▪️مرجـــــــــــــــانة▪️
▫️من كتابة هيرا▫️
▪️الجزء الثالث والعشرون▪️
بعد عليها..خلا السخانة طلعات ليها..حدرات الراس مخرجة عينيها..مبقات رفعاتو !
الغالي: نوضي سخني ليا الحمام.
لقاتها من الجنة والناس..دغيا ناضت من حداه هربانة!
وجدات الحطب للحمام وشعلاتو..من بعد ما سولات نجوى على بلاصتو..عطراتو وقاداتو..ومشات بشوي خايفة باش تكلمو!
دخلات للبيت لي كان مرضوض..لقاته رجع السيوف لبلاصتهم..وحوايجها كيحطهم..فصندوق كبر من الأول كيستفهم ويقادهم..حدا حوايجو !
حنحنات..حانية راسها..حشمة ولا خوف! كلشي تجمع!
حورية: راه الحمام..وجد.
سمع صوتها..وضار لعندها..سد عينيه وحلها..بمعنى راه فهمت..لكنه بقا متبع ليها العين وهي معرفت اش كيتسنا منها!
بزربة وبتلعثم كيجيب الضحك نطقات
-واش نحك ليك ظهرك!
ــــــــــــــــــــ
رحيمو شافت فيها..شاجة فراسها لي زند عليها..من الفران ومن مرجانة لي وقفات عليها!
رحيمو: واش غادي تزوجي..وتحماقي كثر ما نتي حمقة..تبتي فدار راجلك..متجبيش الفضيحة.
مرجانة: تما مكاين فضيحة..كاينة غا الحيلة!
قلبات رحبمو لخبز..وحيدات لي طاب..وردات عليها وهي مقابلة الفران.
-اش عوالة ديري عاود..واش الزواج بالسلطان ما معمرش ليك العين حتى هو ألالة!
مرجانة: نتي عارفة..الضريرات وشغل العگوزات معنديش معاه! الراجل غيبقا غير ليا وكان..وهو أصلا غيكون غير ليا! راه لي تزوج بيهم قبل عمرو قاصهم!
رحيمو: واش حتى حريم السلطان مغاديش تهنينه! اش عرفك بأش طاري فالقصر ألالة..الخفية ما يعلمها غير الله.
حمرات مرجانة فيها وهي كتقول: أنا لي عارفة لي كاين!
هادشي فكرها فالعسة لي كانت كتضرب فالسطاح!
السلطان زواجه لول لي وجداته جداه كان هدي شهرين..وبعد زواجهم كانت حرب..ومن تما السلطان مبقاش فالقصر..وزواج الثاني لي وجداتو مو..كان قبل شهر! وحتى هو جا بالحرب ومن تما خرج من لقصر ورجع اليوم!
العسة لي تفكرت كانت على خديم سلطان لي ساكن حداهم وكيكون ديما مع السلطان فالقصر!
كتعرف السلطان خرج من قصره..غير فاش كتشوف الخدام رجع لدار! ونهار مكيرجعش مكيرتاح ليها بال!
مرجانة: حريرتي حريرة..بيمن نبدا فيهم وامتى!
رحيمو: ألالة مرجانة خلي القصر هاني..وخا دخلتي ضرة..بقاي متبتة..كل واحد واش مكاتب ليه!
مرجانة: المكتاب هو لي كاين..لكن مخاصش نرجع لور ونبقا نشوف..بحال المكفوف..خاص ندير باش لقى..كيقولو مد رجليك..قد لحافك..لكن انا بغيت نفصل لحافي..ونطولو حتى نسرح رجلي عليه ويبقا طويل!
قالت كلامها..كتشوف فالشجرة الكبيرة قدامها..سهات مفكرة فاش كانت صغيرة ما جرى ليها !
