ماخفيت ضمائرهم

-4-

ضميني رسالة شوگ
مابين الغراض الحابهن گلبچ
ولميني بصابيعچ مثل لمة خصل شَعرچ
داريني ترى أستاهل
صار هواي مامرتاح من جنت بعمر جاهل!

________________

افترت بيه الكاع واني اشوف من بعيد سامر ابن عمي يتمشى بس جان يسولف وي صديقه ممنتبه

- كلت يمه سامر هذا درت وجهي ومشيت بسرعه بدون مانطي جواب الحكيم وهو ممفتهم شنو القصه ومنو سامر
طبيت للمدرسه واني كلبي يريد يطلع من مكانه شلون لو شايفني شكول ونوب منو سامر الي يدور عليه الزله علمود ياخذني
كملت امتحاني ورجعت للبيت وره ساعتين
وجان البيت مكلوب خواتي جايات وجهالهن
وكاعدات يلفن بجدر الدولمه

-هلا هلا شجابجن مو تدرن امتحانات عندي راح تدوخني انتن وفريخاتجن

-يا ياا يمه هاي شكد كبحيه وماتستحي ولج تعاي بوسي سلمي وكفتي متخوصره شني هداده

-كلثوم انتي مو بفرعنه شعدج غابشه علينه

-ولج تطرديني من بيت اهلي يمهطوره

-جان تجاوب سعاد
عوفنهه هاي المدلله مالتنه براحتهه شتحجي
ضحكت ورحت بوستهن هن يعرفن طبعي احب اداهرهن بس احبهن كلش هنه وجهالهن
تعبن خطيه وي عيالهن مامرتاحات خصوصا الاخذن ولد عمي كلثوم شوي ارحم لان زوجهه طابك وياهه وعزلهه فوك عن عيالهه بس هم ينبشون وراهه

هالسبب يخليني افكر بشهادتي باجر عكبه اني عندي شهاده اذا ماتوفقت وي رجال ماربط حياتي بيه لان مجبوره لا عندي شهاده اكدر اشتغل واتوضف واعيل نفسي هذا جان قاعدتي بالحياه

بقينه نسولف ونضحك لحد ما كلبو الدولمه والتمت الكل عليهه بعد الغدا عفتهم وصعدت انام شويه عاطت بيه ناديه

-ولج شنو هم تنامين مو احنه جايين شراح نشوف منج هو لليل ورايحين وانتي لليل مراح تكعدين

-لالا بس شوي اكسر النعسه واكعد ماتاخر
عفتهه ترطن وصعدت للغرفه تمددت وتغطيت بعد ماحسيت بالدنيا

-منو هذا الخافت منه وليش معقوله تحبه لو محجوزه اله
بقيت افكر وانه راجع للسماوه واحس بفشله من روحي
قطعت كل هالمسافه علموده تالي ماتردلي جواب وخلتني ارد خايب

وصلت لبيتي وانه تعبان ونعسان
دشيت سلمت عليهم وبوجهي لحجرتي
مخنوك مادري شبيه وشريد ذبيت هدومي وشمرت روحي بفراشي اتنهد وكل تنهيده تعصر بصدري
بقيت افكر لحد ما غفيت كعدت على صوت فطم تنده بيه

-خويه حكيم اكعد ابوي طالبك

-فتحت عيوني بثكل صحصحت وهزيت راسي طلعت هي وانه تمغطت وكمت بدلت وطلعت غسلت بيدي الخاولي انشف بوجهي وسمعت صوتهه الي طول عمري ماحب اسمعه

-هم زين تعرف عندك اب ويطالب بشوفتك

-ام كريم شطالبه بهالمسيه