مرجانة🌙مكتملة🌙

🌙الجزء 2🌙

▪️مرجـــــــــــــــانة▪️
▫️من كتابة هيرا▫️
  ▪️الجزء الثاني ▪️

..التنخسيس جا من تحت المانط وبكا حورية غير ما زاد كثر وهتر..مرجانة يديها على جنابها حطاتهم وعينيها صغراتهم وشافت فيها.
مرجانة: جات العزبة تشكي لقات العروسة تبكي.

حورية غير سمعات صوت مرجانة لي معروف مرة حنين مرة كي الذيب..ناضت قفزات وكتولول
حورية: عتقيني عتقيني..غير هاد لمرة والله تا نحني ليك ونغني ليك غير هاد نوبة.
يدها من جنابها حيداتهم وطلعاتهم..حدى وجهى كتشوف فيهم..ولسانها دار ففمها وهي تقول
مرجانة: سيد باقي صغير وزواج حسن ليك..ومالو لا كان حدا الحدود ياك حامي البلاد..وغير البلاد واش داير ليها اكيد مراتو وغيصلح بيها

حورية البكية طلعات معاها كثر ما هي طالعة..يلاه بغات تدوي ومرجانة تحركات جيهت بلاصت الجوهر واللوبان كمشات وهزت كتشوف..
مرجانة: ولكن حيث أنا قلبي حنين وبيت ندير لخير..غادي نعاونك وكان..أجي ارحيمو جمعي هاد الجوهر فحوايجك..نوضي تكعدي نتي احورية جبدي لبلغة ديال صم لي جاب با من التاجر علال..وأري معاك عشرة القروش ديال الفضة جمعي هادشي فرزمة وليوم تصبحي مطلقة..

رحيمو ولات تولول فخاطرها مرجانة تا من ختها سرقاتها..أما حورية ناضت تجري..لي بان ليها كتعطي..المهم تفك وعارفة ختها تسلها من هادشي بلا دم.

العشية تعاشات وفي وسط القصبة فبلاصة الدراز بلاصة نسيج الخيوط.. الزرابي معمرة البلاصة بالشكال واللوان..وقدام المنسج جالسة لا شامة طاوية رجل ومسرحة رجل..يدها خدامة ومرة مرة تقاد قفطانها لي مطرز بالعقيق الحُر، ولا تقاد خيط روح لي فوق شعرها الكحل..جالسة ونافخة ريشها وعلاش لا وهي مراة القاضي سي عياط اللولة.. باها تاجر وراجلها قاضي وولدها الكبير طبيب وما تبقا من ولادها الستة عندو لخير تولدات فالخير وتزوجات فيه وولداتو..وخا كبرات بحكم زواجها فسنها الصغير باقة عاطية للعين وكاع زينها شداتو بنتها الوسطانية مرجانة..

طلقات ودنيها فاش سمعات صوت لا مرزوقة ضرتها جاية..ميقات وجها وهي كتقول فخاطرها سبحنا على الله غير جلسات حداها مرزوقة وبدات تغوت باش يزربو في الخدمة لبنات لي قراب ليها ولي تجمعو على الحثيث وخدمة اليد ها شادة المفتل ديال الخيط كتفتلو وها لي شادة السحيفة كاتقادو..

كيف كيقالو مكتصحاح المرة حتى كتشوف الضرة.. وهادشي لي دايراه شامة بغات تبين ليها بلى وخا تطير وتنزل هي الكل فالكل..دورات مرزوقة عينيها كتغدد وتشوف فلي معبرتها ما كلمتها..كانت صغر منها بخمس سنين ولكن هي وياها تقادة وحدة غير مرزوقة شهبة..وعندها بنت وحدة قدها قد مدة زواجها ربع سنين.

تحطوا الصواني لي يخلو القلب هاني..ها أتاي مشحر لي يخلي القلب معمر ها لفاكية ها المسمن المذهون وها لبغرير لي يخليك ممحون..خلاصة القول الميدة عمرات ودنيا خوات..بقات غير شامة ومرزوقة لي بنتها جات.