غادة كتسلت وتطل هنا وهنا لا يحصلوها..بيديها الصغار شدات قفطانها..رافعاه من الأرض غير بانت لها الدنيا خاوية..مدات رجلها ولشجرة طالعة..كيف ديما ككل ليلة..كتهرب من القصبة وهي مسلقة الشجرة..كتشوف الدنيا لي برى ولي ممنوعة عليها!
لكن هاد المرة وحلات فوق الشجرة! إلا غوتات غتفضح..وإلا بقات تما غتفضح!
ضورات عينيها..للولد لي گالس فوق الصخرة المقابلة ليها.. كانت كتشوفه ديما كالس تما وعارفة علاش لكن عمرها دواته ولا قربات ليه!
مها علمتها طريق المرة والراجل مكيتلاقاوش..والمرة كتهضر غير مع الراجل لي تزوجاته! باها ولا لي من عائلتها..الراجل لي حلالها وحرامها!
بقات كتهمس للولد بصوت خفيف..تلفت جيهتها..شافها واحلة لكن حيد عيونو عليها.
مرجانة: فكني ونعاونك..غنعاونك ترجع مك.
من صغرها حرايمية..وكتعرف علاش تلعب! غير سمعها اش قالت..ناض مصدوم..طفل بملامح غير بارزة..لكن واضح عليه فات مرحلة البلوغ!
بدى كيطلع من صور القصبة ووصل للشجرة بسهولة بدا كيتسلقها....حتا وصل لرجلها..لي واحلة ليها فكها..ونزلات هي بزربة مخلياه تابعها.
بان لها الدم نازل من قاع رجله..كان تجرح وهو كيعاونها..تلفتات لقفطانها..بغات تقطعو تحزم رجليه..لكن كان القفطان من الحرير وعاجبها!
تحنات قطعات من سرواله وحزمات ليه رجله!
فيق مرجانة من ذكرياتها..غير رحيمو لي كتنغز فيها..من صباح وهي كتدوي معاها..وكاع ما داتها فيها!
رحيمو: بسم الله عليك..من صباح وانا كنهضر ونتي سارحة.. فاش كتفكري ألالة!
شافت فيها..وبابتسامة لعوبة ردات عليها.
-كنفكر..فشحال ديال الصداق غيعطيني السلطان..زعما ما يكتبش ليا نص البلاد!
▪️أرائكم وتوقعاتكم؟ ▪️
كنتمنى حتى حد ما ينفر من لقصة حيث السلطان مزوج بجوج قبل مرجانة.
انا كنشوفه كموضوع كوميدي ضايف نكهة للأحداث..كنتخيل اش غيوقع بينهم كنبقا غير نضحك بوحدي😂.
وكيف قالت مرجانة..فلخر غتبقا غير هي..وراه قبل ما تكمل 10 ايام دزواج غادي تجري على وحدة منهم!
فنفس الوقت بغيت نتطرق للموضوع..وأسبابه..وكله فيه إفادة وحكم.
عاودو تخيلو معايا..الأولى جابتها جداه..والثانية مو..يعني كل وحدة فيهم كتدعم وتعزز لوحدة..واتجي ليهم مرجانة من لفوق! العافية غتشعل فداك القصر😂.
انا قبل ذكرت ان السلطان لقمان (بات البطل) كان مزوج بثلاثة العيالات..وثالثة هي مت البطل..لكنها ماتت..ووحدة من عيالات لقمان هي لي عاونت فتربية البطل وزوجاته.
أنت تقرأ
مرجانة🌙مكتملة🌙
Storie d'amore💎مكتملة💎 🌙🌙🌙مرجـــــــــــانة🌙🌙🌙 ✨كان يا مكان في قديم الزمان! ✨ جملة سحرية فتحات البيبان وخلات الأنس يتزوج بالجن والغول حتى هو ليه مكان.. كاين السلطان وكاين الخدم والحشم...وكيفما كاينة الفهيمة كاينا الدميمة.. كان يا مكان جملة تقالت فكل مكا...
