رفقـًـا

البارت الثاني

ضليت دايخه وبالكوه وصلت للبيت طبيت ورغد اتلگتني بضحكه

_ ياهلا ياهلا منوره امينوو شلونج تره البيت فاهي ومابي خير بدونج تغيبين فتره ٥ ساعات تختلف

: ضليت اباوع لحلكها ومركزه ع حرف الراء شلون تحجي راء عدل مثل ماكالته واتذكرت امي من جانت تضربني لان اكتب الراء واو لان حسب لفظي جان الاملاء اذا بي راء اخطأ بي وانكتل من امي بالنعال

_ يااا امينه شنو بيج شي؟؟ شبيج؟؟

: اكلج وغد انه شنو بيه؟

_ شبيج خير شكو؟

: انه بيه خلل؟

_ ياا شبيج كلشي مابيج جنج العافيه

: تدوين(تدرين) اليوم يلا نبهتني وحده ع وتله(رتله) لساني؟

صفنت بوجهي
_ ليش شسويتي؟ تره طبيعيه يعني مامبينه

: وحده اليوم حاجتني وضلت تحجي تكول خطيه ومدوي(مدري) شنو ضلت تمسلت ورحت لامي وكفت فوك راسها جانت تخيط للناس هي انتبهت وباوعتلي

_ خير؟ شعدج ليش هيج واكفه؟

: يمه ابوي ليش يسميني ام نص لسان؟

_ عود لان ماتلفظين حرف الراء

: وانه ليش مااالفظههههههه؟ ضليت اصيح وابجي

_ شبيج يمه شنو شصار اول مره تدرين؟

: تصدگين اول موه(مره)!
ضلت صافنه بوجهي مسحت دموعي ورجعن طلعن وكملت كلامي

..تصدگين عبالي شي عادي والكل هيج يلفظه ماعرفت ليش جنتي تكتليني لان اكتب الراء واو ولحد هسه من اكتبه اكتبه واو وامسحه اتذكر كتلج ليش تكتليني هيج مغفله انه يمممه هيج مافهمت ليش جانو يضحكون علي عبالي يعرفون كتل ابوي عبالي يعرفون وضليت ابجي

_ يمه والله زايدج جمال والله العظيم تخبلين صوتج يخبل والرتله زايدتله جمال والله حلوه شبيج ماتصدگين؟

: اي مااصدك انه طول عمري مااشوفني حلوه وهسه صار عندي عيب مستحيل اشوف روحي حلوه بعد لاتجذبيييين علييي لاتجذبييين وطلعت اركض وابجي للغرفه وضليت اغيب من المعهد اخير شي رحت بعد صياح وكتل من ابوي داومت وحسيت الناس كلها تباوعلي مع انو محد يباوعلي بس انه اتخيل ومرت اول سنه

بديت ثاني سنه وصارت بعد بس سنتين وابدي ادرس اطفال جنت متخوفه انه طفله شلون ادرس اطفال؟
ورغد تلعب وي الجهال المنطقه

رشة الطارمه وشم الحايط عندي عشق عشق اروح لغير عالم يعني عندي استعداد اضل ساعه اغسل بس طارمه
لبست شالي وفتحت شويه من الباب وطلعت نص جسمي ارش بالباب حتى يصير بارد و يلعبون بي الجهال يكسرون خاطري بالشمس اجه طفل ضل يباوعلي ويضحك ضحكت بوجهه