السحر والساحر
__________________________
في العاصمة الخرطوم توسط منزل احد الأحياء،منزل بات عليه الظلم والظلام،تخرج من جميع منافذه الدخاخين،يتوافد إليه عدد قليل من الأشخاص ومن بينهم امرأة تخطت العشرينات بشعر مكشوف وجسد ممشوق كاس عار،غطت وجهها بقماشة كأنها لا تريد لأحد رؤيتها،دخلت المنزل ثم ازاحت الغطاء عن وجهها:
_يا شيخنا المفعول بدأ يمشي فيها بس ليه هو ما اتأثر؟
_والله زولك دا الحارسو "يس" البقرأها كل يوم دي،د غير انه مواظب وبيصلي فوقته وكل لما ارسل ليهو زول يحرقه لي.
_بدفع ليك أي حاجة بس انت خليهو يكرهها،عايزاهو ما يطيقها خالص بأي طريقة بس.
_حيكلفك كتير.
_مستعدة ادفع كل شي عندي بس حياتهم تتدمر ويرجع لي.
_تمام أنتي ادفعي وانا بشوف ليك طريقة.
_ينفع احولهم ليك؟
_في الزمن د كل حاجة بتمشي.
_تمام.
-_-_-_-_-_
_مدام روان؟اصحي!روان؟
-(صرخت بقوة واغمضت عينيها)عبووود!!!
_اهدأي أنا أنسام (ناولتها كوب ماء)اهدأي..
_(فتحت عينيها بهدوء واخذت تنتشل انفاسها من الهواء) آسفة ما متعودة انو يكون معاي فالبيت فزول.
_ما مشكلة،انتي كويسة؟
_ايوة،صحيتيني ليه؟
_المفروض تأكلي حاجة علشان صحتك.
_القال ليك كدة منو؟حد اتصل يسأل عني؟
_(قالتها بتوتر)خالص.
_عيني في عينك كدة؟
_اوكي مستر عبد الرحيم اتصل وقال عندك ادوية تأخديها بعد الأكل وقال لي ما اكلمك انو اتصل،اوعك تكلميهو عليك الله،حيطردني لو عرف.
_(قالت بابتسامة)اهدأي يبت ما ح اكلمه.
_(قالت بعد أن هدأت) علفكرة عندك ابتسامة حلوة جداً،يلا قومي اكلي.
_طيب،ح ادخل اغسل وشي واجي.
_تمام.
_(غسلت وجهها ورفعت شعرها وتمعنت النظر في نفسها ثم خرجت)أنسااام؟وينك.
_(اتتها بسرعة)خير في حاجة؟
_اكلتي انتي؟
_لا اخلص شغل أول.
_(نظرت إليها بعتاب)كدة حتمرضي،غسلي يدك ويلا بطلي حركات.
_لالا ما صاح كدة.
_أنسام!!لو ما جيتي ما حأكل وح اكلم عبود أنك م شايفة شغلك.
_طيب خلاص خلاص.
_(لحظت خاتم الخطوبة علي يدها)انتي متزوجة؟
_(شردت لفترة ثم ردت)لا مخطوبة.
_عن حب؟
_ايوة. وانتي؟
_(ابتسمت ثم اردفت)برضو عن حب،واحلي فترة فحياتي كانت فترة الخطوبة؛اتعرفت فيها علي عبود من جوا ومن برا اتعرفت علي شخصيته،اتعرفت علي الحاجات البحبها والحاجات اللي ما بيحبها،صفاته الحلوة واللي مش حلوة،عرفت اني اخترت صح،عرفت أنه يستاهل يكون زوج لي اكتر من غيره وراني يعني شنو الحب ويعني شنو الراجل،انا اتعرفت عليه من قبل الخطوبة بسنة وما كنت مفتكرة انه ممكن نصل لخطوة الزواج بس لقيته جادي،عبود قبل الخطوبة ما نفسه اللي بعد الخطوبة وكمان بيختلف عن بعد الزواج؛كل مرة كان بيبين لي حب اكتر من اللي كنت متخيلاه كل مرة بيبين لي اني اخترت صح.
_(شردت مجددا ثم ابتسمت) الواضح أنه بيحبك.
_(تجاهلت جملتها)متي حتتزوجي؟
_والله ما معروف.
_ليه بتشتغلي؟مش المفروض تكوني فالبيت بتجهزي لحياتك الجاية؟
_(دمعت عينيها)الغلط مني انا لو كنت كملت دراستي ما كنت ح اوصل للمرحلة دي؛قبل ما امتحن تالت اتخطبت وعلي أساس أني حاتزوج ما كملت بس الموضوع طول ولقيت نفسي ضيعت سنين علفاضي وانا وامي برانا،وامي بدت تتعب من الشغل فبقي لازم انزل اشتغل واخليها ترتاح،لو كنت كملت دراسة ما كنت ح أحتاج للشغل د.
_ما فكرتي ترجعي تقري تاني؟
_حتي لو فكرت كيف ح ارجع؟والعمر ما حيرجع.
_ما تقولي كدة الدراسة ما عندها عمر،من اليوم ح تجي تقعدي معاي؛تمشي المدرسة الصباح،والظهر تمشي لامك ترجعي العصر هنا تمام؟
_لكن...
_بدون لكن أنا حادفع ليك مصاريف الدراسة مقابل أنك تقعدي معاي تمام؟
_انا ما عارفة اقول ليك شنو حقيقي انتي إنسانة طيبة جداً.
_علفكرة أنتي إنسانة جميلة جداً.
_طيب استأذن أنا عشان لو مستر عبد الرحيم جا ولقاني ما خلصت شغل حيطردني.(خرجت بعد ان اعطتها الدواء)
