آثار لبعض الجروح
_________
استفاقت لتجد نفسها محاطة بالكثير من الاجهزة تفقدت اوجه جميع من حولها وتمنت ان تقع عينيها عليه ولكنها لم تجده بينهم تلفتت يمنة ويسرة علي آمل أن تكون النظرة الأولى قد خذلتها.
وبينما حاولت النهوض داهمتها امها:
_ما تقومي الدكتور قال ممنوعة من الحركة.
_(عادت لفراشها مجددا)في شنو كلكم وجوهكم ما بتتفسر؟في حاجة؟
_(وضعت يديها على رأسها لتمسحه برفق) أنتي غالية واكيد أقل حاجة بتحصل ليك حتخلينا نقيف علي رجل واحدة.
_ايوة يعني الحصل شنو؟مافي شي خطير مجرد إرهاق ليس إلا.
_ليه ما خليتي الاء تجي تقعد معاك!؟
_ما كنت محتاجة ليها.
_كيف يعني؟!دي أول مرة تكوني براك وشايفة نتيجة الرأس القوي؟
_النتيجة؟صحي كيف جيت المستشفى انا؟
_بعلك الجابك.
_(عضت شفتيها بألم كأنها لم تعد تتوقع ان ينادي بزوجها) هو جاء؟متين؟هسي في المستشفى لسة؟ليه ما جاء يشوفني؟قال ليكم حاجة؟كلو تمام؟
_مع الدكتور هو وابوك انادي عليه؟
_لالا خليه.
_(طالعت اخوتها بنظرات تقول:اتركونا لوحدنا)انتو متشاكلين؟
_لا. هو قال ليك كدة؟!
_لا بس ما علي طبيعتك انتي. احكي لي لو في شئ أنا امك.
_(تلألأت الدموع في عينيها حتي تشوش نظرها)عايز يتزوج علي دا إذا ما كان اتزوج أصلا في الفترة الفاتت دي.
_وتصرفك كان شنو؟
_(نظرت الي سقف الغرفة كأنها تطالع ذكرياتها) طلبت يطلقني.
_ما كنت عارفة أنك عويرة وحتخربي بيتك بيدك. وبعدين هو قال لي انو عايز يتزوج.
_لحظة لحظة وانتو بتتصرفوا عادي؟
_لأنه ما غلط.
_لحظة عايزة افهم كيف ما غلط.
_لما يجي هو يبقي يوريك.
_ما عايزة اشوفه ولا اشوفكم حتي بقيتو اهله ونسيتوني حتي فعز اغلاطه دعمتوه.
_(قامت وهي تقبل رأسها) حتفهمي ليه هو بيستاهل يكون فمنزلة ولد لي.
_ماشة؟!
_ايوة حيجي يزورك راجلك بعد د وان شاء الله القاك صالحتيه.
_اصالحه؟! امشي يا أمي الله يديك العافية.
----_-
_يا دكتور طمنني ليه حصل معاها كدة؟
