مرجانة🌙مكتملة🌙

🌙الجزء 3🌙

▪️مرجـــــــــــــــانة▪️
▫️من كتابة هيرا▫️
  ▪️الجزء الثالث ▪️

الضحكة ما بغات تحبس ليها ضربات على كتف ختها ودوات وخلات لخرى تحماق
مرجانة: هادي غير خالتو وكتخلع أما هو غيكون كفس من شوفة الضبع.

خرجات شامة مع الخدم كترش الزهر وتزغرت..سلمات عليهم ودخلوا لوسط القصبة جلسو والعينين تهزو..كلشي حاضيهم وحاضين الخير لجا بيهم..ها لقفاطن لي يعمرو لعينين ها سناسل مذهبين..ها المرجان والياقوت ها ما بغات الروح..مرزوقة كتطل غا من لقنات ما بغات تبان..ما تسوقها حد وخرجات عارضة راسها لراسها.

خالت الغالي لي سميتها دريسية دورات عينيها ونطقات
دريسية: إوا فين هي العروسة..ليوم إلى كتاب بغينا نوليو نساب..واليوم قبل غدا نزوجوها لولدنا..راه شهور وحنا داويين.
دريسية لي قالت هو لي كاين..شهور والهضرة كتدور ودبا جا وقت المعقول..صيفطات شامة وحدة من لي كانو واقفات تعيط لحورية وبقات مكملة الحديث مع دريسية ومرة مرة تلاح مرزوقة للهضرة..والرجال لي فيهم عائلة العريس وخوت العروسة كانو معزولين.
خرجات حورية وهي باللثام مغطية زينها الفتان..كانو ملامحها هاديين ومزنگين الهضرة تقالت وزواج كتاب ما لقات ما دير غير تبع التيسير.

مرجانة ما بغات تخرج ما بغات تدرج مشات غير الكشينة تابعة رحيمو وتقول بغيت طاجين بغيت طاجين فيا جووع فيا جووع!!
جلسات العروسة حداهم ولثامها حيداتو ويا ما زيناتها شامة بالهضرة وعلات شانها..تحط العشاء لرجال والعيالات على ضواو شموع حيت دنيا ضلمات وتوالات..سلاو العشا ودريسية ناضت بغات تدير فيها فهيمة وجلسات تدوي ولحورية بغات تقري

دريسية: ولدي الغالي كنشوفو قليل ولكن راه تربية اليدين..معاه ما يخصك خير يديرك بين عينيه ويهزك بسنيه..سميتو معروفة وموزونة وشكون ما يعرف الغالي بن جابر فالحروب هو لول وديما جايب النصر..وخا هادشي كامل هو يتيم ما عندو لا حنين لا رحيم غير سيدي الكريم…بقيت ليه غير أنا يشم فيا ريحت مو وأنا دايراه واحد من ولادي وبحالة داگة بيه وتادي..نتي إلا كتاب مراتو لولة وإنشاء الله يكون منك التمام سمعي نقول ليك زين الوجه كيزول وزين العقل كيدوم..والمعقول هو لي خاصو يكون..خلي فمك مغلوق وقلبك صندوق هزي ليه همو وغمو ولا تفضحي سرو..ما تكلمي حتا تخممي وعقدي لسانك عقدة صحيحة لا تجيبي الفضيحة..الراجل بدراعو ماشي بمتاعو..كيف ما خاصك تديري ليه خاص يدير بيك والحق يتقال هو راجل وقدها قدود..أنا عارفة السكنة تما غتجيك صعيبة وبعيدة ولكن هذا هو مكتاب البنات وعلى دار باهم غايوليو مغربات..دار بانا وخا نكبرو فيها أخرتنا غادي نجو ضياف..باك معروف وباينة التربية غير منك ومن خوتك لي سبقوك "تلفتات لشامة وكملات" إوا نتي عارفة هو ميقدرش يجي والزواج غا يكمل بلا بيه فاش تروح وزواجهم يولي مكمول انشاء الله يجيبها ويجي يزور..