في قلبي رجل 🔞

البارت السابع عشر

الحسن : هادي مراة يتعناااو بيها الناااس شدوها مع راجل مزووج هاادي تا هي نرضى نگول عليها مرتي..

نجمة شهقات شادة على فمها و كتجر في راجلها من دراعو و غيثة كتشوف ببرود و أنور جمع يدو على شكل قبضة و زير على فكو بعصبية و كيحاول يتمالك اعصابو و قال بصوت خشن و نظرات حادة..

أنور: غتمشي بحااالك و لا غانقود اناااا وياااك سوايع ..

الحسن( شاف في نجمة ): زيدي نمشييوو زيدي..

نجمة كتشوف في غيثة و عارفة مزيان اشنو غادي يكون احساسها في هد اللحظة ، حاسى براسها بين نارين الحسن من جهة و غيثة من جهة ، حركات راسها بلا و هي كتشوف في الحسن..

نجمة: غير سير نتااا..

الحسن( بعصبية): والله و مااا تحركي رجليي برجلك ياا هاااد المراا لا بقييتي عرفتينيي..

نجمة نزلو دموعها و هي كتشوف في غيثة لي واقفة مربعة يديها و ملامحها خالية من أي تعبير ولكن عارفة اشنو في داخلها..

غيثة( ببرود ): غير سيري انجيمو..

الحسن جر نجمة و كيمشي بخطوات كبار و نجمة وراه كتجري ، و غيثة بقات كتشوف في أنور و كيفاش دافع عليها و جابها وراه كأنه الدرع الحامي ليها و لو ما كانش ما كانت غادي تنطق بحتى كلمة و ما غاديش دافع على راسها لأنه الكلام لي قال الحسن كان بحال شي خنجر و ختارق قلبها ، الحقيقة لي كتعيا تغير فيها و تهرب منها ولكن مستحيل تبدل..

هي فعلا تخلات عليها الأم ديالها لاحتها وراها و هي في عمر سنتين مزال ما كتعرف حنان الأم ، مزال محتاجاها في جنبها محتاجة انه تقول كلمة ماما ، و اول ما ولات كتعرف و تفهم سولات باها علاش خلاتها مها و علاش ما عندهاش ماماها بحال الوليدات لي كيقراو معاها ، مزال عاقلة على باها انفاجر بالبكا قدامها بالرغم من محاولاتو انه يعمر الفراغ لي عندها من جهة الا أنه ما قدرش ، دموعو قهروها و حزنو بسباب امراة خائنة هجراتو خلاها تكره مها و من تما عمرها سولاتو و لا جبدات اسم مها..

كانت جالسة حاطة رجل فق رجل ساهية و أنور قدامها كيشوف فيها و قال..

أنور: اش واقع ؟

غيثة( هزات عينيها فيه ): بنتهم موالفة كتبات عندي البارح خرجات مع جوج الليل و ما رجعاتش كنضن عندها شي مشكيل..

أنور( بجدية ): هد راجل عمرك تشوفيه و لا دوي معاه..

غيثة( ببرود ): عمرني شفتو اصلا..

سكتو بجوج هي كتشوف في نقطة وحدة و هو عينيه مفيكسين عليها قدر يشوف الحزن في عينيها و قدر يلمس شحال هضرة لي قال ليها الحسن ضراتها و خلاتها ترفع عن الواقع ، قالت بصوت هادئ عكس النيران لي شاعلة في قلبها و هي كتشوف في نفس النقطة..