ماخفيت ضمائرهم

-11-

هَذا شارعكُم وصَلته
وجايَب وياي الخَريف
علّمت روحَي الشَجاعة
وبطّلت مِن الرِجيف
وتآلي خِفت البّاب ادگه
وگمت ادّك اعِلّى الرَصيف

______________

اصعب شيء يواجهه الانسان بحياته كلهه هي حقد وغدر الاخوه
وانه اخوي ابن ابوي معاديني وما يواطني بعيشه الله
دائما جنت اشوف نضرات الحقد من عينه تجدح مابيه ريحه الخوه ولا رابط الدم يخلي يحن على اخو ...

-شجابك ياحكيم ..

-ماهو شغلك ناضم وبعدين هذا سلامك لخويك

-اضن تدري بالشيخ شقرر عليك
ابوي تبرا منك ودفنك واخذ عزاك ومو من الصح اكسر چلمه ابوي واخذك بالاحضان
الاصح ترد منين ماجيت ياحكيم
ماراح تلكى الي يستغبلك ولا الي يهلي بيك

-انه جاي لامي وبعدين شنو الي يخليني اصدكك

-امك الشيخ حاججهه بينك وبينه وتبرت منك وعتبرتك ميت ولبست عليك ثوب الحزن لا ترد ما راح تلاكي حضن ياخذك ولا ضحكه بثغرهم الك
بكيفك هذاك الدار روح وشوف بس انه جاي احذرك من الي تشوفه من الشيخ
نصيحه احتفظ بالباجي من ماي وجهك جدامهم وانسحب غاد

-ماصدك امي ماتسويه اني وحيدهه

-هذا عيبك ياحكيم دومك جنت واثق من روحك ورافع صدرك علينه وتحس بروحك العزيز والغالي
بس يخوي ماحسبت حساب للوكت... يروح عزيز ويجي الاعز منه

-المهم انت رضيت ابوك ..

-الحمد لله رضيته وماچسرت جلمته ووطيت راسه
خذيت زهيره وصارت حرمتي الثانيه
شفت ياحكيم جنت تعاين عليه بعين الصغيره
وشوف هسه انه وين وانت وين
صفيت انت بلا اهل لا عزوه لا اسم
وانه ..انه كسبت ثقه الشيخ وصرت الايد ليمنى اله
وبدا الحرمه ثنين وراح اسوي اسم الي واصير فوك وساعته راح تعرف منهو الي يصد للاخر بعين صغيره

-دومك ياناضم شايل حقد الدنيا كله عليه وتستحيف كلشي بيه صدك يو كالو العين ماتحب الارجح منهه
اشبع وخل تنملي عيونك بالعافيه عليك
لجن خلي هالجلمتين براسك
((اي شيء يجي بالباطل مايدوم ))
لا تصعد على الجتاف ولا ترفع ركبتك فوك تنكسر ياناضم

درت ضهري ومشيت محمل هموم على همومي  
الي خلاني اصدك كلام ناضم عبن انه اعرف منهم بابوي وطبايعه وشخصيته لو اخذ قرار ما ايتنازل ولا يهتز لو قراره على حساب روحه مو بس ولده
ابد مايتراجع
جلمود كلبه ...

رديت منين ماجيت
الشقه الجديده كملت وبديت اشتري غرض مستعمل بس نضيف الي يحتاج اعدله واصبغه وكملت الشقه بقت بس الغرفه هنا انه بعد قررت اروح وامشي عليهه مره ثانيه ومامل وامشي عليهه لحد ماينطوهه

مشيت لخالي انطي خبر مارضى يروح وياي يخطب
هنا انه ضاقت بيه الوسيعه بس ما استسلمت ضليت الليل كله افكر شلون اخطبهه
ثاني يوم رحت لصاحب المخبز رجال خير ويحترمني حيل فرحلي وكال انه امشيلك واكفلك تشكرت منه ولميت ربعي بالشغل ورحت لصاحب العماره والرجال فرحلي وكال وياك احنه
رحت لناصر وبلغته اليوم جايينكم
للعصروصلنه لبيتهم وانه اجذب لو كلت ماخايف
خايف ومتوتر طبينه لبيتهم انه والزلم واستقبلونه وكعدنه وماي وجاي وانه عقلي يمهه اكيد تدري انه جاي اخطبهه كلبي يمهه وروحي ترفرف داير بيتهم
بدت الزلم تسولف وبده ابو خضر ابو المخبز يحجي
وبده السالفه عن الي يجمع راسين بالحلال شنو اجره عند الله
وبده حجي ابو علوان يحجي ويمدح بيه وجاوبه ابو ناصر