مرجانة🌙مكتملة🌙

🌙الجزء 15🌙

▪️مرجـــــــــــــــانة▪️
▫️من كتابة هيرا▫️
▪️الجزء الخامس عشر▪️

هزو الحوايج وداوهم حتا وصلوهم لبيتها..بيت قريب من بيت القايد الغالي!
دخلات ليه مظلم..مشعلات شمع ما قلباته بالعيا مشات لسرير نعسات..مفاقت غير على صوت العشاء كيأدن..نعسات من العاصر للعشاء!

فاقت وكلها عرقانة..العيا والتسخسيخ طاح عليها..خرجات وبقات كتطل على بيته..والظلام كان جاي منه.

مشات لنفس الطريق للگلسة ديال گويلة لي مشات ليها..ولقات نجوى فيها..تبسو لبعضهم فاش شافو بعضياتهم..الگلسة جاية وسط الدار منها للهوى بالمخاد وزرابي الصوف مقادة..والجنان داير بيها..كان الليل الشموع والقنادل مشعولين..وحورية مشات حدا نجوى وتما كلسات مركنة.

نجوى: بنتي ليا طولتي..ومبغيتش نفيقك ونخسر ليك نعاسك..بغيتي تاكلي؟
حورية: لا مافياش..كون غير فيقتيني طولت.
نجوى: حتى دبا ما وقع حتى مشكل "سكتو بجوج حورية كتهز راسها تبغي تهضر وترجع تنزلو..شافاها نجوى وكملات كلامها" غير قولي أش عندك

بتلعثيمة هضرات..ولحد الآن ما ولفت.
-عاودي ليا..عليه

نجوى ضحكات بحنية..كانت كتسنا اليوم لي يتزوج ويعمر داره..وليوم حلمها تحقي وغيحلق.

نجوى: نتي أول بنت تدخل لهنا..كاع الخدم لي شفتي كانو عيالات..وغير خمسة..كيكونو غير مرة مرة..وانا لي ساكنة هنا..لي بقى غير جنود مكيفتوش عتبة الدار..القايد الغالي وفيّ للسلطان..وباش حنا نبقاو بهاد راحلة البال..هوما لي هازين عليهم تقال..داكشي علاش وقته كله فساحة  القتال..لي هنا ولف طبعه وكيف داير..سذوتي وقليل الكلام..ماشفنا منه عيب..نهاره برى الدار..واقف على الجيش هنا ولهيه..اليوم حدا السلطان داخلين لبلاد من البلدان..والغد ليه هنا واقف على الشغال لي كاينين..كان فخباره الزواج..ومقال لينا ولا علمنا..كون ما مرسول الدريسية خالته..منعرفو گاع..نتي ولا هو معارفين بعضكم ولكن هدو هو لمكاتب..وخا بان ليا هو عارف عليك لي متعرفيه..الا دار هو خطوة ديري جوج..والا بعد بخطوة جي عنده بخمسة..كلمة مني نعطيها لك..لي بغيتيه غايعطيه ليك..حنا ولي غير مقابلين الدار مهلي فينا..ومراته غتكون فمقام كبر..إوا هذا لي عندي دبا..وقت ما خفتي ولا تقطع بيك الحبال..صدري ليك رحال.

حورية رضات عليها بتبسيمة..لي سولته كيعززه ويكرمه..تفكرات بيته لي ما فيه حس النفس وسولات
-شفت بيته فيه ظلام..واش مكاينش؟
نجوى: جا غير بدل حوايجه مشى..محال يرجع هاد ليلة..يمكن عرف خبار وصلوك..غير صبري قريب غايگلس كيف مالف.

ليلة ديال عرسهم..خلاها وزاد تقلقات ولكن حطات التبسيمة عل وجها كيف ديما..بقات تجمع مع نجوى كلمة منها وكلمة ليها..حتى وصل وقت نعاسهم..نجوى خلاتها ومشات..هي بقات كتشوف فسماء حتى سهات..البرد تحرك ونضات..ماشية جيهت البيت.