▪️مرجـــــــــــــــانة▪️
▫️من كتابة هيرا▫️
▪️الجزء السابع والثلاثون▪️
عينيها خرجو..وبقات تمتم قدامو..وضارت مبعدة منو..حتى وقفها جارها من حزام قفطانها لعندو!
الغالي: فين غادة؟
حدرات الراس ما نزلاته..وهو زاد جرها من الحزام لعنده..فكات الحزام وهربات خلاتو بين يديه.
تبسم شاد الحزام عنده..لواه بين يديه وتبعها..الخطوة لي دارت منها وحدة يدير منها جوج حتى وصل لها وشدها..مخلوعة ضارت شافت فيه ورجعات عينيها للأرض ما طلعتها.
قرب ليها ولحزام صايبو ليها..والراس باسو ليها..وقرب بصوته الثقيل هامس فودنها.
الغالي: الصبر عنده حدود أحورية..عنده حدود!
يمكن فهمات..ويمكن قدامه دارت راسها تغابات.
حورية: ما درت والو!
صوت ضحكته تسمع فودنها..وتبوريشة طلعات معاها..ولي زاد كمل لي بقى هو لي قال ليها.
الغالي: غنكمل الحمام ونخرج..شوي ونرجع..الحمام غيبقا سخون إلا بغيتي تدخلي..تسنايني متنعسيش "تقابل مع وجها غامز لها" ليل باقي طويل أحورية!
حط يديه على كتافها..ودورها حتى تقابلت مع طريق البيت..هز صعبو شير لها تما ودفعها بشكل خفيف.
رجع داخل للحمام وهي مشات منين وراها..رجل فليمن ورجل فليسر حتى كانت غتطيح بالخلعة لي شدتها!
ـــــــــــــــــ
كتمشي وتجي فبلاصتها..حتى وقفات وهي كتقول لي ليها ليها..جلسات مقرفزة على الصندوق لي قدامها..كتجبد فالحوايج وتلوح حداها..حتى هزات بين يديها قفطانها.
تلفتات لرحيمو..لي واقفة حداها وكتشوف لي كتديرو.
-علاش واقفة عند راسي بالي أرحيمو..عاونيني نلبس ونتقاد!
رحيمو: عار الله ألالة..أشنو ثاني سخفتك راه منفعات بوالو.
عينيها خرجاتهم..ويديها على خصرها حطاتهم.
مرجانة: نفعات قالاك! السيدة مني طحت وهي فبيتها..خاص غير دفيعة صغيرة وتكمل الباهية!
رحيمو: راه كيقولو لولة عفو..وثانية عفو..وثالثة نتناتفو! السخفة مورا ختها وثالثة اش..راه غير فضيحة.
مرجانة: ويلي ويل الشيطان ارحيمو..باركة من النحس..واجي عاونيني نتري عليهم ونحوز السلطان..راه مغدي ينفعني حد ايام البرد والرعد!
رحيمو: من داكشي لي قلتي لي بغيتي تديري..ما ضامنة تبقاي حية حتى توصل الشتاء..الخروج من الحريم ممنوع..وفين مقابلة مع بيت السلطان!
مرجانة: الله يكسر لسانك بين سنانك..فضحتينا كيقولو الزواج أولو عرا..وخليني نضبر راسي!
دارت مقالت ساكتة عاونتها تلبس وتقاد..مشات هو لول تكات على السرير كتقلب فلوسها..كيف ديما مكتنعس ولا تخرج حتى تدخل يدها..تحسب الفلوس لي عندها..من لبيت خرجات..وتبعتها منى وباقي لبنات..فنص الطريق صدرات گاع لي معاها..لكن منى لصقاتها..وفاش عرفتها بغات تخرج من الحريم زادت عليها كحلاتها.
خرجو ومنى كتولول من هنى لهيه..ورحيمو الله يعاونها ولفلات مع مرجانة..هادشي غير لقليل!
تدوز من حدا جناحه..توصل حداه وتبدا سخفانة زعما باقة مقصحة..ومن بعد تقول ليه غير يسمح لزاهية..راه وخا هضرات فيه وعيراتو كتبقى ختو..توصل ليه هضرتها وفي نفس الوقت تبين راسها ضريفة..هدا لي كانت عوالة تديره!
قربات لبلاصة البالكون ديال جناحه مقابلة معاها..يلاه بغات توجد لسخفة لقاته مسدود عليها!
بقات كتضحك بشكل متقطع مصدومة..جمعات جلايلها معفرة..وتمات غادة..هازة خنافرها لسما وبحالها راجعة.
بان لها ولد الزاهية مع الخدم كيلعب فطريقها..دفعاته من قدامها..وهو عقل عليها..غير شافت السلطان مع حاشيته دايز..رجعات للولد معبزاه فيها!
تلعب فشعرو..وتعبز ليه فيدو..وهو لبكية شداتو.
مرجانة: اشنو سميتك الزوين؟ سبحان الله كيشبه لمو..ظريف بحالها!
عين فيه وعين فطريق الحاشية..ساعة تلفتات مالقات حد قدامها..حد ما تسوق لها..جمعات جلايلها..وناضت زامة فمها..محيدة الولد من قدامها!
مرجانة: رحيمو يلاه لجناح السلطان.
واش شي حد يقدر يقول لها راه متقدرش تمشي حتى يعيط ليها هو! حتى حد ما يقدر ومشاو معاها ومنى مورياها طريق..الخدم لي قدام الباب حانيين الراس ومخلوها تدخل..حتى يعطي السلطان الادن!
دخل واحد عالمه..وخرج عندها بعد ما عطاه الادن..وحلو ليها الباب تدخل.
دخلات..والعين فالبيت حطات..تشوف هنا ولهيه..الخوامي لي من الحرير..الزرابي المفرشين..والسرير الكبير..أي حاجة عندها قيمة حطات لعين عليها..قول الجناح كامل عبراته..حتى كانت غتكروع.
بان لها جالس فوق مكتب والوراق مشتتين حداه..الحبر فيديه وكتاب قدامه..كيدون فيه حكامو..ولي داز فنهارو!
حنحنات وهز راسه ليها وهي حدراته..الحشمة طاحت عليها من السماء السابعة للأرض!
مرجانة: بغيت نهضر معاك أمولاي..شفتك قويلة لكن غير بغيت نهضر ومشيتي.
العين تبعاتها من لتحت لفوق عاد عاود رجع الشوفة فوجهها..حاجب طلع وحاجب نزل وبنبرة ساخرة رد عليها.
شمس الدين: المرة لي كتفوت خط الحريم..مكتبقاش محسوبة عليه باش نهضر معاها!
بغات تبان ظريفة وحشومية قدامه..ما ترد عليه هضرة وتسمع كلامه..لكن هي بغات وفمها قال.
مرجانة: هاد الهضرة غتقولها ثلاثة المرات..لكل مرة تحت دمتك خرجات؟
▪️توقعاتكم وأرائكم ▪️
أنت تقرأ
مرجانة🌙مكتملة🌙
Romance💎مكتملة💎 🌙🌙🌙مرجـــــــــــانة🌙🌙🌙 ✨كان يا مكان في قديم الزمان! ✨ جملة سحرية فتحات البيبان وخلات الأنس يتزوج بالجن والغول حتى هو ليه مكان.. كاين السلطان وكاين الخدم والحشم...وكيفما كاينة الفهيمة كاينا الدميمة.. كان يا مكان جملة تقالت فكل مكا...
