▪️مرجـــــــــــــــانة▪️
▫️من كتابة هيرا▫️
▪️الجزء الثاني والأربعون▪️
جا الصباح..والديك صاح.
الغالي عينيه حلهم..وعلى حورية لي ناعسة حداه حطهم..شعرها لي كان مفكوك على وجها طاح ورفع طراف صباعه كيحيدهم.
وهاد شي فيقها..وخلاها تحل عينيها..هو تبسم لها..وهي حدرات عينيها.
ناض من حداها..لبس غير سرواله باش ميحشمها..ورجع ليها..كيمسح على شعرها وينوض فيها.
الغالي: إلا كنتي عيانة غير بقاي ناعسة..غادي نمشي للخدمة..ونقول لهم معايا يجيبو ليك لفطور.
غير قال عيانة وفكرها..زادت غنغات بالحشمة صوتها.
حورية: لا أنا نايضة.
تبسم وقرب باس ليها يديها..جبهتها..ومشى باس حتى راسها.
الغالي: الله يرضي عليك!
نفس العبارة لي سمعات..قبل ما لبارح نعسات..قالها ومشى مخليها على راحتها..وغير زادت تخشات فمخدتها!
ـــــــــــــــ
النفار على باب الحريم عالم بوصول السلطان..كلشي تستف مرحب بيه..ورحيمو هي ومنى تجمعو خايفين..العشوب حتى وحدة فيهم ماقدرت تحطهم وجملة مرجانة مكيناش بقات فالحريم بحال الرنان..واليوم يوصلوها للسلطان!
غير السلطان دخل من الباب وتسمع صوت مرحب بيه..والصوت سكت فاش لالاهم مرجانة جاية لاسقة حداه.
مرجانة كانت مع السلطان!
بدات الهضرة كتكتر..وفخرية بغات تفكر..تافقت معاها..ودبا جاية داخلة معاه!
قالت غير مسمنة تعجنوها بيدكم..وجات موراهم..وهاهي داخلة معا السلطان!
مرجانة بانت لها زاهية كتشوف فيها..وبقات كتسيفط لها شوفات فقسوها..تحرق البيت والفلوس مشاو ولكن لمهم فقساتها..ودبا غا تكمل ليها!
لطيفة جرات السلطان من وسط الجماعة تهضر معاه..وهي بقات تما وكل واحد كيشوف فيها شوفة ديال تطيحي بين يدي نقتلك.
قربات لزاهية هي الأول وجلسات حداها..فاصل بينها وبين السلطان غير خامية غافلة عليها الزاهية!
الزاهية: داخلة بوجه الظريفية..ونتي غير لفعة!
لوخرى كتطلع الشوفة بشوي فيها..وتسبل فعينيها.
مرجانة: أنا؟ حرام عليك كتظلميني..أنا شدرت ليك حتى بيتي حرقتيه..كون كنت فيه كون مت!
الزاهية: حريق البيت ما نفعش وباقة غادة نزيدك حتى تحطي وجهك!
مرجانة: حرام عليك..حاسباك بحال ختي أنا!
ردات عليها..وناضت حاطة يدها على عينيها..وبالخف نغزات رحيمو تبعها!
خلات الزاهية مفاهمة والو غير ضارت لقات الخامية مرفوعة عليها..السلطان مخنزر كيشوف فيها..ومها من وراه كتولل ليها!
رجل هنا ولهيه..غادة ماشطة وناشطة..وخا دقتها باقي ما بردت!
فطريقها لبيتها.. فخرية هي وخدامتها وقفات عليها..كتطلع وتنزل فيها.
فخرية: هدي غير الدرويشة واش دارت! ياك قلت بغيتي تعيشي فالقصر هانية ومغاديش تقربي للسلطان!
قربات مرجانة ليها..وحيث هي طويلة عليها تحدرات حتال عندها..وربعات يديها.
مرجانة: وشنو ندير..إلا هو ختارني؟
ضحكات الأخرى فوجها..وحاولت حتى هي تقرب لها.
فخرية: سمعي نقولك..الليلة عندي الخلوة مع السلطان..موراها نشوفو شكون غادي تختار "كتطلع وتنزل فيها..وشافت جيهت خدامتها" يلاه تبعيني للحمام..باش نوجد للسلطان!
فكتف مرجانة ضربات..وزادت..ومخليا الأخرى كتدور لسانها..بين فمها..تلفتات لرحيمو وغير شافت شوفتها..وعرفات هاد ليلة كحالت عليها.
مرجانة: طيري دبا من حدايا..بدلي الحنة ديال الشعر لي كتطلي بيها راسها ولحمها..وحطي الحنة العادية وزيديها الحامض الحر..خلينا نشوفو واش هاد الخلوة..غتكمل وهي كلها حمرة!
▪️توقعاتكم وأرائكم ▪️
أنت تقرأ
مرجانة🌙مكتملة🌙
Romance💎مكتملة💎 🌙🌙🌙مرجـــــــــــانة🌙🌙🌙 ✨كان يا مكان في قديم الزمان! ✨ جملة سحرية فتحات البيبان وخلات الأنس يتزوج بالجن والغول حتى هو ليه مكان.. كاين السلطان وكاين الخدم والحشم...وكيفما كاينة الفهيمة كاينا الدميمة.. كان يا مكان جملة تقالت فكل مكا...
