▪️مرجـــــــــــــــانة▪️
▫️من كتابة هيرا▫️
▪️الجزء الثاني والعشرون▪️
مرجانة لي كتسمع..دورات لسانها بين فمها..كتمشا وتعوج..وخا باقة كتعرج..وبشوي كترمش..وتقول السلطان فيا طيحته!
شافت رحيمو غادية جيهت الفران..غادة بالخبز جيهت فران العواد!
تبعاتها لاسقا فيها.. جلست رحيمو تطيب فالخبز ومرجانة حداها..شافتها رحيمو ضاحكة وفرحانة..وهي تسولها.
رحيمو: أش طاري ألالة مرجانة؟
هزات مرجانة قفطانها..مرة تلعب بيه مرة تسرحو..سارحة فخيالها !
-متقوليش لالة مرجانة..قولي مرات السلطان لالة مرجانة!
ضحكات رحيمو..كتشوف فيها..وردات عليها
-الگنازة سبقات الموت..ومالك واش غير نتي لي غتولي مراته..راه سبقوك جوج!
خنزات فيها..والصوت الحنين..رجع كيف الذيب.
مرجانة: شكون قالك غادي يبقاو! وحدة مزوجاها ليه جداه..ووحدة تختارت من يماه..أما أنا هو لي ختارني!
ــــــــــــــــــــ
ناضت من بلاصتها معطلة فالنعاس..عاد رتاحت من السفر الطويل..شافت بين جنابها..ولقات البلاصة حداها..خاوية كيف خلاتها!
شوفتها الفرحانة بدلاتها..الدمعة جات بين عينيها..ناضت من فوق سرير ولبيتها مشات! داخلة خارجة كتدي الحوايج من بيتها لبيته..حتى كملات !
بان لها صندوق كبير محطوط..ناضت تحط فيه حوايجها..حلاته لقاته عامر سيوف!
ناضت معافرة مع سيوف..تهز من صندوق..وتلوح فالأرض..محدها كتهز وتلوح وصندوق عاد كيبان عامر كثر وكثر!
محساتش بالسيف لي جرح يدها..بالتنقاز ديالها..ومداتها فالدم لي خرج منها!
بقات مكملة شغلها..حتى يد تحطات على يدها جارها..وناطراها!
ضارت مخلوعة..مخرجة عينيها..لقاته واقف قدامها..من الحرب ليها!
باقي الدم والتراب فوجهه..معمره! شافته ولهضرة هربات من فمها..محساتش حتى دموعها طاحو ليها..والرعدة شداتها..خافية منه ومن لي بغا يدير ليها!
حورية: أنا غادي نخرج " كتبكي وترعد" والله حتى كنت بغيت نحط فيه غير حوايجي "حطات يدها فين شادها..لكن رجعات حيدتها ومقدات تقيسه" أنا غادي نخرج من لبيت ومنبقاش نحط رجلي فيه "كتبكي وطلب" عفاك غير طلقني.
بكاها وخوفها..ماشي غير جا وكان..فينما تجي عندها بنت عمتها ولا خالتها..كيخيبوه قدامها..باز ليك راه قتال..لي لقاه ولا قال ليه لا ولا عصى امرو كيقتلو..راه مضروب فوجهو وخايب..لا راه معندوش العين!
كل هاد لهضرة سمعاتها عليه..وفاش شافت حالته عامرة دم..الخلعة شداتها..والفرخ هرب ليها!
مسمعش ليها..ولا شاف فعينيها..يده غير فيديها حتى جرها وكلسها فوق سرير!
الغالي: متحركيش من بلاصتك!
حذرها ومشا كقلب فصندوق محطوط فوق طابلة وصغير..غير قالها تبتي وتبتات خايفة منه!
رجع وهاز فيديه معاه..وتش على ركابيه قدامها..وحط يديه السخان على يديها الباردة جاراها..جبد عشوب مدكوكين لونهم خضر حطهم على الجرحة لي فيدها..وزيف حزم بيه الجرحة بعد ما دواها ليها!
يديه من يدها تحيدات..وفوجهها تحطات..على عينها..ماسح دموعها..قرب ووجه ليها..وباس خدها فبلاصت الدمعة لي دايزة منها!
بعد عليها..خلا السخانة طلعات ليها..حدرات الراس مخرجة عينيها..مبقات رفعاتو !
الغالي: نوضي سخني ليا الحمام.
▪️أرائكم وتوقعاتكم؟ ▪️
أنت تقرأ
مرجانة🌙مكتملة🌙
Romance💎مكتملة💎 🌙🌙🌙مرجـــــــــــانة🌙🌙🌙 ✨كان يا مكان في قديم الزمان! ✨ جملة سحرية فتحات البيبان وخلات الأنس يتزوج بالجن والغول حتى هو ليه مكان.. كاين السلطان وكاين الخدم والحشم...وكيفما كاينة الفهيمة كاينا الدميمة.. كان يا مكان جملة تقالت فكل مكا...
