ماخفيت ضمائرهم

-14-

يعنبر يا تعَب ظهري
زرعتك والشَمس تلهب
يا اول حصَد للروح
مدلل بالكلب تلعَب
___________//////_________

فاطمه...

ايام ثكال مرت علي
مروره الحنظل اهون من مرورتهه وضيمهه
اعاين عليهه تذبل يوم عن يوم فد كدرت شوي تحجي يادوبك افهم عليهه كوات

مدري ليا كتر اندار
حكيم الما نعرف اخباره
يو امي الي على ساعه وتروح بين ايدي
لو صالح الي اختفى ومامش خبر منه ولا كلمه تبرد سعره افادي

نوبه اكولن مل وجزع عبن انه مربطه
فد مابيدي حيله هاي امي شلون اعوفه واروح اعرس

لو اضل بلا عرس طول عمري راضيه المهم تشم هوا جدامي واحس بوجودهه يمي

وهيج تاخذني صفناتي وترد بيه
واعاين جني مو اني
ولا رديت لنفس وضعي وضاعت ضحكاتي وي ضياع احلامنه

بيوم انه كاعده بالغرفه امي نايمه
واسمع صوات مكافشهن وغلطهن
بلا ذن مايكولن ناس بالبيت مرضى شني داكوم
وفزت امي مخروعه مبين من عيونهه

-كولي يالله يمه لا تخافين ماكو شيء تعاركن الضراير
قابل ماتعودنه على مكافشهن

طلعت الهن

-خايبات بسجن كولن اكو ناس مرضى ونايمه شمالجن لفاجن السوادين بهل ضحى وعلي اسويجن طشار لون ماتهودن
ردت نويره

-فطيم شوفي اغسل هديمات ناضم اجي الكاهن بالوحل شني عودك هاي وانه حبله اخر ايامي وتعبانه حرام عليهه

-خايبه عساج لا شفتي ولا حملتي بحضنج رببي هيج بيه بخت يمك واتبشر

-ويضل مكافشهن لتوالي الليل فد من يجون زلامنه يخنسن ومايطلع حسهن
وكل وحده تريد تثبت هي احسن من الثانيه لزلمتهه

وهاي هي ايامنه نفس القبله والجاي ماندري شنهو يصير ..

بيوم اجه كريم وكال راح يروح لبغداد بدون درايه احد
فد انه وامي ندري ومرته
وكال اروحن اشوف وضعه غاد وشلونه
الفرحه ماساعتنه بودي اكوم اعجن واطرشله سفطه خبر لو اسويله كليجه بعد عيني يحبهه هوه
امي حاجتني اطلع الهه صندوك الذهب
كمت وطلعت الهه هي ماتلزم انه ارفع الهه وتاشر الي
طلعتله معاضد وسلاح ذهب وزنجيل طويل حيل وثكيل

انه هم نزعت معاضدي وخليتهن بالصره
وسهرت الليل اسوي كليجه

الفجر وي طلعه كريم انطيته الامانه وراح وجن شلع وياه روحي وخداهه تمنيت يو اكدر اروحن وياه

رديت للحجره وامي كاعده
كتله راح الله وياه ...

كمت اكمل شغلي وانزل يم امل اتفرج على الزباين الي يجن يمه والعرايس صرت اكضي الوكت يمهه وحيل فوحانه
حملي شوي متعب بس ماشيه الامور
حكيم ماكو بحنيته عليه يخاف عليه حته من روحه
بس دائما الاحظ امل بس تسأل بيه ع زوجي
وهواي تحجي بي وتراقب وقت طلعته ورجعته
بلبدايه جنت عادي بس صرت اتحسس من هالموضوع