ماخفيت ضمائرهم

-2-

: شلونج بالتراب شلون كاضيها؟
هيج بصورتج ضليت احاجيها،
المفروض الورد يندفن بالبستان
شجابج للكبور شعرفج بيها
يام ضحكة الحلوه ...
هاي تاليهاا؟💔
............

كاعده وضهري عالحايط ابجي واون صوتي رايح واختي راسهه على جتفي
والناس تجي تعزي وتواسي واني منتضره المله تجي احس بعدني مبرد كلبي ميخلوني الطم ميخلوني ابجي براحتي
اجت الملا وبدت تقرا واني شكو عياط بالدنيا وشكو دموع الله ذبهه عليه انتهيت احس ختنكت اخذوني للغرفه غسلولي صوت بعد ماعندي بدلولي ثوبي تنكع ونشك جان تطب للغرفه بثينه

تذكرت امي شكد جانت تضوج منهه ومرض امي بسببه متحملت كمت وصوتي كوه يطلع اتعب من احجي

-دقيقه وحده ماتبقين هنا

-عيب ياقوت شنو هالحجي

-صوت عماتي وهن يحجن وياي وعيب وهذا عزا امج

-كتلكم خل تطلع بكرامته لا اسحلهه كدام العالم ماريد اشووفهه هناااا عيطت ولطمت لزمتني عمتي وكالت لبثينه طلعي روحي البنيه منهاره اعذريهه

-لا عيني لا تعذرني ولا اعذرهه طالعه وعايفه العزا هذا الي يسوي زين ويقوم بالواجب

طلعت من الغرفه وراحت
وكعدت يمي عمه وفاء

-ليش هيج تصرفتي عمه

-عمه ماريده بسببه امي تاذت وتمرضت

-ليش حبيبتي شنووسوت بثينه

-عمه ماكدر احجي عفيه

طلعت يم العالم وخلصت الفاتحه وكلمن راح لبيته ماضل غير اني واختي وبابا كريم

-ماعرف العالم شنو راح تكون رده فعلهه وشراح يحجون واني عايشه وي زوج امي ....

الي وعيت للدنيا ماعرف غيره اب هو جان بايده للمدرسه هو يجلد كتبي هو ولي امري من يصير استدعاء اولياء الامور
بابا كريم ماجنت اعرف هو زوج امي اله لمن بديت اكبر وجسمي بدا يكبر هنا جنت بصف السادس كعدتني امي بالحديقه تضفر بشعري وتسولف ويايه

-كبرتي يا ياقوته وعيب بعد تلبسين شورت بالبيت لو كيمونه كدام بابا

-ليش هو مو ابويه عادي

-لا يمه باعي انتي جبيره ولازم تعرفين كريم مو ابوج

-لعد منو

-كريم يصير زوجي ومو ابوج يعني زوج امج

-لعد وين ابويه

-دنكت راسهه وكالت ابوج مات من جان عمرج 4سنوات توفى بحادث

-ودره هم اختي من ابويه الميت لو بت بابا كريم

-صفنت بوجهي لثواني وردت
لا بت بابا كريم
بس هسه انتي فهمتي قصدي مو ماما صح تحبي ويحبج بس لازم تنتبهين للبسج وتصرفاتج لان حرام