...සසර පුරා...
කතු අවසරයකින් තොරව උපුටා ගැනීම සපුරා තහනම්‼️
🌼13 කොටස🌼
මුළුතැන්ගෙයි පැන්ට්‍රිය මත තබා තිබූ ත්‍යාගය සශීරට දී ඉක්මනින් එම නිවසින් පිට වීමට සිතා සිටියද ඒ අදහස අත් හැර දමන්නට සිදු වූයේ ඉන්දු ඇයටද කෑමට කතා කළ නිසාය.ඔවුන්ගේ හමුවට තමා බාධාවක් උනාදෝයි සිතෙද්දී නේශා ඉන්දු හමුවේ ඇවිටිලි කළ ද ඇගෙන් නම් බේරීමක් නොවීය.
"මං ඉන්න එක හරි නෑ ආන්ටියෝ.."
"විකාර නැතිව වාඩි වෙනවා"
අවසන ඉන්දුගේ තරවටු කිරීම හමුවේ නේශාට සිදු වූයේ දිවා ආහාරය සඳහා අසුන් ගැනීමටය.එහි ඉතිරි වී තිබුණේ ආසන තුනකි.ඔවුන්ගේ කතා බහට බාධාවක් නොවන අයුරින් ඇය පසෙකින් අසුන් ගද්දී ශාමෙන්දි ඇය දෙසට හෙලුවේ විමසිලිමත් බැල්මකි.නිවසේ සිට ආ සශීර බැලුවේ වාඩි වීමට තැනක්‍ ය.ශාමෙන්දි දෑසින් ඉඟි කරන්නේ ඇය අසලින් වාඩි වන ලෙසටය.නමුත් එය නොතේරුනාක් මෙන් සශීර නේශා අසලින්ම අසුන් ගත්තේ ශාමෙන්දිට සිය අකැමැත්ත පෙන්වීමට මෙය හොඳ අවස්ථාවක් බව වටහාගෙනය.කල්දේරා ද සශීර දෙසට හෙලුවේ තියුණු බැල්මකි.මැද ආසනයක් හිස් වූයෙන් කෙළවරෙහි සිටි ඔවුන් දෙදෙනාව විශේෂයෙන්ම කැපී පෙනුණි.සශීරගෙන් කොයි මොහොතක හෝ හිතුවක්කාර හැසිරීමක් බලාපොරොත්තුවෙන් සිටි එදිරිසිංහට මෙය අරුමයක් නොවීය.ඉන්දු දෙතොල් පට එකට තද කරගනිමින් කෑම මේසයෙහි අඩුපාඩු බලන්නට වද්දී අනෙක් සියල්ලම නිහඬවම ආහාර බෙදාගන්නට විය.නේශා නම් සිටියේ සශීරට සිතින් දෙහි කපමිනි.ඔහු මෙය කළේ සිතාමතාමය.ඔහුගේ වාසියට තමන්ව තුරුම්පුවක් කරගෙන බව ඇයට වැටහුණි.ශාමෙන්දි ද ඉඳහිට රවන බවක් වැටහුණු නේශා එවර හිස නොඋස්සාම ඉක්මනට ආහාර ගන්නට පටන් ගත්තාය.ඇයට අවශ්‍ය මෙතැනින් මිදී යාමටය.කල්දේරා සහ එදිරිසිංහ ව්‍යාපාර කටයුතු සිය මාතෘකාව කරගද්දී සශීර සිටියේ නිහඬවමය.ඉඳහිට හිරූ ගැන මතක් කරමින් කල්දේරා ප්‍රශ්ණ අසද්දී සශීරට දැනුනේ එය හිසරදයක් ගාණටය.ඔවුන්ට අවශ්‍ය තමා කිසිවෙකු සමඟ හෝ සම්බන්ධයක් පවත්වාගෙන යනවාද දැනගැනීමට බව සශීර දනී.ඔවුන්ට නොඇඟවිය යුත්තේද එයමය.
