💎مكتملة💎
🌙🌙🌙مرجـــــــــــانة🌙🌙🌙
✨كان يا مكان في قديم الزمان! ✨
جملة سحرية فتحات البيبان وخلات الأنس يتزوج بالجن والغول حتى هو ليه مكان..
كاين السلطان وكاين الخدم والحشم...وكيفما كاينة الفهيمة كاينا الدميمة..
كان يا مكان جملة تقالت فكل مكا...
هي كتمسكن حتا تمكن وهو لي بغاها تحضر..هي فهيمة وهو فاهم..وفاش تلاقا الفهامة مع الفهامة كتعود الندامة..وكما قالوا ناس زمان تزوج الفهيم بالفهيمة وتهنات المدينة.. كفاش تا تلاقاو وكفاش حتا تفاهموا خلاصة القول وكان الفول غير لي معندوا ضروس..ولكن راه ما جابتوا بشطيح ما جابتوا برديح..جابتوا غير بالسعد المليح.. هما يقولوا ليها تقول حماتي لالتي وبنتها مولاتي وهي تقول حماتي وجه الدلو، هي حارة وولدها حلو.. السلطان ماخطاه مرجان ماخطاه ياقوت شافها..ومن غيرها مابقا يشوف.. كفاش من بنت سيد لقاضي لمرت السلطان؟
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
▪️مرجـــــــــــــــانة▪️ ▫️من كتابة هيرا▫️ ▪️الجزء الأول ▪️
كان يامكان فقديم الزمان..كان الخير يغطي المكان..كان لعمى يتخطى الحيطان..وكان الشيخ يقطع الويدان..وكانت الريشة تقهر الميزان والعرصة تغدي القبيلة وتزيد الجيران..كان وكان حتى كان فقصبة القاضي سي عياط..
الدخاخن عالية ومعلية وكتسوط عليهم واحد البنية..قدام فران طين والعواد ريحت الخبز عطات مع صبحات شميسة وضوات..كان الفران ورى القصبة حدا الجردة..وعيون من فوق السور تاع راجل كانت تطل على البنية لي تقلب الخبز وتعاود كان حاط عليها العين وحالف تا تكون ليه..وليوم زادت صدماتوا بنت القاضي وتا تقلب فالخبز وتطيب!
صدقات مرة وقادة وخاصها غير هو وكان الزين كاين وكلشي كاين..كانت جامعة شعرها الكحل المسبسب ولابسا قفطان خضر من الحرير المطرز..وباش تدير شغلها على خاطرها كانت جامعة القفطان من الأرض على الحمم وبانو سيقانها لي تشوفهم تلف كثر ما نتا تالف..فمها حمر يبري والعين كحلة تضوي..نيفها منگاد وسدرها داك الوتاد..خلاصة القول زينها يضوي ويغري..
سمع الراجل حس الغاشي جاي وضربها بسلة قبل ما يبان وحسن يتسنا هاد ليلة لي يفضي فيها كلشي..كان صوت مشية الخديم لي معروفة ماهيا زربانة ماهيا نعسانة..غير شافت الخبز كيتقلب جات تجري وتولول..
-اناري الآلة بنت سيدي..مشيت نجيب العواد باش الفران يزناد..لقيتك داكة فيه الوتاد.
تلفتات ليها قرمات على فمها كي نقطة..طلعاتها ونزلاتها وناضت والقفطان هزاتو وكمشاتو وجاوبات
