عشيرة الاغا _ باللهجة الجزائرية _

الحلقة 23

قمرة : اسيا يعني ... كيفاش حبيتي وحدة كانت تخدمهم وحدة كانوا يهينوها بين ليلة و نهار تولي بنتهم .... اذا الناس لي رباوني و كبروني تخلاو عليا بلخف و خلاوني كيفاش حبيتي يكونوا معايا الناس لي ميعرفونيش .... اليوم هوما راهم يديرو هكذا بارسكو متلهفين يرجعو بنتهم برك بصح مع اليامات مراحش نقدروا نوالفو بعضنا و راح يلقاو روحهم دايمن يميلو لبنتهم لي رباوها   .. صعيبة بزاف اسيا ... و انا مرانيش واجدة نزيد نعيش خيبة امل واحد اخرى ...... حابة بزاف نرجع للمدينة الدراهم لي راني نلم فيهم من الخدمة راح نجي نسيي نكري بيهم و نلقى خدمة تما هكذا خير ليا و ليهم
اسيا : زيدي خممي قمرة علبالي من داخلك راكي حابة تتقربي منهم نحي الخوف عليك علبالي راهم ناس غرباء عليك بصح توالفي .... انا نخليك لازم نخرج عندي خدمة
قمرة : وين رايحة تخدمي بالجمعة !!
اسيا : راني نروح نخدم مع واحد نساء يديرو العجين باش يبيعوه بارسكو ماما دوكا مراهمش يجيوها بزاف يخيطو عندها و الدراهم رجعوا ميكفيوناش
قمرة : وعلاش مقلتليش لوكان مديتلك
اسيا : نتي فهمك و انا نزيدلك
قمرة : خسارة عليك و انا الدراهم معندي ما ندير بيهم مكانش عليمن نصرف دوكا
اسيا : قمرة خليهم تحتاجيهم و زيد حابة بلاك تكري بيهم
قمرة : انا ساهل غدوة صباح نروح للابوست القريبة لهنا نبعتلك
اسيا : قلنا لالا متخلينيش نندم لي حكيتلك
قمرة : اسيا منبعد نعاودلك معلباليش شكون جا

دخلت نور تمروح

قمرة : وشبيك
نور : عييت القصر هذا متخلاصش فيه الخدمة
قمرة : و هديك المصفارة تاع سلوى راني نشوف فيها تطلق فلاطاي لتما و رامية لخدمة عليكم نتي و سمرة
نور : لالا هي تخدم مسكينة بصح ....
قمرة : مسكينة

رمات عليها المخدة

قمرة : تزيدي جي تشكي نكرفصك

وقت تفتحت الباب و دخلت منى سكتو ؛ قمرة كانت قاعدة مربعة رجليها و عاقدة حواجبها

منى : اخرجي

خرجت نور غالقة موراها الباب

قمرة : متعرفيش دقدقي الباب
منى : مكانش علبالي بلي كنتو تهدرو ........ قمرة راني حاسة بيك بارسكو رانا جايزين على نفس الحكاية و علبالي بلي ماما و بابا هما والديك بصح ... انا عشت معاهم حياتي كامل انا لي نعرفلهم و نعرف عيشتهم ..... متمنية تفهميني هما والفوني انا و رباوني انا حتى لوكان تكوني نتي بنتهم الحقانية بصح تبقى بلاصتي عندهم وحدها ....... من حقك تشوفيهم و من حقك تدي حقك منهم بصح نتمنى متدخليش بيناتنا انا معندي حتى واحد من غيرهم والديا الحقانيين مرانيش مستعرفة بيهم
قمرة : ههه راني حابة نعرف لوكان كنتي نتي بلاصتي و انا بلاصتك كنتي راح ترفضي العائلة الحاكمة ؟؟ ... مشكيتش بصح كي جاو نورة و كمال معندهم والو رفضتيهم
منى : معندها حتى علاقة
قمرة : اممم امنتك .... متخافيش انا مراحش ندخل بيناتكم اصلا ناوية نروح و مقعدش بزاف
منى : فرحتيني ... اذا حابة ترجعي للمدينة نقدر نعاونك
قمرة : نقدر نعاون روحي بروحي
منى : كيما تحبي

.......

لحق الليل و كامل كانوا فالصالون يقسرو و يوجدو للخطبة تاع سيبال و الياس

ناضت دوشت نشفت شعرها و لبست هكا

خرجت برا للجنينة و قاعدة دور و تشم فالهواء وقتها تلاقات باسلام جاي فالجهة المعاكسة ليها تبسمت بشوية كي لحق عندها قاللها

اسلام : راني نشوف فيك خرجتي ماشي موالفة
قمرة : اممم كرهت من الشمبرة

كملوا يمشيو حتى لحقوا قدام لاتراس لي طل على البحر

اسلام : ايه سافا شوية من الصباح
قمرة : ايه خير
اسلام : .... ان شاء الله تكوني ديتي لاريبونس تاعك اليوم
قمرة : على واش
اسلام : على والديك
قمرة : هما من الاول تخلاو عليا ماشي جديدة
اسلام : كي قلت والديك قصدت عمي و مرت عمي
قمرة : ......
اسلام : ماشي كشغل زدتي فيها راكي فشهر محبيتيش تبدلي رايك
قمرة : صعيب بزاف نبدل رايي
اسلام : بصح ماشي فحاجة تخص والديك مغاضوكش ... يماك كلما نجوز نلقاها تبكي
قمرة : عندهم منى واش تبدل
اسلام : تبدلوا بزاف حاجات الله غالب الواحد يحوس على دمه سورتو اذا كان وليده ..... راكم كامل كيف كيف ماشي غير نتي لي تقستي من الحكاية بلاك هما كثر واش الغلطة لي داروها باش راكي تحاسبي فيهم
قمرة : بصح ...
اسلام : ماشي كامل سبات لي راكي تمدي فيهم .... تعرفي ديفو لي فينا حنا  ... منعرفوش قيمة بنادم حتى تولي روطار ...... وقت مات بابا حسيت بلي صح الدنيا هادي والو و دوكا متمني نرجع يا لوكان نهار نعيشو معاه ... صح بلاك مكانش un père parfait  و الكمال لله على كل حال بصح انا بابا مكانش يتلهى بزاف بينا اذا تحبي الصح كان يحب الاغوية تاعه كثر ... بصح يقعد بابا حبيت ولا كرهت ..... و ان شاء متندميش نتي فوقت وين مراحش تنفع فيه الندامة

قلبت عينيها و حمحمت

قمرة : اههه خطيبة الاغا جات

دور راسو لقاها لميس جاية و باين عليها مقلقة

قمرة : يا اغا انا نخليكم
لميس : اه اسسسلام

زيرت على اسم اسلام شغل تبينلها بلي انا راني نقولو اسلام و راني قريبة ليه