حكاوى «romantic »

خلف باب أعزب

-يلا يا أسماء شهلى شوية فى السجادة دى متاخدش معايا خمس دقايق
=طب ما تيجى تعمليها أنتِ يا ماما...لا والله بجد...الواحد لو مستعبد كنتوا هترحموه
-سمعتك علفكرا وجيالك
=بس الحمدلله أخيرًا خلصت
-أخيرا كفارة يختى...أيدك معايا بقا فى الشبابيك أخر حاجة
=يوووه
-بتقولى أيه
=بقول حاضر يا ماما بقول حاضر
بعد ما أتهديت فى البيت كله لوحدى سمعت تنهيدة ماما
-اااه أتهديت أوى النهاردة
=اه صح الخرطوم مسكتة بتتعب
-والله أوديكى لحسين الجزار يقطع حتة من لسانك الطويل ده
=أيه ده يا حجة...ده الراجل صاحب الشقة عنده حد تقريبا بينفض
-لا ده هو انا شوفته وانا بنشر...عينى عليه بيروق لوحده
=لا هو انا كمان مروقتش لوحدى
-يختى ده راجل يعنى تلاقيه فى شغله و بيطلع يروق ويطبخ لوحده...وتلاقيه هيقضى العيد لوحده
=السنة الجاية يقضيه معايا
-أختشى ياختى سمعاكِ
=ماشاء الله يا حجة فى قدراتك على السمع
"الله أكبر الله أكبر الله أكبر ...لا إله الا الله الله أكبر الله أكبر ولله الحمد"
=كده يا ماما متصحنيش أروح أصلى وأقوم وهما فى الركعة الأولى...حرام عليكِ والله يا حجة
-وانا مالى أنتِ خوم نوم ...تعالى ساعدينى فى ال...
=أساعدك اه...قصدك أعملى
-أعملى ساعدينى اى حاجة عاوزين ناكل
دخلت وعملنا الفتة اللى بتخش فى قلبى من جوا دى ولقيتها بتزوق صينية بأهتمام وأدتهالى.
=يا ماما هيفيد بأيه مش فى الأخر هناكلها
-لاء دى مش لينا ...دى للراجل اللى عايش لوحده ده ...للحق راجل
=يا ماما عشان صلحلك الحنفية وطلعلك الغسالة وفتح الباب اللى كان مقفول يبقى كويس
-أما انا خلفت عيلة جاحدة جحود...روحى يلا عشان الفتة متبردش

خبط على الباب كتير,لقيتة خارج بالمريلة و شكلة محتاس بصراحة,بصلى شوية وحط راسة فى الأرض كان باين أنه حد محترم
_فى حاجة يا أنسة
=ا...انا ...اه صح ماما بعتالك صينية الفتة دى وبتقولك كل سنة وأنت طيب والسنة الجاية أكون فى بيتك...أقصد تكون فى بيتنا بتتقدم...لالا يخربيتى
_أهدى يا أستاذة فى حاجة ...أجيب دكتور
=فيه ريحة شياط
_دى اللحمة!!
دخل بسرعة وسابنى على الباب,حطيت اللحمة ومشيت بسرعة من الكسفة..

-أيه يا أسماء أخدها
=حطيتها على السفرة وجيت
-وهو دخلك ليه مفيهوش أيد باخدها
=لا ماهو ملحقش ياخدها أصل الأكل اللى بيعمله أتحرق
-مسكين...البيت اللى مفيهوش ست ميبقاش ليه حياة كده
=صدق اللى قال البيت مفيهوش ست زى التليفون مفيهوش نت
-خلاص يا فنانة حسك الفكاهى فى الطالع...يلا كُلى وقوليلى فتة أمك عاملة أزاى
..........
_انا متشكر جدا على الفتة ...تسلم أيدك
-تسلملى يا حبيبى ده أنت زى أبنى...تعالى تعالى
=اى ده القمر هنا...أحم
بصلى كأنه أفتكر اللى حصل وغبائى النهاردة الصبح
-وأنت بقا مش عايش لوحدك كده ليه
=بدأ الأستجواب...وربنا ما هتسيبك
_انا بعد ما ولدتى أتوفت توفى بابا بعدها بشهور فجوزت أختى فى الصعيد بلدنا وجيت هنا عشان شغلى
-ربنا يرحمهم ويعينك يبنى ...طب مافكرتش تتجوز
=أحم..أيه الكسوف ده
_ملقتش البنت المناسبة فقررت إنِ هتجوز الوحدة شوية عقبال ما ألاقيها
-تدور وانا موجودة ...طب انا بقا هدورلك على عروسة كده حلوة تكون فى معارفى
=أيه يا حجة معارفك وانا قاعدة

طبعا كنت بتكلم بصوت واطى محدش سمعنى غير انا وماما وهو ...أسمه خالد

عدت أيام وانا شبه بشوف خالد كل يوم,
مرة فى نازل شغله ...اه هو بيشتغل مهندس فى شركة طيران,ومرة قاعد بيسمع فيروز فى البلكونة.

