انار عتمة قلبي

البارت العاشر

نادين عبر الهاتف : يبنتي بقولك زهقانة انزلي نقعد في الجنينة شوية
اسيل : اطلعي انتي يا نادين احسن
نادين : والله اكرم قاعد في أوضته واحنا هنقعد بره في الجنينة
اسيل : طيب حاضر هنزل انا اصلا مخنوقة اجيب كتب نذاكر ولا اية ؟
نادين : لأ انا زهقانة من المذاكرة احنا هنتساهر احسن
و بالفعل أغلقت معها اسيل و ارتدت عبائتها السوداء واحكمت لفة حجابها حول وجهها المستدير بنعومة و نزلت للأسفل و جدت نادين جالسه بأنتظارها
نادين : يبنتي بقي يبنتي حتي في العباية زي القمر خفي علينا حلاوة بقي
اسيل بأبتسامة : دي عيونك الملونة دي هي اللي حلوة علشان كدا بتشوفي كل حاجة حلوة
نادين : شكلك رايقة انهاردة اهو الحمد لله
اسيل : يعني شوية
نادين و هي تنظر إلي الحلقة الذهبية التي تحتضن بنصر اسيل الأيمن بفضول : بس يعني مش بتتكلمي علي خطيبك خالص كدا
اسيل بأبتسامة باهتة وهي تلعب بتلك الدبلة التي تبقت لها من أثره : لأنه مش موجود معانا
نادين بتفهم : اه هو عايش في مصر يعني
اسيل بحزن : لأ هو الله يرحمه
نادين بدهشة ممزوجة بحزن : ربنا يرحمه يا حبيبتي و يصبر قلبك علي فراقه
اسيل : يارب يا نادين يااارب
و ساد الصمت بينهم لحظات حتي قطعته اسيل بدموع : عارفة دا كان كل حياتي
نادين : للدرجادي كنتي بتحبيه
اسيل : كان اول واحد قلبي بيدق جامد لما اشوفه كان صحبي و خطيبي و حبيبي و كل حاجة ممكن تتخيليها و فجأة سابني و مشي
نادين : هو أن شاء الله في مكان احسن من هنا واكيد ربنا شايف أن مكانه في الدنيا مكنش مناسب ليه
اسيل و هي تجفف دموعها : الحمد لله علي كل شيئ كل اللي يجيبه ربنا كويس
نادين وهي تحاول تغير مجري الحديث : لا لا العيون الزيتوني دي متعيطش
اسيل : لون عيني دا ياما حيرني بجد مرة اشوفها عسلي فاتح ومرة خضرا و مرة صفرا بجد مش عارفة لونها
نادين بمرح : مش مهم لونها المهم انك زي القمر
اسيل بزهو مصتنع : لا لا حاسبي لأتغر بقي
نادين بضحك : من حق الجميل يتدلع
اكرم : اية الندالة اللي فيكم دي بقي قاعدين هنا بتضحكوا والدنيا فل وانا قاعد فوق متوحد كدا يرضيكم يعني
نادين : قولنا نتنفس شوية بدل ما انت كابس علينا دايما كدا
اكرم : شامم ريحة طرد ؟!!
