في قلبي رجل 🔞

بارت خامس و أربعون

غيثة: عثمان ما عندي ما نخبي عليك ، نتا ولد الناس و عزيز عليا ربي لي شاهد و ما فيك ما يتعاب و بخيرك و بعقلك ، بغيت نخطبك لصاحبتي بنت زوينة قارية و بخدمتها و بعقلها..

ضحك عثمان بشوية و كمش عينيه كيشوف فيها كأنه كيقول ليها " واش من نيتك " و أنور ضحك بعصبية و مسح على وجهه من بين الحركات لي كيديرها فاش كيتعصب ، ضيق عينيه كيشوف فيها و نطق بنبرة حادة..

أنور: واش نتي داروك خطابة ولا مالك أ گولي ليا دخلي سوق راسك..

غيثة(شافت فيه و قلبات عينيها لـ عثمان بنبرة هادئة جاوباته ): انا كنهضر مع عثمان هو المعني بالأمر و هو لي عنده الحق يجاوب ( رجعت شافت في انور ) و زايدون ما كندير عيب كنجري غير في الخير و ربي لي حاطني سْبَابْ و لي هرب لزواج هرب لطاعة ياك و لا لا..

عثمان ضحك بصوت عالي حتى وجهه و لا أحمر و وذنيه حمارو و عينيه دمعو ، سكت كينهج من كترة الضحك و قال..

عثمان : ما گلتي عيب امرات صاحبي ولكن انا ديجا مع وحدة راك شتيها ديك نهار و العلاقة بيناتنا جدية..

غيثة( حركات راسها بالإيجاب بأنه فهماته و نطقت ): ايه نتا معاها ولكن باش تقوليا العلاقة جدية هنا راك غالط ، العلاقة كتولي جدية نهار تخطبها دبا نتوما حاليا في علاقة غير شرعية ، يمكن نتا عايش مع گور من كترة ما عاشرتيهم ولات عقليتك بحال عقليتهم ،ولكن راك كتبقى مغريبي بعقلية مغربية بغيتي ولا كرهتي و ما كايناش لي تفهمك من غير بنت بلادك..

سمع كلامها و حك ذقنه ، شارد الذهن كيفكر هو فعلا عنده عرق مغربي يمشي فينما مشا كيبقا ينبض و كيفما قالت ليه ما تفهمه غير بنت البلاد ، ولكن كيعجبوه الأجنبيات..

عثمان: هو من واحد ناحية ما كاينش بحال بنت البلاد ولكن شنو غندير الگلب عندي تايعجبو الزين و الشهوبية و العينين زرقين..

غيثة( ضحكات على صراحته و نطقت ): و الزين اش غادي نقوليك حبو مولانا و ما كينش العين لي ما تعشق في الزين ولكن ما يدوم غير المعقول ، نتا تبارك الله راك باينة دوزتي تا عيتي ها شهبة ها الحمرة ها الزرگة ها السمرة ، ايوا الله يجعل البراكة العمر تا يجري تا واحد ما ضامن عمرو و الزين تا يطلع في الراس شوف ليك شي حاجة لدوام و دير وليداتك ما حد باقي فيك جهد..

حمقاته بكلامها خلاته كيضحك و أنور غير كيشوف فيها كتهضر بجدية و رزانة و بكلام موزون و عرف فاش كتكون عندها المصلحة فشي حاجة تقدر دير المستحيل المهم توصل ، شاف في صاحبه كيدور كلامها في راسو و عرف كلامه عطى مفعوله و أثر عليه خصوصا عتمان براسه ما عارف واش باغيها مغربية او اجنبية خربقاته ، فضل ما يدخلش غير يسمع فين غادي يوصلو و باش غادي يساليو..