رفقـًـا

البارت السابع

دُرة:
چنت محضره الصدرية النيليه والقميص الابيض والشرايط والحذاء الابيض
متحمسه لاول يوم بالمدرسة
نمت وانه مسويه الملابس مرتبتهم ع اجزاء الجسم ونايمه بصفهم
گعدتني امي علمود نروح

: ماما سبحيني يلا بسرعه.. بسرعه واسحب بيدها

-يلاا تعاي وضلت تضحك

: ضحكت وياها وجلفتني جلف سوتني حمره طلعت من الحمام ومشطتني ولبستني وضليت افتر كلساع
اسألها حلو؟
وترد عليه تخبلين..

لبست عبايتها وطلعنه سوه رحنه للكراج
وخذينا سياره ورحنه للمدرسة
وضلت وياي مابچيت ردت ابچي هي عضتلي صبعها وحجت وشفت شفايفها شلون تحچي وافتهمتها..
اموتچ اذا بچيتي..
ضحكت ع وجها
وضليت منتبه ع امي مو على المعلمه
طلعت لكيت امي واكفه يم مره وتحجي وياها ولكيت يمها بنيه بگدي اتصاحبنا
جان اسمها جُمان ضلينا سوه ونروح ونرجع
وصارت يم منطقتنا نلعب
جنت احفظ املاء وانكتل من امي ومن تقريني النعال يمها بس مااجاوب تضرب النعال بالكاع وتخوفني واضل بس اضحك واخليها تضوج
جان بابا كلش حنين ومن يجي
كلنه نروح نحضنه ويحضن ماما تضل تدفع بي وتخجل من عدنا احنه بس نتمضحك انه واسيل..
واسيل كبرت ودخلت مدرسة من صرت رابع وصار السقوط مچنت افتهم

وسمعت اهلي ضلو يبجون شنو صار!! اتوفت عمتي امي ضلت تتذكر مواقفها وجنت اسألها ليش مانروح تكول ابوج مايقبل جنت امنيتي اشوفهم تسولفلي شلون جانو يحبوني من جنت صغيره..

راحت امي للسوگ وجابتلنه ملابس

_ تعالو ماما شوفو شجبتلكم

: اول وحده تقى ركضت لامي وبعدين انه واسيل ضلت تنطينا وتگول

_ يمه البنات عشره واگول گليلات وتضحك

: جا انتي مو تردين ولد سمعتج كلتي لخاله رغد باوعتلي وضحكت

_ انتم گلبي والله ماعندي غيركم اريد الكم
ولد حتى يصيرلكم سند ..

: ماحاجه ولد اسيل عدنا ولد وضليت اضحك
واسيل طكتني ع راسي

صرت خامس وصرت كبيرة واتحجبت واسيل تريد تتحجب وياي مشت الايام خلص الخامس

ابوي هم اجه مقهور يم امي وضلو مخبوصين ومايعرفون شيسون سمعت ابو ازاد مات انقهرت قهرة ع ازاد الي اتوفو اهله خطيه مشايفته انه وامي دائماً تسولفلي عنه وتسولفلي ع امه انقهرت فوك القهر من اتذكرت حجي امي ضليت من فطرتي ابجي وانه ماعرفه منو ولا اعرف اهله بس اتخيلت انه بمكانه شيصير بيه!
هو واخته ضليت اندعي الله ينطيهم الصبر ويعوضهم طفله ودعت ..

رحت للمدرسة وصديقتي جمان بقت وياي ماافترقنه ضلينه نمشي بالساحه واجت اسيل تركض وتبجي وشعره منفوش

اسيل: دررررره باااعي هاايييي شسوووت بوجههييي بااااعيييي

: سمعت حجيها وباوعت بوجها جرح بخدها
ركضت بخبال ع الجرحتها وسحبتها من شعرها وضليت اصرخ بوجها وهي سحبت شالي طلع شعري وجلبت بي