ماخفيت ضمائرهم

-10-

رغم كل هاي المعارف
جاي احس بروحي محد
انه ياهو
وانه وين
وهل سنين منين اجتني
وياهو حط ثگل السمه كله عل متني

___________

الدخان صار ونيسي ماعندي غيره اشكيله الحال
الشوك لاهلي وديرتي وريحه امي وسوالف فطيمه وحنيتهه
حته ابوي رغم قسوته بس اشتاقيت اله
طريقي مجهول لاانه طايل سما ولا طايل الكاع
ماريد احس بالندم على قراري
بس انه اضطريت لو راضي بقرار ابوي وماواكف بوجهه يصير مصيري مثل خواني مجبورين يمشون حياتهم وي حريمهم ويمثلون السعاده بس كلمن همه بكلبه شكل

فيروزه خايف ماتتحملني وتروح وتشوف حياه توالمهه
مانكر انه لو اجت وياي وخلت ايده بايدي راح تتعب وتتاذه بس انه احبهه ومامستعد افرط بيهه يي اناني وياهه وبيهه واضل احارب لخاطر عيونه للساعه لاشوفه وياي جوه سكف واحد

-خايفه من سامر هذا حقير وكلشي يطلع منه
المشكله ماعرف شنو شايف هو معقوله شايفني وي حكيم لو صدك واحد شايفني

بقيت الوب بالغرفه وافتر شوي وحسيت طكطكه يم الدرج فتحت الباب وشفت سهاد تلوب كاعده على بايه الدرج الاولى وراسه تاجيته عالمحجر جان محجرنه طابوك وعريض

-شبيج سهاد

-بطني فيروز داتتكطع

-شنو دتحسين خاف حتجيبين اكعد امي

-لالا يمكن غازات لان كلت عدس هسه افور هيلات واشربهن

-دكعدي بغرفتي كومي وياي واني افورلج

كومته بس حسيته دتلوب ومتبين كعدته بفراشي ونزلت فورت هيل ومي وصعدته لكيتهه تبجي بسكته

-ياا سهاد شبيج مامعقوله هذا من العدس

-ييي ماضن منه ولج الوجع ديزيد اضن داطلك

-عفته دتحجي ونزلت لامي بساع كعدتهه

-يمه كعدي يمه

-هاا يمه خير ياستار

-كعدي سهاد بطنهه دتوجعه وتبجي خطيه يمكن راح تجيب

-يامسهل يالله وينهه هيه

-بغرفتي خطيه تلوب

صعدنه اني وامي وجانت تلوب وتون من الوجع

-يااا عمه شبيج شتحسين

-عمه بطني بطني قلصت كلش واحس تتكطع بسجاجين

-يامسهل كومي يمه كومي خل نوديج لفتحيه ام عزيز تكشف عليج
فيروز ندهيلي على ناصر بساع يلا يمه

انخبص البيت والدنيا ليل وماكو تكسي بقو حايرين عاد دكو الباب مال جوارينه عدهم سياره برازيلي تكسي
اخذو وراحو بقيت اني وابويه كعد خليتله قوري عالنار
ومنتضرين ماكو نص ساعه ورجعو