اناهيد : قممممرة هنا كاين قواعد ملازمش تتجاوزيها ممنوع تضربي ولا تمسي واحد هنا وين حاسبة روحك
قمرة : هي جابتها لروحها ... خلطت فيا و دات لي تستاهلو
اناهيد : كاينة بية هي المسؤولة عندك حاجة اشكيلها ليها
قمرة : منشكي لحتى واحد حقي نجيبو بيدي
دارت يدها على راسها و قالتلها
اناهيد : قمرة اسمعي مني اقعدي عاقلة مديريش المشاكل نتي الوحيدة لي راح تخسري
سكتت و قالتلها
قمرة : اذا كملتي مدام نقدر نخرج
اناهيد : اخرجي واش حبيتيني نقولك
خرجت و غلقت الباب حاسة روحها تغمت فالقصر هذا
قمرة : كملت
شافتها جاية ليها و عاقدة حواجبها
لميس : اوهوه راني نشوف فيك تحاييتي حسبتلنا متي مقبيل
قمرة : سمحولي فسدتلكم احلامكم
لميس : خليك من احلامنا و شوفي احلامك ماشي مليح تخزري بزاف الفوق تتلوى رقبتك
قمرة : وين تعرفي بلاك لي لفوق هوما لي راهم يخزرو
تبسمت تبسيمة مستفزة و لميس نطقت
لميس : واش قصدك
قمرة : على قد فهامتك يلحقلك قصدي
لميس : شوفي اسلام غير ...
قمرة : اهههه دقيقة دقيقة مدموزال هههه وقيلا فهمتي بلي راني نهدر على الاغا حاشا
لميس : على واش راكي تهدري مالا ؟
قمرة : اههه هادي نخليك تزيدي تخممي فيها كي تلقايها قوليلي
راحت و خلاتها عاقدة حواجبها
لميس : على واش كانت تهدر هاد المهبولة
......
للكاتبة you__chroniquedz
دخلت لشمبرتها تهدر وحدها
قمرة : : لي هنا كامل ماشي نورمال لي مهبول مهبول و لي حابس حابس الله يجيب الخير لوكان ماشي الدورو هداك منزيد دقيقة هنا
رفدت تليفونها عيطت لاسيا تقسر معاها حتى لحقت العشية خرجت تعشات و رجعت لشمبرتها ؛ دخلت لشمبرتها و شدت بلاصتها شوية هكا و دخلت نور هي تاني راحت لبونكها
بقات تتقلب من و من مجاهاش النعاس
قمرة : زعما لي فالدار راهم ملاح بففف حتى تليفون معندهمش باش نطمن عليهم ..... لازم نشري واحد نمدو لماما تخبيه
لبست فرجلها حاشاكم و ناضت ؛ خرجت لبرا شمت شوية هوا منبعد رجعت هي غير دخلت قابلها علي يتبسم
قمرة : نتا كاش مرة يتشلخ فمك من التبسيمات
علي : هكذا
جاوزته رايحة لشمبرتها عاود جبدها
علي : واش بيك هكذا متحبليناش .... تعرفي نعرف البنات لي كيما نتي يخزرو للفوق بزاف هنا يا قمرة الاغا يدي لي تليق بمقامه و انا و الناس لي كيما نتي نديو بعضنا بالمختصر الاغا راح يتمسخر بيك نهار و زج و يرميك
قمرة : شكون قالك اصلا بلي عيني فالاغا
علي : القصر كامل راهو يحكي
قمرة : نتوما صح متخلفين هذا عاوني كي دخت درتوها حكاية سمحولي بصح لازم تتطوروا شوية
علي : هنا مراكيش فالمدينة هذا تخمامنا حبيتي ولا كرهتي
قمرة : رايكم و تخمامكم ميهمنيش سورتو رايك نتا غير شدو عندو
دورت راسها رجع جبدها
علي : وين راكي رايحة ولا غير الاغا عندو الحق يدنى ليك
قمرة : بعد خير ما نلم عليك الناس
كان مزير على يديها لدرجة مقدرتش تبوجي
علي : واحد مراح يامنك
.....
اسلام : واااش كاين هنا
طلقها خايف وجهو رجع صفر
علي : يا اغا هي ... هي
اسلام : خماجكم منسحقوش فالقصر
علي : سمحلنا يا اغا
دور راسو راجع حتى نطقت
قمرة : واش قصدك بخماجكم
اسلام : اعرفي كيفاش تهدري معايا
قمرة : كونك اغا ميعطيكش الحق تهدر فبنات الناس و فشرفهم اذا نسييت عندك خواتاتك و خطيبتك فرقبتك
عقد حواجبو و علي هبط راسو ما لقى ما يهدر
اسلام : لي راكي تهدري عليهم متقدريش تقارني روحك بيهم
قمرة : انا منتقارنش يا اغا انا اشرف من الشرف و ماشي نتا لي راح جي توريلي
حكمها وجهها
اسلام : لسانك هذا اذا مسقمتيهش ....
قمرة : واش راح دير ؛ ماشي قمرة لي تسكت على حقها
اسلام : راح تترباي و راح تتعلمي تحكي ولا ميكونش اسمي اسلام .... يا حراااااس ارفدوها للحبس لي لتحت
فتحت عينيها من لي سمعته وقت لحقو عندها خزرت فيه بنظر تحدي و رجعت عينيها لعلي تخزر فيه بغل
رفدوها و رماوها فالحبس ؛ البلاصة هديك كانت باردة و مظلمة معمرة غبرة حست روحها عيات بزااف غمضت عينيها وقت هبطو دموعها لي عمرها ما بينتهم قدام واحد ؛ عاشت صغرها محقورة و حتى شبابها ما قدرت تكمل قرايتها ما عاشت فحنانة والديها ولا دلالهم نفس الحكاية تتعاود كل يوم الضرب و لحمها شاهد عليه خرجت تخدم صغيرة فليفاكونس لي معاها يخرجو يلعبو و هي تخرج تبيع و كي كبرت شوية رجعت تخدم على الناس .... غاضتها بزاف عمرها طفولتها كانت قاسية و حياتها كامل صعيبة ؛ محستش وقت رقدت حتى سمعت فالخبيط فالباب كانوا الحراس يستناوها تخرج ، خرجت حاسة ظهرها كامل مكسر مقدرتش ترجع للقصر فشدت طريقها للبلاصة لي دايمن تروحلها راس الجبل كانت تروحله بزاف مع يماها و كلما تزعف تروح تقعد تما
........
أنت تقرأ
عشيرة الاغا _ باللهجة الجزائرية _
Romanceحكايتنا هاد المرة غير ؛ فيها نوع من الخيال تحكي على عشيرة الفارسي و ابطالها هما قمرة و اسلام و الباقي تعرفوه فالحكاية ملاحظة : الكرونيك من تأليفي و هي خيالية لا علاقة لها بالواقع
