▪️مرجـــــــــــــــانة▪️
▫️من كتابة هيرا▫️
▪️الجزء الواحد والثلاثون▪️
مدخلينها للحريم..والجواري خرجو وبيها ضايرين..هزات العين..كتحسب فيهم وتبلق فيهم وغير الزين على الزين!
وحدة الخدم حانية الراس وقايداها لطريق..لبيت هنية!
دخلات ولقات عائلة السلطان مجموعين..والخدم بيهم ضايرين
نقلات عينها بين كل واحد..هنية ولطيفة وفخرية هدو عرفاتهم..كانت لطيفة جالسة حداها فخرية من ليسر..وليمن فجنبها جوج كيشبهو لطيفة!
وحدة جالسة..ورجليها ثانية..كتشوف فمرجانة مبسمة..والثانية شادة ولدها حداها وكتشوف فيها مخنزة..نفس الولد لي ضرباته فالجردة!
تلفتات لجيهة هنية..لقات حداها غير وحدة..من الجلسة وهزت الراس باينة مرات السلطان لولة!
تبسمات مرجانة..حنات الراس وطلعاته..اشارو ليها تجلس حداهم وداكشي لي دارت.
بدات لطيفة معرفة بتريكتها لي حداها!
-مني للقصر دخلتي..خاص تعرفي معامن وليتي "أشارت للي حداها ولد" هدي بنتي لكبيرة زاهية ولي حداها ولدها..والبنت الثانية عائشة هي بنتي الصغيرة باقة للحنة مادة يدها..وهدي فخرية مرات السلطان الثانية "كتشوف فهنية ولي حداها" ولعزيزة!!
هنية ضحكات..وبيدها صفقات..ودوات.
-لحلاوة هي المرة لولة "أشارت لي حداها" خيط الروح المرة لولة لسلطان!
عيات ما تشد مرجانة فمها لكن لي عطى عطاه..محسات حتى قالت فجوفها
-والثالثة ثابثة!
طلعات عينيها مبسمة لكل وحدة..حشمانة وظريفة !
فخرية قالت هاضرة مع لطيفة: حتى هي بحالنا غتشرب الدوى..ولا غير حنى!
لطيفة: حتى إلا مشرباتوش منافع معاها والو..باقي مبلغات والحمل مغتحملو!
شافت فيهم مرجانة مستغربة..وشرحات لها عائشة بنبرة ظريفة.
عائشة: من لحرب الكبيرة..باش متعاودش مرة خرى..عيالات وجواري السلطان كيشربو دوى كيبرد الرحم..حتال نهار يقرر مولاي معامن يولد عاد هي تقطعو.
مرجانة: باقي ما بلغت كنضن كيف قالت"شافت فلطيفة" مغاديش نقدر نحمل.
هنية: وحتى الا بلغتي..بلا ما تعذبي..حيث قريب خيط الروح تقطعو..وهي لي غتحمل.
ردات عليها خيط روح بـ إنشاء الله وفخرية خرجات ضحكة ساخرة من فمها.
خيط الروح سكوتية..وفخرية فليفلة..لكن مرجانة عرفات بلي الله ينجيك من الساكت إلا دوى داكشي علاش ركزات مع خيط روح متبعة حركاتها وهي كتهز الكاس تشرب أتاي!
لطيفة: إوا حتى ينطقها السلطان..متسبقوش الختانة على الولادة!
هكا بقاو لطيفة تدوي وهنية ترد عليها..مفاتنين غير بحدهم..وحد ما تسوقهم..مرجانة عيات منهم..وبدات تفوه عليهم..زعما قاتلها النعاس حتى خلاوها مشات!
دخلت هي ورحيمو لبيتها..لي الخدم وروه ليها..ضورات عينها فكل بلاصة عاجبها!
جلسات فوق السرير ورحيمو جات حداها.
رحيمو: سولت على لي قلتي..مولاي مورا الزواج خرج مع القايد الغالي..ولدبا مارجع شي!
مرجانة: غير خليه..وقته ماشي دبا باقي لحال عليه..خليه ميقربش لطريقي..ومبسع مني..فاش نخوي هاد الحريم ديك ساع عاد غنديرو فعيني..وداك الولد لي مفاتنين عليه انا لي غانولدو ليه!
ناضت جابدة الصندوق لي فيه حوايجها..وفلوسها..الحوايج حيداتهم..والفلوس جبداتهم !
مرجانة: عاونيني وخوي ليا السرير..اري شمع غنلصق بالفلس بالفلس تحت السرير!
بجوجهم تعاونو حيدو لي على السرير وقلبوه..جلسات مرجانة هي ورحيمو..يحطو الشمع فقاع الفلوس ويلصقو مع السرير..حتى تحت كله عمر قروش!
الليلة حد ما بات فيهم…قابلو غير تلصاق الفلوس ليهم!
ــــــــــــــــــــ
جالسة فبيتها وعينها فالشرجم كل مرة تقول دبا يدخل!
ناضت قافزة..خرجات برى فرحانة..فاش شافته وتلقات ليه.
حورية: فين كنتي؟ سولات عليك خالتي دريسية..قالت بغاتنا نجو عندها.
تبسم حاط يده على حنكها..ماسح عليه وجرها من يدها لبيتها.
دخل وعينه مفحصة بيتها..بيتها قبل زواجها..شافته وهي لي ولات جاراه بغات توريه كل قنت فيه..حتى وقف مقصح من يديه..وشاد كتفه!
تلفتات ليه..وبقلق سولات فيه.
-مالك؟ واش كيضرك كتفك؟
جلس فالسرير..حاطه سيفه حداه..عاطيها بضهره..وقميصه حيده.
-مقصح..دلكيه ليا !
▪️توقعاتكم وأرائكم ▪️
أنت تقرأ
مرجانة🌙مكتملة🌙
Romance💎مكتملة💎 🌙🌙🌙مرجـــــــــــانة🌙🌙🌙 ✨كان يا مكان في قديم الزمان! ✨ جملة سحرية فتحات البيبان وخلات الأنس يتزوج بالجن والغول حتى هو ليه مكان.. كاين السلطان وكاين الخدم والحشم...وكيفما كاينة الفهيمة كاينا الدميمة.. كان يا مكان جملة تقالت فكل مكا...
