▪️مرجـــــــــــــــانة▪️
▫️من كتابة هيرا▫️
▪️الجزء الواحد والعشرون▪️
عيط على خدام كان واقف تما..جا عنده حاني راس! طول شوفة فيها ورجع عينيه للخدام لي حداه وقال:
-قول للبراح يطلق الخبار..مرجانة بنت القاضي عياط بالسلطان شمس الدين بن لقمان..غتزوح قبل رمضان!
حنى ليه العبد راسه وهو كيقول "أمرك أمولاي"
تم غادي بحاله..عاطيها بظهره..حتى وقفه صوتها..صوت رقيق..وغالبة عليه المحنة!
مرجانة: مولاي السلطان.
ضار عندها..لكن عينه ما تحطاتش جيهتها! جات عنده كتمشى بشوية وترمش فعيونها! حتى وقفات مقابلة معاه..قريبة ليه..طويل وعريض عليها والإ وقف قبالتها كان يغطي الشمس عليها..حطات يدها جيهت عينها على الشمس الحارة لي نازلة عليها..ويد كتلعب فشوشة سلهامها!
مرجانة: بغيت نهضر مع مولاي..إلا بغى!
بعد عليها..رجع بخطواته فاصل بينه وبينها..والعين محطهاش جيهتها..قال معنده وزاد مخليها بحدها!
-الهضرة مع القاضي عياط.
بقات كتطلق ضحكات ساخرة مصدومة قصيرة! تقرصت من أش دار! وولات كتلفت فكل قنت تشوف شكون شافهم..كفاش حتى الشوفة محطهاش فيها..وهي العين مكتنزل من عليها!
بقات فوضعها..حتى بان ليها باها..كيشير عليها !
جات عندو..ومن لقصر خرجو..بغات تسولو..لكن من شوفته قالت بلاش..هي كانت عوالة تمشي هي وياه..لي قالها تقادها..وتسلك من هنا ولهيه..ساعة مصدقاتش ليها..ومعرفات أش دار بينو وبين السلطان شمس الدين!
وصلو لدار..كتسنا غير مها تشوفهم ويقول لها باها لي كاين..وداكشي لي كان..غير شافت مها..وحيدات من حداهم..خلاتهم دخلو للبيت وهي بقات كتسنط من لباب!
شامة سولاته باش يفهمها من الأول..وذكرياته قادوه للي وقع بينه وبين السلطان!
مشا عياط للمجلس لي كيجلس فيه السلطان! فين كيعطي الحكام ويتجمعو الوزراء! كان غير هو وياه بحدهم والحراس لي على الباب..بيت نقي ومتول..وداخله نور الرحمان!
القاضي تحنا للسلطان مسلم عليه ومبارك ليه..على الحرب لي رجع منها رابح! جبد من عنده الرسالة لي وصلات لداره من عمته..والورقة البيضة لي فيها ختامه!
عياط: واحد من رعيتك..وتحت جناح حكمك..بغيت نفهم لي خاص نفهمه أمولاي!
الرسالة عارف شكون صيفطها..لكن الورقة لي فيها ختماه..تفكر بلا كانت فسلهامه..من طبعه فهيم..ويربط بين ديك وديك..داكشي علاش فهم لي وقع!
وعاود كل ما طرى للقاضي عياط! مني حصلوها هازة الخنجر..حتال الدار لي تحبسات فيها وعلاش..الخيل والسلهام لي تسرق..وكفاش رجعات !
القاضي..ربط بين كلام السلطان وكلام بنته لي قالت لمرته..لقى المزغوبة زعلكاتها كذوب عليهم! القضية فيها اسمهم ووجهم بين الناس..داكشي علاش دار راسه مفاهم والو!
القاضي: هضرة الناس سم أمولاي..الحقيقة كتقول وهوما كيقولو..وجهنا وسمعتنا بين يديك أمولاي..يا تمرمد فالتراب..يا تعز ونبعدو من الخراب.
قال لي عنده..وتم راجع بلور..وهو باقي حاني راسه..كيتسنى السلطان اش يقول!
ريح قلب عياط..فاش قال كلامه ومشى وخلاه!
-وجد للزواج..بعد خمس أيام!
عياط: أمرك طاعة أمولاي "كيحني راسه وبكية الفرحة شاداه" أمرك طاعة أمولاي.
كل هادشي لي تفكره عياط..لمرتو قالو..لكن ما ذكرش لي عاود ليه السلطان! قال ليها غير بغاها للزواج..وغيكون بعد خمس أيام..فكر مع راسه..وقال الحقيقة غاتبقا مدفونة وحد ما يعرفها!
ضرباتها شامة بتزغريتة حرة تديرها وتعاود..يا فرحي يا سعدي..دارنا مع السلطان تناسبت!
مرجانة لي كتسمع..دورات لسانها بين فمها..كتمشا وتعوج..وخا باقى كتعرج..وبشوي كترمش..وتقول السلطان فيا طيحته!
▪️أرائكم وتوقعاتكم؟ ▪️
نوضي الله يجيبك على خير ابنتي😂.
ولدي درويش مبقاش بغا يحط عليها العين ولا يقرب لها تا يتزوجو😌.
بخصوص حتى حد ما داها فإسم السلطان..شمس الدين ☀️
أنت تقرأ
مرجانة🌙مكتملة🌙
Romansa💎مكتملة💎 🌙🌙🌙مرجـــــــــــانة🌙🌙🌙 ✨كان يا مكان في قديم الزمان! ✨ جملة سحرية فتحات البيبان وخلات الأنس يتزوج بالجن والغول حتى هو ليه مكان.. كاين السلطان وكاين الخدم والحشم...وكيفما كاينة الفهيمة كاينا الدميمة.. كان يا مكان جملة تقالت فكل مكا...
