرة للعشيرة و للخدامين سينون راح ناخدوا براي سليمان

يتبع 💚💚💚 .....