ريمة : و نتي نسيتي بلي راهي خطيبتو دوكا
فازية : بينها و بينو مكان مدخلنا بصح قدام الناس تعيطلو يا اغا ( راهي جاية لي تعيطلو باسمو 😂 )
عائشة : نسيتي بلي مزال مراهوش اغا
فازية : هاك ولا هاك يبقى هو الاغا
نفخ مقلق من هدرتهم لي تتعاود كل يوم و ناض خارج ؛ لحقتو اناهيد
اناهيد : اسلام مكليت حتى حاجة
اسلام : شبعت يما
اناهيد : ايه .... اسلام عيش ولدي متقعدش تعامل لميس هكا و سورتو قدامهم راهي خطيبتك
اسلام : يما علبالك وعلاش خطبنا ... العلاقة هادي تاع مصلحة و وعلاش على جال الارض و هي فوق هذا قبلت تعرفيني نعيف هاد النوع لي يجيو لسقة ربي يغفر لبابا لي امر بهاد الخطبة
قاطعهم صهيب لي دخل
صهيب : يا اغا ... اسمحولي على المقاطعة بصح راهم يستناو فيك فالمجلس
اسلام : راني جاي
راحت اناهيد و هوما خرجو
اسلام : صهيب وجدلي لحفل التتويج هاد الويكاند
صهيب : امرك ... بصح ماشي قلت مزال الحال عليه
اسلام : بدلت رايي ، السكات هذا لي طاح ميبشرش بخير راهم موجدين لكاش حاجة على هاذي لازم نتوج باسرع وقت ايه و شددلي الحراسة على الحدود منحب حتى واحد يدخل ولا يخرج بلا علمي
صهيب : ايه .... حقا عرفتلك على هديك الطفلة
اسلام : شكون !!
صهيب : مولات التوت ... خرجت بنت نورة اذا تشفالها كانت تخدم هنا
اسلام : مرت كمال السوكارجي
صهيب : هي
اسلام : بصح ماشي كانت عندها طفلة صغيرة برك
صهيب : هادي قمرة الكبيرة كانت فالمدينة
اسلام : ايه
........
فاطمة : ايه يا نورة بنتك ولات قمر ما شاء الله عليها
نورة : شفتي رجعت نخاف عليها من العين
فاطمة : عندك الحق
قمرة : المهم خالتي تقدري توجديلي الروبات لي قتلك عليهم فاسرع وقت الحوايج لي جبتهم معايا على مقولة ماما ميتلبسوش هنا
فاطمة : من عيوني
قمرة : ايه و مكانش كاش خدمة هكذا ندبر بيها اموري و نعاون بيها دارنا
فاطمة : .... وليدي قال بلي سمع الاغا يقول بلي راح يدير حفل تتويج هاذ السمانة ننصحك روح للقصر وقت يعلنو باش تخدم فالتحضيرات صدقني دخل دراهم ملاح
قمرة : ايه فكرة و كيفاش نعرف
فاطمة : شوفي وقت يعلنو راح نبعتك مع وليدي يوصلك للقصر راهو يخدم عساس تما
قمرة : يعيشك فطووم
صباح جديد :
تفاطنت على صوت الباب ؛ خرجت من الشمبرة خزرت من و من ملقاتش يماها عرفتها راحت جيب الحليب طلت من التاقة لقاتها فاطمة حلت الباب
فاطمة : صباح الخير
قمرة : صباحو
فاطمة : جيت نقلك باش توجد روحك تروحي للقصر بارسكو البارح فليل بداو يخيرو فالخدم لي يوجدو للتحضيرات و تفضلي هاذ الروبا وجدتهالك باش تخرجي بيها اليوم
قمرة : يعيشك خالتي
دخلك للداخل لبستها كحلت عينيها دارت شوية روج من تاعها و رشت بارفانها خرجت تهبل عوجت فمها منبعد راحت لشمبرة يماها جبدت شال خفيف باج حطتو على راسها و خرجت
وقت خرجت لقات وليد فاطمة يستنى لي وقت شافها قعد يخزر فيها حتى حمحمت منبعد مشاو وصلت للقصر و دخلت مع الخدم ستناو شوية و جات فازية قسمتلهم الخدمة و مدت لقمرة هي لي توجد الماكلة مع واحد المراة كبيرة تما
👵 : واش اسمك يا حلوة انتي
قمرة : قمرة
👵 : ما شاء الله ؛ اسمعي اطلعي لشمبرة المؤونة الفوق جيبيلي الفرينة السميد و الزيت باش نوجد اليوم عجينة الشخشوخة ؛ و نتي عليك دير الحلو و المملحات
قمرة : ايه
طلعت تسقسي على الشمبرة هاديك حتى لحقت جبدت بيدون الزيت و رفدته تمشي بلعقل
قمرة : ايمااا كسرلي ظهري هذا زيت ولا .....
سكت وقت خبطت فحاجة حطت يدها على راسها و وقت طلعتو لقاتو اسلام لي عاقد حواجبو و يخزر فيها
حمحمت و دنات
قمرة : مقصدتش
اسلام : المرة الجاية شوفي قدامك .... واش جابك هنا
قمرة : جابوني رجليا ... قصدي جيت نعاون هنا فالتحضيرات
اسلام : اممم
هبطت للبيدون باش ترفدو و هو ربع يديه يخزر فيها كيفاش تتعافر معاه ؛ نفخ مقلق و عيط لواحد من الحراس لي كانو داخل القصر
اسلام : هبطلها واش تسحق
قال كلمته و راح ؛ تبسمت وقت جا الحارس نحالها البيدون و هبطو
قمرة : خرج بنادم مليح يعني
هبطت لتحت وين كانت العجوزة ؛ عاونتها و قاعدة تغسل فالمواعن لي تلمو حتى لحقت العشية ؛ و هي تغسل حتى دخلت لميس
لميس : وجدولي حاجات حلوة للسهرة راهم جايين عندي البنات
👵 : ايه مدام و تحبي حاجة اخرى
لميس : ايه ديريلي حاجة خفيفة للعشا راني ريجيم دوك نبعتلك نور ( خدامة ) تقولك واش كاين فالجدول تاع ماكلتي
👵 : حاضر
يتبع 💚💚💚 .....
أنت تقرأ
عشيرة الاغا _ باللهجة الجزائرية _
Romanceحكايتنا هاد المرة غير ؛ فيها نوع من الخيال تحكي على عشيرة الفارسي و ابطالها هما قمرة و اسلام و الباقي تعرفوه فالحكاية ملاحظة : الكرونيك من تأليفي و هي خيالية لا علاقة لها بالواقع