_أحم أنسة أسماء أيه اللى منزلك دلوقتى!
=ماما تعبانة أوى ...هروح أجيبلها دوا السكر
_أستنى ...هاتى هروح انا
=انا مش عارفة أقولك أيه ...خد فلوس الدوا أ...
لقيته أخد الروشتة ومشى_أدخلى يا أنسة أسماء الله يخليكى
هو مخدش الفلوس ليه,أيه التحكم ده
دخلت شوفت ماما ولقيته جاى وجايبلها الدوا وعصاير.

_الف سلامة يا طنط مش متعود عليكِ كده
=يشيخ يبخت طنط
_أيه قولتى حاجة
=لا لا خالص
-روحى يا اسماء جبيلى ماية أخد الدوا

دخلت أجيب ماية وسيبتهم سوا
_خايفة عليها تكون لوحدها...الوحدة للست وحشة أوى يبنى
-ربنا يديكِ تلت العمر يا حجة
=انا يبنى رجلى والقبر ...لو حصلى حاجة بنتى أمانة فى رقبتك يبنى
دخلت بالماية وعنيا مدمعة أيوة سمعتها
بس مش هسيبها تسيبنى لاء.

شهر عدى وكان أحسن شهر وأخر شهر أشوف ماما,أنتوا فهمتوا أيه...لاء أخر شهر أشوف ماما تعبانة.

-تعالى ساعدينى
=يا حبيبتى انا هعمل كل حاجة أقعدى بس
-مش متعودة عليكِ كده...على العموم خالد جاى النهاردة يطمن عليا...مشمش ريحة أسماء فى الصالة ...تختفى خالص
=أيه يا حجة هو انا عشان بقيت كويسة يعنى

خالد جاه وكان قاعد مع ماما بيطمن عليها,أول مرة أحس إن بقا لينا راجل بجد,راجل يستحملنا كده ويخاف علينا ويحمينا.

طلعت فى الوقت اللى سمعته قال_صحيح يا ست الكل...الحمدلله لقيت العروسة
جسمى أتجمد حرفيا,خلاص لقاها وبقى ليها هى,هو كل الفترة دى كان بيشوفنى عيلة هبلة تلاقيه لقى واحدة تليق بيه
-ب...بجد يبنى...ربنا يوفقك
_مش عايزة تعرفى هى مين
دورت وشى وكنت هدخل جوا سمعته بيقول_أسماء...انا مهما دورت مش هلاقى بنت فى أحترام وأخلاق أسماء
ينفع يا ست الكل تتميلى أمنيتى فى أن أسماء تكون زوجتى وأوعدك هتقى الله فيها
هو بيتكلم جد ولا دى كذبة أبريل,هو أحنا فى أبريل انا توهت ولا أتوترت ولا أيه
"بارك الله لك فيها وبارك عليكما وجمع بينكما فى خير"
~يلا حضن كتب الكتاب
كان صوت أخته المش حرباية وده ولله الحمد أخته طيوبة وحد يتحب كده.

_مبروك
-بص أقسم بالله لو قربت هديك بوكس ...انا خايفة أوى
_أهدى...انا مش هعمل حاجة عاوز بس أقولك
حط أيده على الطرحة وفكها فشعرى ساب
_أنتِ أجمل بنت شوفتها...كأن ربنا بيعوضنى بيكِ
-قول تانى كده
_أنتِ عوضى وهدية غالية أوى من ربنا
حضنى وسمعنا سوا صوت المكبرات.
"لبيك اللهم لبيك...لبيك لا شريك لك لبيك"
يااه عدت سنة بالسرعة دى,لو كل السنين تعدى بالسرعة دى بس نتلاقى فى أخر الطريق هيبقى أحلى يوم اللى يعدى فيه مية سنة عشان تتجمع القلوب وتلتئم الجروح"

"كل سنة والكل طيب وطابت أيامكم بخير وسعادة وراحة مع من تحبون"