ماخفيت ضمائرهم

البارت-20-

لحظه لحظه فرآكه يمشي ،
وكل دقيقه تعوف آثر ..
آني مو ذيج اليحبهآ
ولآ هذيج البـ الصور !!

__________
الحياه عجيبه.تاخذ وتعطي
فكره الموت والولاده ابسط مثال

كأنو توصل النه انو هذا قانون الدنيا
تروح ارواح لخالقهه
ويرزقنه بارواح للدنيا
يعني تاخذ شيء وتنطي بداله ..

دره كانت البديل
عن الي نوخذ مني وخسرته
بس محد يعوض فراغه وخسارته بحياتي

مرت الايام والاشهر وبنتي ممسجله بالنفوس
ماعندي اوراقي كلهه احتركت وماكدر امشي بمعامله البيان
اكدر اطلع بيان اختهه من النفوس
واكدر اطلع عقد زواجي
بس جانو اهلي وافضين خايفين لا يسمعون اهل حكيم ويسووه مشكله
ناس شرانيين ماعدنه مثل سلطتهم ونفوذهم علمود نواجهم

ابوي اقترح علي ابيع البيت لان ماينطب بعد لازمه شغل وتعمير بكومه فلوس

هو فعلا ماينطب بعد من راح حكيم شلي بطبته وهو ماكو

عرضت البيت للبيع بس محد اجه
الناس مصدكه بالخرافه على اساس البيت انسكن بروح صاحبه

ابوي تعب وتمرض وحالته متدهوره
اخر شيء نام مستشفى بقى 3ايام وتوفى

تعبت من الموت
كل يوم رايحلي عزيز كل يوم مفجوعه

بقت امي واخوتي تأجل كالعاده عرس منصور اخر شيء بعد شهرين من وفاه ابويه اخذ خطيبته بدون لا صفكه ولا هلهوله
كنالهه انتي سوي حفله يم اهلج من حقج

وجابوه ثاني يوم ببدلته وصعدوه لغرفته

خواتي يجن يمنه ماعافني ولا عافن امي
سعاد الله عوضهه وانطاه الانسان الي يستحقه ويقدر قيمته كلمن كمل حياته وعاش اله اني..

وكف عندي الزمن باللحضه المات بيهه حبيبي

صار عمر دره سنه وياقوت سنتين مرت على وفاه حكيم سنه ونص
الايام تركض
واني لحد هاللحضه اتمنى يرجع
اتخيل يرجع بيوم ويطلع كله هذا حلم
عايشه على ذكراه وياي بكل لحضه

امي سوت عمليه رفعت المراره
واجو اهلهه وخطار رايح وخطار جاي
اجت كرايبه ام كريم بت عمهه لامي

وكعدت وسوالف وحجي عرفت قصتي وشلون اهل زوجي ناكرين نسب ابنهم راحت

وره اسبوع اتفاجانه بجيته وهي طالبه ايدي لابنه كريم

كريم الي حكيم ماحبه وغار عليه منه
شدا تحجون
الضغط صار عليه من كل الجهات محد ديحس بالي بيه

شلون اتزوج وحكيم وحبه وتضحيته لخاطري
اعوفه هيج واكمل وي انسان ثاني عادي

-ولج يمه لخاطر بناتج
ماسمعتي تكول مستعد يسميهن باسمه
شرايده بعد مستقبلهن راح يندمر