نادين : لا لا يا حبيبي هو انا اقدر بردو
اكرم بدراما : قادر وتعملهاااا مع الأيااام علي عمر ضيعته علي الاوهاااام
نادين وهي تكاد تلتقط أنفاسها من كثرة الضحك : خلاص يا اكرم اقعد بس ارحمنا من صوتك دا
و فلتت ضحكة من اسيل أيضا و لكن اخفتها سريعا بحرج
اسيل : احم طيب انا هطلع انام بقي تصبحوا علي خير
اكرم : مفيش داعي انا كدا كدا خارج بره انا بس حبيت ارخم عليكم كملوا قعدتكم براحتكم
و بالفعل تركهم و غادر أما نادين تسألت بأستغراب : سوري في السؤال يا اسيل بس انا حاسة انك من وقت ما جيتي هنا مش طايقة اكرم خالص وبتتجنبي تتعاملي معاه
اسيل : لأ عادي يعني انا بس مش متعودة اني اتعامل مع شباب غير طارق اخويا و يوسف الله يرحمه علشان كدا مش بتعود عليهم بسرعة و كمان انا شايفة أن مفيش داعي لكلامنا يعني
نادين : فعلا معاكي حق
اسيل : الغريب اللي بجد انك عايشة كل حياتك في امريكا و مع ذلك بتتكلمي مصري كويس جدا وكمان ماشاء الله حجابك شرعي ولبسك فضفاض
نادين : لأن من صغرنا و ماما بتعلمنا العربي علشان مننساش ابدا أن اصلنا المصري و كمان كانت بتعملنا ديننا صح و اية اللي يتلبس و اية لأ و ازاي نتعامل بحدود والكلام دا
اسيل بأبتسامة : بجد ربنا يبارك في مامتك
نادين : امين يارب يا حبيبتي ثم غمزت و اردفت بمرح : بس قوليلي طارق اخوكي متجوز ؟ اصل لو شبهك كدا مش هسيبه
اسيل ضاحكة : يلهوي لو رحمة سمعتك دلوقتي هتعمل منك بطاطس محمرة ايوة متجوز و عنده ولد عنده تلت سنين كمان
نادين بابتسامة : ربنا يخليهم لبعض و يسعدهم انا كنت بهزر اكيد بس علشان نفك الجو شوية
اسيل : فهماكي اكيد
و بعد حوالي ربع ساعة اخري
اسيل : الجو برد اوي هطلع ادفي وانام احسن
نادين : جود نايت
اسيل بضحك : و انتي من أهل الخير النبي كان عربي
نادين : حبيت اعمل نفسي أجنبية بس
ضحكت اسيل ووضعت يدها بجيب سترتها وصعدت للأعلي ارتدت بيجامة ثقيلة و بعثت رسالة الي أهلها تطمئنهم عليها و ظلت تتأمل صورة يوسف فترة حتي راحت في سبات عميق
**********************
دق منبه نور في تمام الساعة التاسعة فتحت عينها بكسل و قامت جلست علي الفراش وهي تفرك بعينها وتتثأب ثم أغلقت المنبه و قامت دلفت الي المرحاض اخذت شاور و ارتدت ثيابها المكونة من دريس باللون السماوي عليه حجاب من اللون الموڤ المتداخل مع الازرق ثم صلت فرضها و توجهت الي المطبخ حضرت الفطور سريعا و أيقظت والدها و جلسوا يتناولون الطعام سويا
سالم : يبنتي كلي براحة شوية كدا تشرقي
نور : مفيش وقت يا بابا المحاضرة يدوب فاضل عليها ساعة و لسة الطريق طويل
و بالفعل أنهت طعامها سريعا واعطت والدها العلاج و قبلت رأسه : عاوز حاجة تاني قبل لما امشي يا بابا
سالم وهو يربت علي رأسها بحنو: ربنا يحفظك يارب و ترجعي بالسلامة خلي بالك من نفسك
اومأت له نور بابتسامة و اردفت : حاضر يا بابا
و حملت حقيبة يدها و خرجت سريعا و لكن وجدت ذلك المتطفل الوقح واقف أمام منزلهم كالعادة
مغاوري بنظرات ماكرة : ما تحن يا جن بقي
نور بهمس لنفسها : اللهم طولك يا روح
مغاوري : يباشا اتواضع و عبرنا
نور بشراسة : قسما بالله يا مغاوري لو ما لميت نفسك و اصتبحت و قولت يا صبح مش هخلي نهارك فايت سامع ولا مش سامع
مغاوري : الله الله دا طلع القط عنده ضوافر و بيخربش اهو
نور : بخربش و مبطلعش غير بالدم
مغاوري : يعني اشمعنا بتعبري البيه اللي بيجيلك بالعربية و بيطلع معاكي فوق و انا بقالي سنين بتمني منك نظرة صحيح نسوان ملهاش غير الجنية
نور بغضب و صوت عالي : لأاا بقولك اييية لحد كدا وكفاية كلام اقسم بالله العظيم يا مغاوري أن ما حطيت لسانك في بوقك و اتكتمت لأكون مخلية جزمتي معلمة علي كل حتى في جسمك و بخصوص كلامك الأهطل دا البيه اللي بيجي دا انا بدي لأختة دروس علشان اعرف اصرف علي تعليمي من فلوسي وشقايا لكن انت هتعرف منين ما انت ابن امك وعمرك ما تعبت في الجنية
وختمت كلامها بنظرة غضب و اشمئزاز و تركته و غادرت و هي تمتم: الله يخرجنا منها علي خير و يبعد عنا الاشكال المريضة دي
و لحقت بالباص سريعا متوجهة الي الجامعة
********************
# دمتم بخير 💜
# أميرة اشرف لبنة.