💎مكتملة💎
🌙🌙🌙مرجـــــــــــانة🌙🌙🌙
✨كان يا مكان في قديم الزمان! ✨
جملة سحرية فتحات البيبان وخلات الأنس يتزوج بالجن والغول حتى هو ليه مكان..
كاين السلطان وكاين الخدم والحشم...وكيفما كاينة الفهيمة كاينا الدميمة..
كان يا مكان جملة تقالت فكل مكا...
جلسات فين كانت..معرفات ما تدير ولا تقول..جو غريب وجديد داخلة ليه!
هزات عينيها كتشوف فالقمر لي مع الظلمة بان..كان بعيد ومدركه الشجر..وهي بقات كتجبد عنقها باس تشوفه!
شافها اش كدير..تبسم فخاطره بلا ما يبن وناض..لايح عليها هاد لكلام! -تسايني هنا !
مشا حتى تم جاي جيهتها..مكركم فيديه زيف من زيوفها! نوضها..والزيف لبسها..كيدخل كل شعرة خارجة ليها..بشوية ومركز عليها!
مد يديه وسد فيدها..مزير عليها..وجرها معاه جيهت الجنان لي قريب للباب! قبل ما يوصلو لتما..خلاها ومشا للجنود لي واقفين تما..بحركة منه كلشي تحرك خارح من تما!
رجع ليها..جارها من يدها..حتال جنان ووقفها حداه..بقات كتشوف السماء وعاجبها ما دار ليها!
حورية بعفوية بالغة فصوتها: هنا السماء باين فيها النجوم واضحة! جاوبها..مسايرها -على قبل الجبال لي قريبة من هنا.
السكوت ضار بينهم.. هي حاضية السماء وهو حاضيها! شافها كتحرك يدها على كتافها..ومشى بغا يجيب ليها سلهامها.
فطريقه ليها وقفاته نجوى مبتاسمة -حورية كتبان ظريفة..الله يرزقكم بالدرية الصالحة. رد عليها بنصف ابتسامته المعتادة مع "آمين" خارجة بهمس خفيف.
نجوى: قلت لك متخاف من والو..مغيوقع ليها والو..كان عليك توكل على الله شحال هدا وتزوجها..كون دار عامرة ولاد دبا!
طبطب على كتفها..بعد ما رمى عليها هاد الكلام وخلاها. -حتى دبا وقع غير الخير..بحال دبا بحال قبل عام.
قفزها..حاط السلهام على كتافها..شداته من يديه..مبسمة ليه..يده لي طلقات من السلهام مشات لوجها..مدخل شعرها..لي خرج من الزيف ومس وجهها..لقاه بارد!
الغالي: دخلي سبقيني..الحال بارد عليك!
دارت ما قال..وهو مشى للجنود يرجعو فين كانو..وتحرك جيهت بيتو..لقاها مكايناش! خرج طال ولقى الضوء جاي من البيت لي حداه..البيت لي حورية شداته لمرة لولة!
