نور : قمرة كيفاش راكي تحسي فروحك
قمرة : راني مليحة
نور : كيفاش حتى تروحي تتدربي مع الجنود مفهمتش
قعدت ساكتة محبتش تريبونديلها
نور : .... اههه حقا وقت دخلك الاغا لي فالقصر كامل بداو يهدر ... حبيت نقولك برك باش توجدي روحك للي راح تسمعيه
قمرة : صح !!!
نور : امممم
دارت يدها على راسها تفكرت وقت رفدها غمضت عينيها مكانتش ناقصة مشاكل فوق راسها
قمرة : شحال راهي ساعة
نور : الربعة
قمرة : اههه لازم نروح نكمل العشاء
نور : بية قالت بلي فريدة راح تكمل
قمرة : لالا قوليلها دوك نجي راني مليحة
صونا تليفونها معرفتش نيميرو مريبونداتش وقت عاود رفدت
قمرة : الو شكون .... سراج !!
طلعت راسها لنور لي لقاتها تخزر فيها حابة تعرف عقدت حواجبها و دارتلها اخرجي خرجت
قمرة : واش تسحق
سراج : قمرة وين راكي قلبت عليك الدنيا ملقيتكش
قمرة : منين لقيت النيميرو تاع تاعي
سراج : من عند اسيا غفلتها و ديتلها تليفون ... قوليلي وين راكي حاب نهدرو
قمرة : معندي منهدر معاك و اذا شفتك قدامي صدقني راح ندمك و اهههه راح نرجع متتقلقش و وقت نرجع قول لسيرين تاعك راح تتحاسب على كامل واش دارت
كوباتلو و ناضت
قمرة : فسدلي نهاري بففف
......
وقت دخلت لقاتهم يهدرو و وقت شافوها قعدو يخزرو فيها قلبت عينيها و راحت طيب الحوت
سلوى : احممم سمعتو يا البنات واش راهم يديرو تاع دوكا ولاو يتغشاو و يلعبوها باش هكا يرفدوهم الرجال و ماشي اي راجل اكدولي على الاغا هههه
بداو يضحكو و نور معجبهاش الحال
نور : سلوى
سلوى : ههه وشبيك غير اجري على روحك نتيا شوفي كاش واحد
زيرت على يدها و دارت ليهم وقت شافوها سكتو و سلوى ربعت يديها
سلوى : اهههه قمرة عزيزتي وشبيك
قمرة : حابة نوريلك قمرة واش دير
سلوى : اههه واش بقى باش تزيدي ديريه بصح نستعرف بيك عندك واحد الكوراج تعرفي هنا كامل يخافو من مدام لميس و نتي دنيتي لحاجتها مرانيش حابة نخوفك بصح اذا حطتك فراسها تندمك
قمرة : تتت ملا مزال متعرفيش قمرة واش دير اذا حطت بنادم فراسها
دنات عندها
سلوى : واش دير
طرطقت تضحك هي و البنات حتى جبدتها قمرة من شعرها ملسقتلها راسها فالحيط جات وحدة تدافع عليها طبعتها
قمرة : اذا زدت سمعت صوتك راح ندمك صح فهمتيييي
خبطتلها راسها
قمرة : فهمتي ولا لالا
دخلت بيا تجري و تعيط
بية : قمررررة اطلقي الطفلة هبلتي قممممرة راني نهدر معاك
قمرة : فهمتي ولا لالا
سلوى : فففه ... فهممت
قمرة : مليح
طلقتها جابتها فالارض وقتها عيطت عليها بية
بية : قممممرة واش راكي حاسبة روحك لي درتيه راح يوصل لمدام اناهيد
قمرة : يوصل لمن حب مراني خايفة من حتى واحد
بية : امشي قدامي
........
عائشة : هههه علبالك راح نلعبو بزاف هاد المرة
الياس : ههه شاركينا باللعبة
عائشة : اوهوه اليوم القصر ناض و قعد ... شفت هديك الطفلة قمرة لي شتكات على الخدم رجعت
الياس : ايه شفتها
عائشة : ههه اليوم دخل الاغا و رافدها فيدو
الياس : صححح !!!
عائشة : ايه راح تنوض كبيرة بينه و بين لميس اليوم
الياس : هذا خبر يفرح بصح اسلام خرج واعر مستنيتش منو كامل هذا بصح مشكيتش تكون حاجة بيناتهم
عائشة : باينة مكانش عسيتهم يعني ميتهادرو ما والو و لي صرا صرا برك كي داخت قمرة
الياس : مالا وعلاش فرحتينا
عائشة : بصح هاد الحاجة مليحة .... اذا مرانيش غالطة راح تصرا تصرا حكاية بين اسلام و قمرة
الياس : واش لي يخليك متاكدة
عائشة : نعرف نميز مليح و قمرة طفلة بزاف شابة مكانش كيفاش ميخزرش فيها و زيد عندها كونفيونص بزاف فروحها كيما يحب اسلام بالضبط
الياس : و اذا مصراش كيما راكي حابة
عائشة : و حنا واش رانا نديرو هنا
الياس : متقوليليش معولة تقربيهم من بعضهم
عائشة : امممم و في راسي حاجة تكسر الحاجز لي بيناتهم و تخليهم يعرفو بعضهم مليح
الياس : لي هيا
.......
اناهيد : قممممرة هنا كاين قواعد ملازمش تتجاوزيها ممنوع تضربي ولا تمسي واحد هنا وين حاسبة روحك
قمرة : هي جابتها لروحها ... خلطت فيا و دات لي تستاهلو
اناهيد : كاينة بية هي المسؤولة عندك حاجة اشكيلها ليها
قمرة : منشكي لحتى واحد حقي نجيبو بيدي
دارت يدها على راسها و قالتلها
اناهيد : قمرة اسمعي مني اقعدي عاقلة مديريش المشاكل نتي الوحيدة لي راح تخسري
سكتت و قالتلها
قمرة : اذا كملتي مدام نقدر نخرج
اناهيد : اخرجي واش حبيتيني نقولك
هادو هوما حلقات اليوم ان شاء الله يكون عجبكم خليولي ارائكم فالتعليقات و الى الملتقى ان شاء الله في بارت اخر 💚💚
أنت تقرأ
عشيرة الاغا _ باللهجة الجزائرية _
Romansaحكايتنا هاد المرة غير ؛ فيها نوع من الخيال تحكي على عشيرة الفارسي و ابطالها هما قمرة و اسلام و الباقي تعرفوه فالحكاية ملاحظة : الكرونيك من تأليفي و هي خيالية لا علاقة لها بالواقع
