ماخفيت ضمائرهم

-1-

صباح المطر والاجواء التجنن

دست نشر ستوري ونزلت لامي

-صباحوو ياكيمر انت يا جميل يااحلى فيروزه بالدنيا

-صباح الخير حبيبتي يلا تعالي تريكي

-وين دره نايمه

-يي نايمه هسه تكعد

دره -كعدت ياقوم جنتو تحجون عليه موو

ياقوت-اكلج عفيه لدوخينه من الصبح وتعكرين مزاجنه بصوتج المكروه

دره-اوي صوجي اني خل اسكت احسن وبعد ماحجي

  ياقوت-اتحدااج

سوت حركه بايده خلته على حلكه بمعنى ساكته

ضحكنه عليهه بس عود تسكت مستحيل دره تسكت لو خمس دقايق
عدهه قابليه للحجي للصبح

-كملت ريوك ولميت المطبخ وامي تجهز بالغدا بس احسهه مو على بعضهه لايبه روحهه

-شبيج امي تعبانه اني اسوي بمكانج روحي ارتاحي

-لا ماما مابيه شيء بس سالفه ببالي متعبتني

-نفس الموضوع؟؟

ذبت الوصله مال طباخ من ايدهه وكعدت عالكرسي

-ليش اكو غيره

-ماما ليش هيج تتعبين روحج وتاذين نفسج منو يستاهل ومنو يسوى تعكرين صفو مزاجح من وراه
والصراحه اني احسج مبالغه
يعني يجوز نيته صافيه مو مثل مانتي تفكرين

باوعت عليه بنضره
-متعرفين ماما متعرفين بثينه شنو وشتكدر تسوي

كامت تكمل طبخهه ودره رتبت البيت
اتغدينه ونمنه ساعه كعدت ب3ونص بدلت داروح للمختبر لبست ثوب عدل بينصل لون بنفسجي ثخين شوي وستره كابوي رفعت شعري ذيل حصان وبوتين رياضي ابيض وطلعت للمختبر اتمشى اله تمشي قريب على بيتنه المطر توقف بس جو مغيم  دخلت للعماره وباشرت بشغلي

بين سحب الدم والتحاليل  وبين الهوسى مال مرضى ازدحام اليوم احد كملت شغلي ورجعت للبيت ساعه عشره اله اخذت تكسي المطر رجع بقووه
طبيت للبيت اركض المطر قوي والجو يكص من برد دخلت من المطبخ وصوت العياط طالع من الغرفه مال امي

-كريم اعرفك كلش زين شنو يدور ببالك هالسوالف مو عليه تكدر تعبرهن
ثنينه نعرف بثينه شنو تفكر من 17سنه

-داكولج ولد اخوتي لازم اضل وياهم واراقب بيهم يتامى خوما اعوفهم

-ولد اخوتك موو كريم لاخر مره انبهك من روحاتك لبثينه والله وروح النبي اسويهه كارثه هالمره

طلعت امي عصبيه من الغرفه وجهه احمر

سالت دره شكوو

-نفس المشكله شنو الجديد يعني
بس تدرين احس ماما مبالغه شنو بيهه اذا راح عليهم غير ولد اخو