علياء بحدة : لا تمثلين دور البراءة .. أدري أنه عندك ..
جود بنبرة : احترمي نفسك .. واخذي اختك وانقلعي من هنا ..
علياء حاطة يدها على خصرها : لا صار بيت اللي خلفك .. اطردينا منه ..
سارة شوي تصيح : يا أم خالد .. حلفنا لك أننا ما أخذنا شيء .. ولا قربنا صوب ملحقك ..
جود تكلم أمها : أمي لا تترجين هالأشكال .. ما تستاهل دمعتك ..
علياء عصبت من جود وراحت لها : هالأشكال تربيك .. وتربي أمثالك يا ....
علياء بتمسك يد جود .. لكن في يد قوية امسكتها واسحبتها لورى .. التفتت علياء .. شافت سلمى ووراها غادة .. بعدت سلمى علياء عن جود .. وصارت بينهم ..
سلمى بنبرة : ممكن أعرف وش عندك هالمرة ..
علياء تأشر على نفسها : أنا ما عندي شي .. لكن قولي لهم يرجعون اللي أخذوه ..
سلمى : وش ماخذين ..
علياء : سلسال ذهب ..
جود بحدة : تكذب ..
سلمى ارفعت يدها .. تسكت جود .. سلمى عيونها على علياء ..
سلمى : وش اللي مخليك متأكدة أنهم ماخذينه .. يمكن طايح منك في مكان وناسيته ..
علياء : أختي عبير شافت هذه ( تأشر على جود ) طالعة من ملحقنا ..
جود تدافع : وأنا وش يوديني عند ملحقك ..
علياء تقلدها : علشان تاخذين سلسالي ..
بدوا يتلاسنون .. وعلت أصواتهم .. سلمى اصرخت فيهم بقوة .. اسكتوا .. وظلوا مدة ساكتين ..
علياء : ونهايته ..
سلمى : تروحين أنت وأختك ملحقك .. وتدورين على سلسالك ..
علياء : قلت لك .. أختي شافتها طالعة من ملحقنا ..
سلمى رافعة حاجبها : مثل ما شافت هاني ..
علياء : هذه سالفة ثانية .. وانا متأكدة إن سلسالي عندهم ..
سارة تاشر بيدها : قدامك الملحق .. دوري .. وإذا لقيتيه .. ما لنا قعدة هنا بعد اليوم ..
سلمى : ما أحد راح يدور شيء ..
سارة بإصرار : خليها تدور .. أنا مصرة ..
سلمى تناظر سارة .. وذاكرتها ترجع ل 20 سنة ورى .. سارة افهمت نظرات سلمى .. ادمعت عينها .. ولفت وجهها عنها .. جود لاحظت التوتر اللي بين أمها وبين سلمى ..
علياء مكتفة يدينها : ماني طالعة من هنا إلا ومعي السلسال ..
جود : قدامك الملحق ولا تقصرين ..
قامت علياء تدور في الصالة وبعدين الغرف .. تعمدت تخلي غرفة جود أخر شي .. وهم وراها واقفين .. وما أحد لاحظ أن غادة كانت تناظرها وتبتسم .. ادخلت علياء غرفة جود .. وقعدت تفتش .. تفتح الأدراج .. والدولاب .. والتسريحة .. تحت السرير .. بين ملابسها .. ما لقت شي .. عصبت .. صارت تناظر أختها " وين حطيتيه " .. وعبير تأشر على الصندوق اللي تحت الملابس .. امسكته علياء .. جود اركضت بسرعة وأخذته منها .. علياء تناظرها بنص عين ..
جود : ما لك شغل فيه .. هذا في اغراض خاصة لي ..
علياء تبتسم بخبث : لا يا شيخة .. افتحيه ..
جود : أنت فتشت كل الغرفة وما لقيت شي ..
علياء عينها على الصندوق : باقي هذا ..
سارة تكلم جود : يمه خليها تشوفه ..
سلمى واقفة عند الباب .. ضايق نفسها .. تسترجع اللي صار .. يوم وفاة أمها .. نفس الموقف .. لكن مكان جود .. كانت سلمى في سن 7 سنوات ..
بعد تردد .. افتحت جود الصندوق .. واخذته منها علياء تدور فيه .. ما لقت سلسالها ..لقت ظرف فيه صور لسلمى .. اغتاظت أكثر .. ورمت الصندوق في الأرض .. جود نزلت بسرعة تجمع الصور قبل ما يشوفهم أحد .. تساعدها أختها .. علياء تناظر أختها بغضب .. " ما حصلته " .. عبير مو فاهمة شي .. هي بنفسها حطته في صندوق جود ..
انتبهت سلمى لغادة تنبها .. سلمى التفتت على علياء ..
سلمى مكتفة يدينها : ما لقيتيه ..
علياء بتوتر : يمكن حاطينه في مكان ثاني أو ...
قاطعتها سلمى بحدة : اسمعي علياء .. تراني زهقت من تمثيلياتك اللي تسوينها لنا بين كل فترة والثانية .. من الليلة البيت يتعذرك .. تشلين أغراضك أنت وأختك .. وتروحين لبيت أهلك ..
علياء بخوف : سلمى اسمعيني ..
سلمى التفتت بتروح : ما أبغى أسمع إلا صوت الباب وراك ..
